[مخايل الغربي]

بسم الله الرحمن الرحيم

عروس الشعر للمطوع الشاعر / ناصر بن محمد العريني ولد رحمه الله في نهاية القرن الثاني عشر هجري في بلدة الدرعية وفي قرية العلب بالتحديد حيث كان إماما وخطيب جامع العلب عاصر الأحدث قبل توحيد المملكة وكان ممن عاصروا الملك / عبدالعزيز عرف عنه التقى والورع فقد قيل غنه يبتدى خطبة الجمعه بعد السلام والصلاة على النبي بقصيدة وعظية وكان من أشهر شعراء عصره شاعر فحل قوي المعاني فقد كان له قصائد مساجلات مع شعراء وقته أمثال / العزي بن عيد مثل نقائضهما بمعركة الصريف وكذلك كان له قصائد في المواعظ والنصاح توفي شاعرنا في أربعينيات القرن الهجري الماضي عام 1335هجريه ولقد ابدع هذا الشاعر وقال ثمان وعشرين قصيدة على حروف الهجاء له في قصيدة يتوسل فيها لربه بنزول الغيث وهي معبرة ومحزنه يقول فيها :

يا الله يا باني الحرم في تهامه
= كشاف ضر أيوب فتاح الأبواب

يا الله لا تجعل حياتي ندامه
= وأنا من الحيين مقطوع الأسباب

يا مخرج ذالنون والنهم هامه
= غابوا هل العبرة وهو عنه ما غاب

منجي خليل سبحت له عظامه
= يوم أصبح النمرود للنار شباب

ناج الكليم وسامعن من كلامه
= ساعة تجلى للجبل دك وانذاب

يا الله عبيدك يرتجون السلامه
= والرجع يم ديارنا غبر الأشعاب

العلب أشوفه ما ظهر من كمامه
= عامين ما خط القلم فيه كتاب

من عقب ما هو وقم شهر صرامه
= ما عاد يحكم عقب الألفين بانصاب

وله متغزل في قصيدة صعبة القافية :

عزيز يا نو على الأفق ناضي
= ينقاد من نوه كما الجيش نواض

عساه لا جاء فوق عمران راضي
= وهبت شمال وكن يقفاه عراض

يسقي لنا شعبان وادى الرياضي
= يا حيث به لمغيزل العين مقياض

صافي الخدود اللي غشاها البياضي
= توضي كما الشيشه بدكان عواض

وش عاد لو جابوا طبيب يحاضي
= شرب الدواء واهليلة الطب ما عاض

وللشاعر الكثير من القصائد الحربية منها :

عين ياللي جزت والنوم ما جاها
= ترجي الله بشير العز ياتيها

وانجلى الهم عنها عقب بلواها
= يوم زانت لأبو تركي معانيها

وكم راية عقيد هد مبناها
= ربّع الطير الأبرق في مفاليها

لكن ما زاد من شهرة هذا الشاعر هي قصيدة العروس التي كان هوا البادئ فيها ولم يسبقه أحد غيره عليها وهو أول من أتى بهذا النوع من القصائد التي يكون فيها من الإثارة والتهكم الشي الكثير ولقد خرجت الكثير من القصائد من هذا النوع بعده وهي قصائد من نسج خيال الشاعر نفسه حيث تكون ان أحد بنات مشاهير العرب تريد الزواج فيكون صاحب لها في رحله طويله قد تتعدا حدود الجزيرة العربية إلى البلاد الأخرى االمجاورة فيعرض عليها أناس مشهورين في وقتها فتمتنع عنهم لاسباب تذكر في القصيدة العروسة التي طلبت منه البحث لها عن زوج ترى فيه المواصفات المناسبة لبنت شيخ مشهور ولقد أبدع بحق شاعرنا في هذه العروس ونترك لكم الحكم والقصيدة تقول في أبياتها :

أمس الضحى في عالي طويق ونيت
= ون الحجر من ونتي يوم ونيت

من شوفتي غرو على شوفه أشفيت
= أنا مصد مير الأقدار ميلات

تقول يالبيطار أنا لك تعنيت
= عروس شعر أدور اللي تمنيت

بين النهود ومقصبات اليواقيت
= والخد من نور القمر فيه شارات

قلت ابعدي عني سقى الله ديارك
= وأرخي عن الغر الثنايا اخمارك

ياليت ربي رد عني نهارك
= تلقين غيري دارب بالديارات

أنا قصير الحال ما عاد منيش
= كداد واهل الكد ما عندهم جيش

وإن رحت للديان ابياخذ الحيش
= وأنا قصير الحال ما في نوهات

تقول يالبيطار زبن الحراير
= اللي عنا لك لا تكن فيه باير

نشوف من هولك يسوق البشاير
= يا بادع القيفان يا ويل من مات

نورك غشى النورين من بين الأنوار
= ما طال يوسف بالبها كود معشار

لو هو ضواك الليل في سوق سنجار
= زل الدهر ما علقوا به فنارات

بهاك يالعذرا علينا تنوع
= أنت عزب وأنا عفيف مطوع

لحم وعنده له ضواري مجوع
= وابليس مثل الذيب يسطي بغرات

تقول كف الهرج يالمكلماني
= ما جيتك غلا بقيم من اخواني

توه صغير طاعني ما عصاني
= ما هو سراقه من عيال الحميدات

قلت أسألك باللي في السماء فرج الضيق
= اللي غطى جوده جميع المخاليق

أبوك من هو يا عذاب العشاشيق
= واسمك ترى كل العذارى مسمات

تقول أبوي لرسلة الخيل مناع
= محمد بن هندي مناعير الأشجاع

واسمي شعاع النور بالبادية شاع
= من مترفات بالمقاصر مخبات

قلت المطوع في هوى البيض صبار
= بصبر ولو سار القدم يم سنجار

نشوف من هو يكرم الضيف والجار
= شيخ محل الجود في كل حالات

نروح بك يا عشقة اللي يعشقون
= صوب الحجاز وعالي الجد ابن عون

شريف مكه حاكم اللي يجورون
= جته الهدايا من ديار بعيدات

يسكنك من عقب السمايم بمكنون
= ويلبس طوق من الصوغ مخزون

في كارهم لبس الفتايا بمليون
= تمشي على الديباج فوق اللياحات

قالت ومالي به ولو جاء ورا البيت
= الحج مرة وأحمد الله حجيت

لا هو في بالي وأنا فيه ما أشفيت
= لو هو بيفرش بسطت الدار دانات

نروح بك يا زين صوب المدينة
= باب العرب إن كان أنتي تبينه

ولا نغصبك كان ما تهتوينه
= يذكر لنا صوب الديار البعيدات

تقول ما ترضى لنا باشة الروم
= دار مريفه والأهل كلهم قوم

شرابة التنباك والحق ملطوم
= كب الحجاز وكب عباد الأموات

نروح بك للمنتفق فوق الأسياف
= أبو لحيسه كامل كل الأوصاف

اللي يدبر مجلسة تسعة اّلاف
= عيد الركاب اللي لفنه مقيمات

تقول نعم به وبالخير مذكور
= لا شك عنده زوجتين من الحور

واللي يجي بين المحبين مازور
= واللي بعيد الدار ماهم بشفات

نروح بك للي غدا بالنفيلة
= ابن صباح اللي علومه جميلة

سوابقه لمن عنا له جزيله
= شيخ البحر والبر عين الكرامات

تقول مالي به ولو من قبيلة
= شيخ بداه الشيب بيد ابحيلة

تفوق نفسه إلى اقفت النار جيلة
= خله بداره لا سقته الهميلات

هيا لحمران النوظر وخطلان
= اللي حمو بالسيف لبده وبرزان

شمر إلى ركبوا على الخيل فرسان
= أهل الصوافي والشوام المركات

تقول مالي في رجال القطاعات
= نسوانهم يما أرجفت بالنياحات

أهل الخيانه ما بهم من طماعات
= ذباحة الوغدان وأهل الخيانات

يا جادل طول علينا المسيري
= شوفي بريدة ذاك شورن بصيري

ابن مهنا برواي شيخ وأميري
= شيخ بريدة ما يضدك بجارات

تقول نعم به كريم خيارا
= تدهل مناخه نابيات الفقارا

جده غدا بالطايله من السدارا
= لا شك ببريدة نجاح ونيات

هذي عنيزه شيخها فايح الراس
= اللي عديم في زمانه من الناس

صالح من الفرسان لباسة الطاس
= بني عمر لا جاء نهار الملاقات

تقول نعم بالفهد ماله أمثال
= لا شك طيبه ما أجحده قدر فنجال

درب الهوى يا بادع القيل غربال
= مضنون عيني ما نويته بجيات

يا بنت في شفك ندني النجيبه
= هذاك صندوق الجنوب أبو شيبه

يا بنت مطغين الجدود العريبه
= اللي حريبه خاونه بالسياسات

تقول نعم بس في الدين شحاح
= تمايم في زلة الجار دماح

طر الحنيفة مالي بقوم سجاح
= تلقى بهم من خفة العقل نوهات

يا بنت أنا سامع لك العلم ومطيع
= هيا ننحر للحفر ديرة سبيع

قوم نهار الكون ترخي المصاريع
= تخيري لك واحد فيه مشهات

هذا ابن شويه حامي الجاذيه فهيد
= شناوي ما داس درب المناقيد

عيدك فهد يوم العذارى لهن عيد
= عليه من شكل الحكومه علامات

تقول ما يحتاج أبو بدر تمجيد
= حيثه عذاب الخيل في فتقت الجيد

يا ونتي ونت هزيل المعاويد
= ذكرتني بفهيد وفهيد قد مات

تقول نعم به لفتنا علامه
= كم شيخ قوم حوله من حصانه

لا شك لسبيع الأصل به جباله
= والكبر من كار العرب بالجفوات

يا جادل ضافي على المتن مريوش
= مزمومة النهدين والخد منقوش

بالله عليك مثلم الجمع فدغوش
= شره قسم لعداه في كل هيات

يا بنت أنا هجوس قلبي تفرق
= والهقوة إنه لم الأسياف شرق

لابن خليفة منوتك بالمحرق
= بندر هل البحرين كيفه وراحات

تقول نعم به كريم خيارى
= له ديرة ما مثلها بالديارى

لا شك عنده خربوه النصارى
= متهاونن بالدين ما هو شفاقات

يا بنت أنا عذابك الله بلاني
= يا ما عديتي خير مرحباني

هذي قطر فيها الأديب ابن ثاني
= دوشق سريرة من قماش الهيارات

زمزير حاكم في قطر كل زمزير
= الخالدي والهاجري والمناصير

بالكتب والقوال ساق المخاسير
= وعنده ثمر صنعا خياش مرمات

تقول نعم به وبلحق النعم نعمين
= نعم الفتى غاية هل الخير والدين

قلبي يحب اللي يحب المسلمين
= وإلا البحر في رحمته سبع رحمات

درب البحر والبر كله مشيناه
= واللي بشفك تو حنا لقيناه

يا بنت هذا ماكر العز جبناه
= شيخ الديار اللي مشت له امطيعات

هذا عريب الخال والجد وأعمام
= اللي كسى عقب الجري ديرة ادهام

وأشبع وحوش البر من عسكر الشام
= وأهل الشهر من حربته راحو أشتات

شيخ الشيوخ امروبين الرهايف
= اللي يسمونه هل الدار نايف

هو عشقت اللي عشقتي بالولايف
= شاه العرب وإلا العجم فيه شاهات

تقول : والله لو يسوق عمشا وريمه
= ما هو بكبر ولا عن الشيخ شيمه

لكن قالوا إنه يبور حريمه
= اللي تزوج في الشهر خمس مرات

يا بنت ما خليت داني وقاصي
= أنا أشهد إنك من حمول الرصاصي

مثلك على الأشوار وش فيه عاصي
= إن خالفه مرة فلا هي بمرات

وإلا أنا مما تقولين قاضي
= كنك زعاع تشمخين العراضي

بحار حظك ما تعدى الرياضي
= ما أشوف لك عن ماكر العز نوهات

يالطاغية بالزين هذا محمد
= كم جادل ٍ عذرا بشوفة توجّد

اللي إلى هابوا هل الخيل ورّد
= يارد لو كانت اجموع مبنات

ودي تشوفينه إليا ثار دخان
= قضى على صم الرمك بأم سيلان

كنه عقاب حل با أجوال حوران
= مثل البحر عند غضب دون حيلات

تقول نعم به شجاع أبو خالد
= دنه ودنولي المطوع وشاهد

والسوق لك يا من بشفي مجاهد
= الكيف طاب ولك نسوق البشارات

وصلاة ربي عد ما راح من يوم
= وعداد ما يمشي من القبلة اغيوم

وعداد ما ينبت من العشب بوسوم
= على النبي صلوا جميع البريات

رحم الله الشاعر / ناصر بن محمد العريني وأسكنه فسيح جناته وتقبلوا تحياتي منقول وأنتم سالمون وغانمون والسلام .