السلام عليكم ورحمة الله وبركاته
مساكم الله بالخير جميع واشكر الاخوان اللي عرفو بنا ياعجمان الرخم ولو ان حنا تعرف بنا فعولنا وبيض الله وجيهم على فزعتهم
ثانيا مثل ماقالو الاخوان سبيع كلها وافيه وماعليها كلام وعجمان الرخم طيبهم من طيب سبيع كافه
ثالثا عجمان الرخم فيهم الكثير من الفرسان الشجعان والشعراء الجزلين وسأذكر منهم على سبيل المثال لاالحصر لكي لايكون لاحد علي مأخذ لو نسيت او قصرت
منهم الفارس بادي بن دبيان فارس معروف وشجاع كان من ضمن (سبارة)الملك عبدالعزيز ومن الناس المقربين والمحببين اليه رحمهم الله و(السبارة)هي مجموعة قليلة من الفرسان الشجعان يرسلهم الملك عبدالعزيز للقوم اللي ناوي يغزيهم يشوفون عددهم وعدتهم ويجيبون له اخبارهم وهو ايضا شاعر جزل....له صور نشرتها مجلة ارسان للخيل العربية في اعدادها الاربعه الاوله ماني متأكد اي عدد كان ماسك بندقه وحصانه
منهم ايضا هديهد بن غنيم فارس شجاع كان من ضمن الاخوان اللي فتحو الحجاز وكان معه ايضا كم واحد من عجمان الرخم منهم سيف بن سعد فارس شجاع...
منهم سعد بن سيف فارس لايشق له غبار وعقيد قومه في الغزوات من اشجع الناس...
اما الشعراء فهم كثر في عجمان الرخم منهم الشاعر الكبير عبدالهادي بن راجس رحمه الله المتوفى قبل اقل من عام وابنائه شعراء منهم الشاعر شافي بن عبدالهادي ينشر احيانن بالجرايد ومنهم عبدالله بن راجس احيا عدة امسيات ويطلع على القنوات دائما
من الشعراء ايضا راكان بن بدن المشارك حاليا ببرنامج مسابقات شعري ماني متأكد من اسم البرنامج اللي من ضمن لجنة تحكيمه ناصر السبيعي مدير مجلة المختلف
عجمان الرخم ايضا اهل حلال ويحبون الابل ويقتنون الطيب منها على سبيل المثال دبيان بن معيض راعي الصفر المعروفه اللي اخذ المركز الثاني في ام رقيبه قبل العام ومنهم ايضا سهل بن مبارك اللي اخذ المركز الثالث قبل العام ايضا في الصفر
يطول الحديث وااسف على الاطاله ان وفقت فمن الله وان اخطأت فمن نفسي والشيطان وكما قلت ماذكرته هو ماكان يحضرني وهو نقطه من بحر وليعذرني من نسيته او سهوت عنه والشكر لمن منحنا من وقته الثمين لقراءة المشاركه والسلام عليكم ورحمة الله وبركاته واي استفسار انا جاهز...عفوا تذكرت احد الاخوان سأل عن سبب التسميه وهو على مااعرف ان عجيم جد عجمان الرخم كان ملبس عياله الاربعه المذكورين في المشاركات السابقه كان ملبسهم ثياب وغتر بيض يوم العيد شافوهم بعض ربعه وشبهوهم بطير الرخم الابيض لظرف شكلهم يوم شافوهم صغار بجنب بعض ولابسين ابيض في ابيض قالو كنهم طيور رخم وراحة فيهم تسمية عجمان من ابوهم عجيم ورخم من لبسهم الابيض شبهوهم بطير الرخم الابيض وراحت فيهم عجمان الرخم