الله من قلبٍ هجوسه تلوفه=لوف الهبايب غصن سدرٍٍ مشرف
في كل يوم وكل ليلاً تحوفه=حوف الذيابه للحلال المطرّف
عليه من دنيا الشقاوه كلوفه=كلوفة اللي مع طريقه مهرف
بين الهجوس وبين قاسي ظروفه=ولا يلومه غيرخطوى المخرف
لين اجتمع همّه وحزنه وخوفه=في ساعةٍ يصعب عليه التصرف
من وقتنا اللي كاثراتٍ صدوفه=مشاكله منها الفواد امتجرف
وقتاً صدوفه من زمان معروفه=عند المجرب مايبيله معرف
دلوه تجيك من الحزون مغروفه=وباسبابها زرع الفواد امتغرف
دنيا الشقا لازم نكدها نشوفه=سجل من الاحداث واكتب وزرف
بو زيد عيّت لا تجمع شفوفه=شاف السرف عقب الترف والتترف
وذياب بن غانم نوى بالنكوفه=ومن اولاً زيزومها ويتشرف
والكاتب المعروف غابت حروفه=متمشكلاً بالمحترف والمحرف
وعزي لمن فرصة زمانه تطوفه=لامن صفت الاجواء بوقتاً مدرف