[ابن جمل]

يامرحبا بجموع الأصحاب والضيف=من هاجس اللي مع هل الطيب صافي
لاقمت للفرصه وجت لي على الكيف=يفرح بلحظة فرصتي كل وافي
أسرح مع الهاجوس وأسري مع الطيف=وأخشى من النقاد تنقد بقافي
برد الشتاء مايشبه لدفوة الصيف=ومن لايشوف بعين وشلون شافي
ومن لايقدي خطوته ياطي الحيف=إن سار بالملبوس وإن سار حافي
ومن لايثبت نفسه يعارض الزيف=حظٍ يقوم وحظ ينقال هافي
ومن لايعلي منزله يسكن الريف=والوقت مايبقى سهود وعوافي
ماينفعك ياصاح لعب الغطاريف=ترى الزمن دوار خلك سنافي
ماتعجب الطمنه رجال المشاريف=وماحرك العقال هرج الخفافي
ولاينقص النهرين غرف المغاريف=وماتدفن جبال الحرم بالسوافي
ومايظهر الخبلان كثر السواليف=كم واحدٍ بالحكي ذيب الفيافي
وليا عقبته شفت كثر التخاليف=يالله دخيلك حالته يامعافي
ياذا الزمن راحوا رجال المواقيف=أهل الشيم وأهل السيوف الرهافي
عز الله إني من بعض ناسك معيف=أضحك وأخفي ماتخفي الخوافي
ماعاد به ناسٍ تحفظ المعاريف=وشلون ياوقت الحيل والتجافي
ماهمهم ياكود جمع المصاريف=حقارة الأقراب دايم مقافي
هذي حقيقه والحقايق مراديف=مير إعذروني في نهاية مطافي
وليا حصل تقصير من شيٍ يخيف=من هيبة العقال هبت الوقافي
من يرضي أصناف البشر بالتصانيف=يالله إن تجمل وآخر العلم يافي
يالله عفوك قبل كشف المظاريف=ياواحدٍ خيره على الكون ظافي
يالله إن تكافينا شرور الصواديف=وتجعل خواتيم السعاده لحافي
وصلاة ربٍ مابدينه تكاليف=على محمد عد نقش القوافي