[خيال الصفراء]

قصيدة بعنوان ( أمة وعقيدة ورجال وأفعال حميدة ) هذه القصيدة موجهة الى الشاعر الكبير حمود بن زامل السبيعي من الشاعر الكبير عايض بن عويض الزيادي العتيبي وذلك بعدما سمع الشاعر/ عايض العتيبي اللقاء التلفزيزني الذي أجراه مقدم البرامج الشعبية ناصر السكران مع الشاعر حمود بن زامل السبيعي وكان من ضمن قصائده قصيدة يمدح فيها قبيلة عتيبة فاجابه الشاعر الكبير حمود بن زامل المجامعة السبيعي بدرة القصائد وهي107 ابيات من أقوى قصائده وأشدها تميزا جمع فيها ماثر سبيع بن عامر الغلباء والحكم والنصائح علما ان قصيدة الشاعر الكبير عايض بن عويض الزيادي العتيبي 101من الابيات وشاعر الوديان مقل في النظم ومن سادات ساحة الرد واليكم القصيدتين الاولى للشاعر الكبير عايض بن عويض الزيادي العتيبي ( صاحب ديوان كنوز الذهب في الشعر والادب في جزيرة العرب ) والثانية لشاعر الوديان الكبير حمود بن زامل المجامعة السبيعي :





بذكر الله أبدأ القـول بسـم الله الرحمـن
عسى الله لقول الحق والصـدق يهدينـي
وصدر الزيادي فـاح كالمسـك والريحـان
بزيـن المعانـي غالـيـات المثاميـنـي
كما العود والعنبر وعطر الزهـور ألـوان
ليا فاح عطـره مـع زهـور البساتينـي
سقاها من الوسمي صدوق المطـر هتـان
عليهـا تكسـر مـاه ليـلـه ويوميـنـي
وغب المطر ريح الزهر يجلـي الأحـزان
ويبعـد همـوم اللـي ربوعـه بعيدينـي
سخرت الكلام خيار مـن طيـب القيفـان
يسـر العـوارف والرجـال الحكيميـنـي
فأنا من دعـاة المجـد والديـن والإيمـان
وزين الفعول اللي علـى الحـق والدينـي
فأخذ جابتي يا نمر وأسـرح بـه عجـلان
على سابقات الصـوت ذالحيـن ذالحينـي
تبلـغ لكـل سبيـع والسـادة الشيـخـان
كـلام المـعـزة للـرجـال الحشيميـنـي
رجال غلاهـم يسكـن الفكـر والوجـدان
علينـا عـزاز وجـد بالحيـل غاليـنـي
مكلف توصيـل طيـب القـول والألحـان
لربعـن علـى الخرمـة ورنيـه مبنينـي
وهيضتني يا حمود طيـر الجبـل حـوران
بقـول يشـرف للـرجـال الفهيميـنـي
سوات الذهب والماس من غالـي الأثمـان
قليلـه يـرجـح مـايـلات الموازيـنـي
يابن زامل الممدوح يـا راعـي الإحسـان
عزيز ومـدح بالفعـل ربعـن عزيزينـي
بعيد النظر والمعرفـة يـا رفيـع الشـأن
رفيعن مقامك بيـن الأقصـى والأدنينـي
ولا هي غريبـة مـدح جيرانـك العتبـان
وهـم مثلكـم فـي قمـة المجـد باقينـي
وربعك هل الغلباء هـواة الظفـر سبعـان
سكنتـوا فـروع المجـد وبهـا مقيمينـي
ذرى اللاجي المضيوم والضيف والجيـران
بحق الخـوي والجـار بالحيـل وافينـي
سبيع الظفـر والجـود والنعـم بالسبعـان
هل المجد وأهل الطيب والمذهـب الزينـي
رجال العقيـدة والهـدى وللهدى عـوان
عـوارف كـرام حشـام عقـال صلفينـي
يفـوزون بالجولـة ليـا طبـوا الميـدان
على سابقـات الريـح مثـل الشياهينـي
لياقالـوا الفرسـان ويـن العقيـد فـلان
ولا فاض بحـر المـوت وردوه عجلينـي
وكنـه عليهـم مثـل عـدـروى مليـان
ليـا صبحـه قطعـان بـدون محيميـنـي
فعول على معنـى وقـول علـى برهـان
أقولـه وأثـبـت حجـتـي بالبراهيـنـي
تعيش المراجل وأهلها عاشـت الأوطـان
وعاشوا سبيع اللي على الطيب ضارينـي
يشـرف تهشهـم لياشافـوا الضيـفـان
تهشهـش عقيـد فـك ربعـه مساجينـي
يحطون جزل الحشو مع دسمـت الخرفـان
وجـزل العطـاء للمعدميـن الفقيريـنـي
مشوا مع أهل الدعوة تحت راية السلطـان
بتوجيـه أبـو تركـي كعـام المعاديـنـي
زعيم الجزيرة يوم عاثـوا بهـا العـدوان
عظيم العـزوم مـن الملـوك العظيمينـي
وعاشـوا حمـاة المملكـة درة الأوطـان
ليـا كـبـروا للمعـركـة والمياديـنـي
أقوله وانا عائـض وآلا ليـت يالشيهـان
تـودي كـلام قلـت للغـرب والصيـنـي
وابي منك يا طير السعد خافـق الجنحـان
توديـه نـاس عنـه مـاهـم بداريـنـي
ذكرت الحقايـق واحمـد الخالـق المنـان
فعول الظفر والصـدق تـرض الفهيمينـي
ويا مكثر أهل الطيب والمسلميـن إخـوان
تزيـن صحايفهـم بـزيـن العناويـنـي
وكـل الديـر برجالهـا والفعـول تـبـان
شمال وجنوب وشـرق للطيـب حاوينـي
فعول النشامـي والمراجـل لهـا ميـزان
فعول تشـرف بأسـم أهلهـا المسمينـي
وانا مع اهل الطالة بعشـق العـلا هيمـان
متيم بهـا فكـري وتطـرب لهـا عينيـي
ولي وزعـة جزلـه ولانـي بعـد قنعـان
وأعرف أنهـا جزلـة وتفـرح وتكفينـي
أريد المزيـد وشفـي الفـوز يالظفـران
وجـدي علـى درب المعالـي موصينـي
عوين الشجيع الله وايضـاً الكريـم معـان
هو أعظم كريـم يحـب فعـل الكريمينـي
وعاشوا هل الطالات من ماضـي الأزمـان
عتيبـه عتيـبـه ملحقـيـن المخليـنـي
عوارف حقوق وعدل يوم الحقوق تصـان
نعـرف الحقـوق و للمعانـد عنيديـنـي
خـذوا نجـد بالقـوة وبمعنكـب الدخـان
مع الشيخ ابن هندي صعـوط المجانينـي
عظيم الشهامة مكرم الضيـف والجيعـان
منحـر كبـار البـل معـش المساكيـنـي
وعاشوا رجال يبذلـون الكـرم صفطـان
قريبيـن وألايــم صنـعـاء بعيديـنـي
ومال بليـا جـود يفـرح بـه الخسـران
حصيل الرخوم اللي عـن الحـق غادينـي
وفتى الجود من يدرى الخطاء والفتن لاهان
لياجوبهـا الأشـرار مثـل الشياطيـنـي
مثايل صبين جـاب دينـه مـع العـدوان
قضى الدين منهم ما بلغ سـن عشرينـي
عصـاة علينـا جرهـم نـازغ الشيطـان
وجونـا وجيناهـم وصـار اللغـا شينـي
تعيش الخناجر والصوك عاشـت الأيمـان
وردنا المخاطر مثـل شهـب السراحينـي
وردنـا بهـا والـدم فينـا وفيهـم بـان
نـردد عزاويـنـا ســوات الملبيـنـي
وهـذي عوايدنـا قديمـة مـن الجـدان
وطـال النهـار وتالـي العلـم جازيـنـي
حسبنا عديم الرأي ناقـف كمـا العميـان
يوم أنـا قليـل وشـاف ربعـه كثيرينـي
وأنا أفخر بنفسي وأفخر بربعي الشجعـان
واكـرر واثبـت حجـتـي بالبراهيـنـي
وأنا من دعاة الصبر والصبر شانه شـان
عظيـم الفوائـد والأثـر والمضاميـنـي
يقولون في الأمثـال راع الخطـاء ندمـان
تجـارب حكيميـن العـرب والسلاطينـي
وأبي اهدى هدية غاليـة خـص للشبـان
شبـاب البـلاد الصالحـيـن التقييـنـي
ترى الربح في طيب العمل عند كل إنسـان
وصلاة العتـم لاقفـا مـن الليـل ثلثينـي
جميع الفروض الخمس مع خمسة الأركـان
طـرأة الحيـاة وكـل شـي بهـا زينـي
نعظـم شريعتنـا ولا نجعـف المـيـزان
ونحفظ حقوق الله علـى الحـق ماشينـي
نحارب دعاة الكـذب والـزور والبهتـان
وشـاة الفتـن هـم واليهـود اللعينينـي
نسر الصديـق ونوجـع الماكـر الخـوان
نضد الطغـاة ونجعـل الصـاع صاعينـي
هل العزم نرسي مثل ما ترسـي الظلعـان
جبال الحجاز اللـي ورى الطائـف يمينـي
ودنيا الفناء تجفـا الفتـى مالهـا خـلان
وتصخـر صناديـد العـرب والسلاطينـي
وأنا في الشمال بعيد ساعات مـن عمـان
بعيديـن فـي حالـه وحالـه قريبيـنـي
وأبي شوف قوم شوفهم يرضي الزعـلان
حـرار الصقـور اللـي تسـر المنادينـي
بدار الحجاز ونجد واللـي ورى الوديـان
هل الجود واهل المجد في العسر واللينـي
وراسن يبي الطالات والعـز مـا ينهـان
عسى الله من العثـرات والـذل ينجينـي
نواجه صعيبات المراجل في كثيـر احيـان
ونرض العميـل ونجعـل الكيـل كيلينـي
عظيم الثقة قلبـي وراس القسـى مـالان
وهومـات راسـي للمصاعـب توديـنـي
ويصعب علينا السهل منها لبعض أحيـان
ومومن كما غيري مـع العسـر يسرينـي
وانا والمعاني والمراجـل تـرى صدقـان
لياجـن مثـل الحـور عفـر مزاييـنـي
ليالـي كثيـرة زارنـي فجرهـا سهـران
يجـي علـم يجرحنـي والآخـر يسلينـي
وهذا حال من فكره بدرب العـلا عشقـان
اقروا به العـراف قبلـي وفـي الحينـي
ولك الشكر والعرفان يا ناصـر السكـران
كثير العرب واهل الأدب عنـك راضينـي
برامجك ممتـازة وفيهـا الفنـون الـوان
وجمهورهـا بالفعـل فـوق الملاييـنـي
وابي فزعتك ذيع الخبر واسمـع العربـان
هديـة ثميـنـة للـرجـال المواميـنـي
واخذ من كنوز المعرفـة طيبـات احسـان
وحنـا لجـلـب الطيـبـة مستعديـنـي
عسى الله يثبتنـا علـى منهـج القـرآن
الـه عظيـم اسمـاه تسعـة وتسعيـنـي
من أطيب كلام أهديـه للشيـخ والفتيـان
عسى الله يقبـل قولـوا اميـن و آمينـي
واريد اختصر كيف اختصر فاضت البركان
وابي العفـو ياهـل المعرفـة والقوانينـي
ليا جتنـي الزينـات طـاب المجـال وزان
سوات النجـوم الباسمـة تفـرح العينـي
تزين سما الدنيـا ويسـلا بهـا الولهـان
واناجـي الكواكـب والكواكـب تناجينـي
اطاوع بنات الشعر نشطه وأنـا عمسـان
مواقـف تمـر ايـام وشهـور وسنينـي
وتشرح لي أحجام المشاكل وكـان وكـان
ولا احـد درى عنهـا ولاحـد يراعينـي
حليل القلوب المستريحة يـا بـو سلمـان
وقلبي مـع الأفكـار والشعـر عاصينـي
وابي انخا رجال العلم من صاد ق الوجدان
بعـد طلبـت الله فزعـة القـوم تشفينـي
دواء كل من ياكل ويشرب وهـو وجعـان
تفوت الفروض الخمس ممسين مضحينـي
ونبي حل صعبات المشاكل وكل شي فـان
بيـن امـة محمـد لا تعـود فريقيـنـي
ويكفي كفاية يـا رسـول المعانـي كـان
يا فكـر المعانـي قـل لهـا لا تشقينـي
ولاا حكم على الجاهل ويعذرنـي الفهمـان
ثميـن القوافـي فـاض مثـل البراكينـي
طرايـف معاناتـي كمـا بـارق الأمـزان
وتسقي وطن غيـري وتغـرق بساتينـي
خطرها عظيم وتحـرق الصـدر بالنيـران
وساعـات اطفيهـا وساعـات تكويـنـي
ازخـرف معانيهـا كمـا لوحـة الفنـان
مـن المسلميـن المبدعيـن القديميـنـي
بذكر الله أفضل قول مـن غالـي الاثمـان
بمويا الذهـب والفضـة أجمـل تلاوينـي
مع الشكر والتهليـل والحمـد والرضـوان
ولله نكـررهـا ثـــلاث وثلاثـيـنـي
وابي اصعد صروح المجد في عالي المزبان
كما الحر الأشقر فـي طويـل المزابينـي
صروح بدوهـا قدمنـا السـاده الشيخـان
وحنا علـى الامجـاد والديـن حرصينـي
إلهي طلبتـك يـا الله العـون والغفـران
ومن العسـر والمنقـود والنـار تحمينـي
وصلوا على سيد الملا من نسـل عدنـان
عدد من ذكـر ربـه وصلـى المصلينـي


وهذا رد شاعر الوديان حمود بن زامل بن قاسي المجامعه السبيعي :




بدينـا بـربٍ نــزل العـصـر والفـرقـان
وهـو مـنـزلٍ عــم وطــه وياسيـنـي
إلـهٍ خلـق مسلـم وكافـر وإنـس وجــان
ولا غـيـره المعـبـود خــلاق ومعيـنـي
وأصلـي وسلـم عـد مـا تنبـت الريضـان
علـى هـازم الكفـار فـي بـدر وحنيـنـي
بعدها عـدد مـا تومـي النـود بالاغصـان
هـلا بالرسالـة والـوصـي والموصيـنـي
قصيـدة وفاجتنـي وأنـا للـوفـا طـربـان
وعرفي مع اهـل العـرف والفكـر مغنينـي
واميز وافكـر واعـرف الـزود والنقصـان
وغيـري رجـالٍ فـي المعانـي بخيصيـنـي
حـلاة القصيـدة لا قريـت البيـوت سمـان
وحنـا علـى بعـض الطواريـق شفقيـنـي
قريت البيوت اللـي كمـا اللـول والمرجـان
عن الزاد والمـا يـا هـل العـرف تقرينـي
وانا شاعـر الوديـان يـا شاعـر العتبـان
ادل الـدروب وشـوف عيـنـي مقديـنـي
ومـن يفعـل الاحسـان مااجزيـه بالنكـران
وسلم العرب تجـزي هـل العشـر عشرينـي
بعدها باطـرش لـي كتـابٍ علـى العنـوان
علـى اللـي محيلـتٍ لهـا قيـس حولينـي
زواها الحيال اسديـس مـا درجـت حيـران
ومـن جيـش بـن ثانـي ثمنهـا ملايينـي
ومبرومـة الفخذيـن مفتـولـة الـذرعـان
وكـن الشـرار بعينهـا راسـهـا زيـنـي
رعت مقدم الوسمـي خشـوم الركـا وذقـان
ومصيافـهـا بـيـن الغرامـيـل عاميـنـي
تقطـف زماليـقٍ سـقـا نبتـهـا الــودان
بـعـد سيـلـه الاول قفـنـه وداديـنــي
غدت كنهـا الادمـي بالاوصـاف والالـوان
تهـوم الفـحـل لـكـن عنـهـا معديـنـي
عمانـيـةٍ لا زرفـلـت تسـبـق الـغـزلان
وفـج الزغـون ولا تـنـوش الذراعيـنـي
عليها الشـداد ومزهـب الطرقـي العجـلان
تمـاوى جنايبهـا مـن يـسـار ويميـنـي
وتسرح من الفيحا مع الصبـح لا مـن بـان
عليهـا غـلامٍ كـل مـا انـخـاه يشفيـنـي
مضراً علـى قطـع الخرايـم وسيـع بطـان
أمينٍ علـى الاسـرار مـا هـوب مسكينـي
تمـر بهـل الخرمـة مـع الظـهـر والاذان
ومقيالهـا فـي كشـب بـيـن الصلاتيـنـي
ترحـب بهـا روقيـةٍ يذبـحـون الـضـان
وسـاع الصـدور وبالجمايـل حضيضيـنـي
وتالـي نهـارك حسهـا تاصـل امسـيـان
مسـاك المدينـة غيبـة الشمـس ممسينـي
ليا اصبحت زاور مسجـد الهـدي والايمـان
وسلـم علـى خـاتـم جمـيـع النبييـنـي
وتوكـل علـى الله وارخ لشعيلـه الارسـان
تـرى اللـي تبيـهـم يانديـبـي بعيديـنـي
تنحرغـروب الشمـس كنـك تبـي عـمـان
تنـحـر تـبـوك قصـورهـا والبساتيـنـي
وتنشـد ليامـن جيتهـا وانشـد العـربـان
عن اللي علـى شانـه مـن البعـد عانينـي
ليا قلت ابـي عايـض تبيـن وذكـره بـان
يعرفونـه العربـان الادنــى والاقصيـنـي
ليا جيـت بيتـه رحـب وفـز لـك فرحـان
مضرينـه الترحـيـب اهـلـه العريبيـنـي
يعشيـك حيـل وقبلهـا الكيـف بالـرسـلان
وعقب الصلـف فـي مجلسـه مستريحينـي
وعطـه الرسالـة جعـل يفدونـك الـرديـان
وسلـم عليـه وقـل رسـولـي موصيـنـي
سـلامٍ يخـص اهـل المواجيـب والحـقـان
رجـالٍ لهـم قيـمـه وهيـبـه وذربيـنـي
عتيبـه مـن العـارض ليـا حـرة العتبـان
وسـاع الطعـون بنجـد مثـل الصلاطيـنـي
لهـم يشهـد عبيدالرشيـد وشهـد راكــان
بيـومٍِ علـى عـروى يشيـب الرضيعيـنـي
يبـي ياخـذ الحاكـم دبشهـم بـلا سمحـان
وعـيـا علـيـه الله وهـمـه معيـيـنـي
ولـن جيـت اعـد فعولهـم تعبـت القلمـان
وتعـب اللسـان وبتعـب اللـي يحاكيـنـي
وحنـا سبيـع وسالفتـنـا لـهـا ديــوان
ثمـان الخصـال مدونـه فـي الدواويـنـي
نذكـر بهـا بعـض القبايـل عـن النسيـان
ويـدري بـهـا الله والمخالـيـق داريـنـي
نحـط الثـلاث لضيفنـا والصـحـون رزان
لـو ان الزمـان شحيـح كـنـا مريفيـنـي
تسمى الثلاث البيـض فـازوا بهـا الظفـران
وعمـت قبايلنـا مــن رمــاح لاتيـنـي
ومرتنـا تقصـر لا خـذت طبخـة الجيـران
على سلمنـا ينـزل علـى الـراس والعينـي
ونعرف قصيـر البيـت مـا نقطـع العقـلان
تجي بالرضا وان كـان مـا همـب راضينـي
وسلطـان منـا والصييفـي وبـن قطـنـان
وعجـران بيتـه مثـل عــد المقاطيـنـي
يعـاف المعـز مـا يذبـح الا مـن الطليـان
ولا يثنـي الـدلـه لـيـا جــوه لافيـنـي
وهذا مـا اخـذ المـداد والـراوي العطشـان
والاخــر يـصـوت بالعـشـا للمقليـنـي
والادغم عطاه من الاصيـلات بنـت حصـان
قلعـهـا وطــش حبالـهـا للموالـيـنـي
وليا مـن زبـن بـه مجـرمٍ يطلبـه ديـان
ثنـى دونـه الادغـم زبــون المجنيـنـي
وهل العشر منا والعـوارض مـن المطـران
هــذولا وذولا بالـفـعـول امتسـاويـنـي
والاخـرى ليـا جتنـا القبايـل لهـا دنـدان
ضراماً يبـون الغـرس والمشـرب الزينـي
وقالوا وقلنـا مثـل مـا قـال بـن هرسـان
يجينـا الـدجـر لا غطـرفـن المزاييـنـي
رسا غرسنا بيـن القبايـل علـى المشحـان
مـا بيـن الدواسـر والبقـوم وقحاطيـنـي
وحمينـا طوارفهـا بشلـفٍ مـع الفـرسـان
وقحـص المهـار وبالنوامـيـس مرهيـنـي
نعـد الحقيقـة والرعـيـه لـهـا رعـيـان
سوالـف عـوارف مــن رواةٍ مواميـنـي
وترى الطيب ما بين القبايـل قسـوم اخـوان
ومـا قـالـوا الـعـراف قبـلـي يكفيـنـي
ليـا قلـت ذا طيـب نشـدت ولقيـت فـلان
وفـي كــل ديــرة طيبـيـن وردييـنـي
تقـول الرجـال الحجـة اللـي بـلا ثبـتـان
سـواة الربـا مـا يغنـي اللـي مرابيـنـي
ولا ادخل بيوت الناس ليـن اطـرق البيبـان
ولـن صكـت البيبـان مــا الله بحاديـنـي
وانا اخاوي اهل الصدق ما اخـاوي الكذبـان
وبلقـا صـدوقٍ مثـل عايـض يخاويـنـي
اخاوي الاسـد والنمـر واخـاوي السرحـان
واجنب عن الحصنـي ويلقـا لـه احصينـي
واجنب عن اللـي دلوهـم تضـرب الجيـلان
تـصـدر ضواميـنـا وهـمـه محيميـنـي
ودنياك هذي لـو صفـا لـك هواهـا شـان
لها مثل مـا قالـوا هـل العـرف وجهينـي
تزين الك يوم ويـوم تشـري لـك الاكفـان
ويــومٍ تضحكـنـي ويـــومٍ تبكـيـنـي
تزخـرف لنـاس ونـاس توريهـم الحقـران
وتسـاوت بهـا روس العـرب والكراعينـي
وكـم واحـدٍ مغـرى برايـه وهـو غلطـان
ولو تنصحـه قـال انـت غـاوي ومغوينـي
يبي يرمـي البنـدق ويركـز لهـا النيشـان
هـذورٍ يحـط السـود مـثـل الملاويـنـي
وترى الرابح اللي يطلب الله فـي الرضـوان
وصلـى فـروضـه لا اذنــن المواذيـنـي
وزكـا وصـام وحـج واطـاف بـالاركـان
وصلـى النفـايـل والمخالـيـق غافيـنـي
وحمدنـاك ياربـي علـى الامـن والآمــان
بظـل الملـوك الـلـي عليـنـا مذريـنـي
وراح الجهـل ومكـاون الكـون والاكــوان
عوافـي كمـا قــال المـثـل ومتعافيـنـي
وترى الفضل للي جعل قبـره ريـاض جنـان
ويكسـي ثـرى قـبـره ورود ورياحيـنـي
عشير الطمـوح اللـي تكحـل لـه الاعيـان
تغـزل لبـو تركـي وتطـرق لـه العيـنـي
بعـد غـاب عنهـا حرمـت عقبـه الخـلان
ترجـاه رجـوى الغيـث بــدوٍ محيليـنـي
وتوجه لها بالسيـف والرمـح مـن دسمـان
بشلفـاً بيمنـاً تـودع الــراس قسميـنـي
من السيـف وردهـن كمـا يـارد الضميـان
علـى حـزبٍ واللـي عليهـن شجيعيـنـي
وتعزوى بنوره يـوم حـول علـى عجـلان
تحـت شلفهـم قصـوا علابيـه عجليـنـي
وله صوتـوا بالحكـم مـن عالـي الدرجـان
لعـبـد العـزيـز يبايعـونـه وفرحـيـنـي
وجمع شملها وارسى القواعد علـى سيسـان
ودرس عيـال اهــل الغـنـم والبعاريـنـي
وصـارت سعوديـة مـن الشـام لا نجـران
وحكامـنـا مـنـا وفـيـنـا واصيلـيـنـي
صلاطين نجد اهـل الفخـر والاصـل ويـلان
ملـوكٍ مـن اولهـم علـى الحكـم راسينـي
صقـورٍ ليـا ضاقـت تساجـد لهـا العقبـان
وحلويـن للصـاحـب وللخـصـم مريـنـي
وعسى الله يعاونـا علـى طغمـت الطغيـان
يخـذل اليـهـود وينـصـر الله فلسطيـنـي
يعجـل بنصـره ضــد عـبـادة الاوثــان
وتفشـل خطـط شـارون واسحـاق رابينـي
ويا احفاد ابي بكر وعمر وش هـذا الخـذلان
فلسطيـن تنخـاكـم ولا نـتـوا بموحيـنـي
متى الله يقـوم نصـر مـن ينصـر اليتمـان
ورمــلاً ولـدهـا ذابحيـنـه بسكـيـنـي
هـدم بيتهـا شـارون وانـهـدت البنـيـان
وحـول صواريخـه عـلـى راس ياسيـنـي
وترى القدس ياهل القدس ما غاب عن الاذهان
وحنـا هلـه وليـا متـى عنـه ساهيـنـي
ومتى المسلمين من العـرى تكسـي العريـان
وينخـا فهـد مـن عـام سبعـة وستيـنـي
ومتى يا فهـد تسجـد وتقـرا بـه القـرآن
تجـدد عهـد فيصـل بعـد عـام الالفيـنـي
فهد يا فهد يا للـي لـك المسلميـن اعـوان
تـراك الزعيـم ومنـك وبــك امتقديـنـي
على القـدس قدهـا يافهـد بمـرة الرحمـن
تـرانـا بحـيـل الله وديـنـه قويـيـنـي
وخلـه يقـود الجيـش عبـد الله وسلطـان
سلايل هل التوحيـد فـي الحـرب صاطينـي
نجاهـد عـدو الله لـو انـا علـى الكيعـان
ننـال الشـرف وان كـان متنـا شهيدينـي
حيـاة المذلـة مـا بنـت للرجـال اوطــان
يشـدون واصحـاب الشجـاعـه مقيميـنـي
ومن يامـن العقـرب كلـت رجلـه الديبـان
وعـدوان ابـوك وجـدك الـنـا مغليـنـي
شباب الوطن عضوا علـى الديـن بالاسنـان
ولاتمـرقـون ولا تصـيـرون عاصـيـنـي
تـرى الله ومرنـا بالوسـط مانجـي رهبـان
ولنـا فــي حبيـبـه قــدوةٍ يالمحبيـنـي
ولا تنزلـون بمنـزل الـجـرب والهيـمـان
ترى الشر جوكـم بـه هـل الشـر غازينـي
غـزوا بالحبـوب اتدمـر العقـل والابـدان
ورحتـوا مهبـل عقـب مانتـوا بصاحينـي
ترى العقـل للرجـال هـو شوكـة الميـزان
ليـا مالـت الشوكـه تمـيـل الموازيـنـي
وانـا قبـل اقولـه قالهـا قبلـي الويـحـان
وحنا مـع الغـدرى علـى الجـدي سارينـي
وشعـبٍ بـدون ارجـال لابـد مـا ينـخـان
تخيـب البـلاد ان كـان اهلهـا ضعيفيـنـي
شباب الوطن هـم ثروتـه عسكـر الميـدان
عيال الرجال اللـي علـى الحـرب ضارينـي
ليـا ناحـر الـحـراب مــا دبــروا ذلان
يخافـون مـن هـرج القفـا فـي المقفينـي
وتمـت وتـم القـول يـا عايـض كحيـلان
ولا ينقطـع حبـل الوصـل بينـك وبيـنـي
ومنك اعتـذر لا تحسـب ان البطـا هجـران
ظروفـي عـن الواجـب وشـرواك تلهينـي
عسفت المعانـي ليـن صعـب المعانـي لان
وخليتهـا تسهـل مـن الصـعـب وتليـنـي
ومبـدا الكـلام انهايـة القـول والختـمـان
واصلـي علـى خاتـم جمـيـع النبييـنـِي §¤~¤§¤~¤§



عساها اعجبتكم يالربع