[ناصر بن مناحي]

يا صاحبي ودك تجيني وتهني؟=ابشرك ودك نسيته ولا كان
وان كان ما ودك ولانت مْتعني=ابركها ساعة.. تهدي القلب سلوان
مْن اول اهديك التحايا لأني=ظنيت ما مثلك على الارض انسان
ويا صاحبي بهديك أبيات مني=تْلخّص اللي صار وتْزيدني شان
انت الذي أخطيت والقلب كنّي=مر الخطاوفي داخل الجوف أحزان
ثم جيت تنشر هالاشاعات عني=وبيرك هماج وخاين السر خوان
وانا حفظت السر عقب التجني=ونطلتها في البير والبير مليان
ومن فوق هذا.. إلغلا اللي سكني=ما غاب لحظة وانته اقفيت زعلان
وانا انتظر جيتك يا من أهنّي=ولاهنت يا زعلان جددت الاشجان
كل ما حكمت الود تشريه صني=وتلعب بودي ولعبك اليوم فنان
لكني ادهى منك وبتشوف فني=هذا دبل والعب ترى اللعب خسران
وان ما عرفت الحل خل التمني=وانا شريت الفوز بغاليت الاثمان
وانا عصبت الراس والشعر حني=حنة سلاح الروس من جيش الافغان
أنا عظيم الشان من صغر سني=ومن صغر سني ماخذن عظْمة الشان
نارٍ على اعلام المراجل وكني=أبدعت سلْم رجال إل كل الازمان
على رماح العز سهمن وسني=وسيف العزيز اللي على العز ما هان
وانا زبون الداخل اليا زبني=الله عزيز وعزنا ملوح سبعان
والصوت مايحليه كثر التغني=والدم ساري في وريدٍ وشريان
ومزون ربي لا ومرها يجني=يحيي بها موت الخزامى والافنان
واليوم يوم جروح قلبي جفني=أدنتني وان دنت لابد تندان
ويا صاحبي أهديتك ابيات مني=وحان الوداع وليته اليوم ما حان