[مخايل الغربي]

المشاركة الأصلية كتبت بواسطة مخايل الغربي

بسم الله الرحمن الرحيم

السلام عليكم ورحمة الله وبركاته وبعد : كل عام وأنتم بخير تقبل الله من الجميع الصيام والقيام هذه آخر قصيدة تشرف بإلقائها أبو مقعد الشاعر الكبير / عريمان الرويبي السبيعي في حفل سبيع أهل الخرمة بمناسبة عيد الفطر المبارك قبل عدة سنوات أرجو أن ترتقي لذائقة القارئ :

الله يبشر راعي الحفل بالخير = أنا أشهد إنه يستحق البشارة
دعوة طويل العمر تشريف لا غير = ما دونها الموتر يغير مساره
نيسان يسوى بنز تسعة مواطير = نذر إن يقطّع دونكم كل إشارة
تفداك يا عساف طول المشاوير = لو انتحاشر عشرةٍ في الغمارة
ولو بوش النيسان سقنا المظاهير = فالمزودة دلة وبن وغظارة
دامك غمزت بهاتفك عشر أزارير = وسمعتني لا هنت ذيك العبارة
يوم الخميس اللي مضى حزة عصير = ما أطيبك ياليل الخميس ونهاره
فإن كان ما وجبت حشمه وتقدير = يومٍ بقالي من حياتي خسارة
لو ينكسر عرقوب رجلي وأنا أسير = وتقفاه كسرة عظمةٍ في الفقارة
ويكتب لي الدكتور عشرين تقرير = لأنطل بها وأنا اعتزي بك يا سارة
ما أنحى وأنا عريمان لو شير ما شير = لأمشي وأريح بين تارة وتارة
الله ولا يا ناس بعض المعاذير = أخير من عذرٍ يطول اختصاره
الحلم واضح ما يبا الحلم تفسير = حفلٍ يلم سبيع نعمر جداره
لفيت من ديرة ولد راشد كوير = اللي بها مترك أمير الإمارة
أحمل تحايا عيد شيبان وأمير = من طيبهم شبيت ضو المنارة
سلام يا أهل الدار من دون تقصير = سلامٍ أحلى من غدير القرارة
يمشي عليكم عود شبان وصغير = ومن لا حضر يقرع جرس باب داره
والجندي اللي في العمل صوب خرخير = عداه سجن من اللوا والخفارة
يا سبيع جيناكم نزف التباشير = نحمل هدف لا للتعنصر شعاره
حنا لكم وقت الرخاء والمعاسير = وأنتو لنا وقت الرخا وإنكساره
حنا خلف لأهل السيوف البواتير = قومٍ لهم فالمجد غارة وغارة
مركاضنا يشبع به الذيب والطير = وعند اللقا نركز ثلاثين شارة
الراي واحد والسرايا طوابير = حقٍ علينا الزرع نجني ثماره
السلم لا يطرأ على السلم تغيير = اصحى تغيرنا سلوم الحضارة
الثوب تكمل لبسته بالأزارير = ولا ينلبس ثوبٍ تقطع زراره
نمشي تحت حكم القضا والمقادير = ومن يضمن الحجاج يرمي جماره
لو حسب الرجال كثر المخاسير = ما طال عليا لو يطول انتظاره
لا صار ما ورد على جمة البير = يصبر على طول الشقا والمرارة
ولو كان خاوى طيبين الصقاقير = ما يلحق الصيدة غشيم الصقارة
عسى تعم الدار مزنٍ مزابير = وعسى السعد يضفي علينا ستاره
وختامها جينا لكم دون تاخير = وأنتو عليكم دين رد الزيارة

صح لسان أبو مقعد الشاعر الكبير / عريمان الرويبي السبيعي . منقول وأنتم سالمون وغانمون والسلام .

أخوي / خيال العرفا شكرا لك على المرور وصح لسان عريمان وبيض الله وجهك ولا هنت مع أطيب أمنياتي وخالص تحياتي .