[بن منصور]

بسم الله الرحمن الحيم
--------------------------------------------------------------------------------




نسمع كثير من الكلمات وهي مصطلحات عامية و حبيت استعرض اشهرها وغالبا ما نسمعها في منطقة نجد السعودية :

المنسم :


كل ما مريت عليه تسمع صوت تسسسسسسسسس و ذلك راجع إلى تهريب او تسريب الهواء من رأسه و السبب في ذلك هو أن في رأسه فتق او شطب لذلك تلقاه دايم يغطس رأسه في سطل موية عشان يعرف مكان التنسيم .

المهوي :

هو مرحلة متأخرة من التنسيم و المهوي وصل لمرحلة متأخرة جدا بحيث يفقد أهله الرجاء منه ...

الدلخ :

وهذاا إنسان غبي جداااا و يرفع الضغط و ينرفز و اكثر من يعاني منه المدرسين و اهله .
السلنتح :

قليل الأدب ..

جحلّط ( بتشديد اللام ) :

وهم مرحلة متقدمة للسلنتح ..

مزّلب :

يعني بايعها بتراب !

مسفّح :

يعني طاير في العجّة وهو ما عنده ما عندي جدتي , يعني بالعربي الفصيح من جنب القده ( القده : هي القائم ) تسمعون دايم في الورة مرة من جنب القده ..

الصتيمة :

وهو الشخص اللي ماعندك احد ...!!...و يصدق أي شيء يقال له ..

المسبة أو المسبوة :

هو الشخص اللي يكون مروع في صغره لدرجة أنه يصبح شبه فاقد للعقل .وهو اللي يقولون عليه طاير من راسة و شرة ..

الفاهي :

هذا الله يخلف مهما تقول له أو تصارخ عليه تلقاه فاتح فمه و بس و إذا كلف عمره و تفاعل معك رد عليك و قالك : هاه هه ...

المرجوج :

هذا ما عمره صلح شيء صح في حياته ما يمديك تفتح فمك إلا و طار في العجة بدون ما يفهم وش السالفة. و الارتجاج الحاصل له يختلف تماما عن مشكلة المسبة أو المسبوة حيث يكون الارتجاج هنا نتيجة صدمة و ليس نتيجة روعة .

المطفوق :

من فصيلة المرجوج إلا أن مايميزه هو انه اذا مر من عند كاس أو جيك أو ابريق أو أي شيء يكبه ( أي يسكبه ) برجله وهو مايدري ،، ولا تخليه يمر بجنبك وانت معك صينية فيها بيالات لأنه لازم يطخها بيده أو بكتفه ..!! أيضا لاتخليه يصب قهوة لضيوف لأنه لازم يكب القهوة على ثوب واحد منهم..!!!!!.....

المصرقع :

هو شخص ما يهمه شيء و اللي يطري على باله بيسويه لأنه ماخذ الدعوة سعة صدر و هبال ...
الحقنه :

هو الشخص الغثيث اللي ما يفكك لين تعطيه اللي يبيه منك و مهما تسوي له عشان تصرفه عن الموضوع حقه ينشب في حلقك لين يأخذ منك اللي يبيه , و هذا يفسر قول العرب : أغث من حقنة !!.... ..

اللزقه :

هذا ما له حل وش انتي يا لزقة جنسون ( لزقة جنسون : لاصق طبي لالم الظهر ) ..

العلة :

هذا اللي ما تأخذ أنت منه أي شيء و لا عنده استعداد انه يسمع منك مهما حاولت وهو كالمرض يعلك لين تنفقع مرارتك منه......

الملكع :

أما هذا فيعرف حتى السكن (اي الجن ) و مقطع السمكة و ذيلها و مهما تحاول تلف و تدور معه تراه فاهم و عارف وش تبي بالضبط فلا تتعب نفسك .
العربجي :

هو الشخص الشديد حق المشاكل و اللي ما يمشي إلا وهو مشخص ببنت البكار ( أسم لطريقة لبس الشماغ عند العرابجة ) و حاط مفاتيحه في سلسلة و لا بس نعال زبيريه و يسحبها تسحيب لين جا يمشي و دايم فاتح صدره و رازه على فوق و كانك ولد أبوك قله شيء بس . لكن في الآونه الأخيرة ظهرت إشاعات تقول بأن العربجي هو اللي يسوق الحمار (الله يعزكم) لكن صرح مصدر موثوق من رابطة العرابجة بأن هذه إشاعة مغرضة أطلقها عليهم أحد الخكاري...

الخكري :

ببساطة الخكري = نعومة + دلع + ليونة والله لايبلانا يعني يااااااااااااااااااااااي ..


وسلامتكم ..

منقول للتسليه