بسم الله الرحمن الرحيم
قصيده بين الشاعرين سعد بن سعيد بن نوار الملحي السبيعي ودسمان مناحي المحمدي السبيعي
يقول الشاعر/سعد بن سعيد بن نوار الملحي السبيعي=
ياهل الركايب موميات السفايف=الهن ثلاث سنين وبطونهن حيل
الهن زمان يلقطن الحوايف=وشرابهن عقب الضماء جاري السيل
من عجلهن وريلهن بالعدايف=كنهن على قطع الفيافي مغاليل
امدربات وكلبوهن عسايف =بنات مفجوج النحر وابتر الذيل
لازرفلن جاء للرواسي وحايف=مع الرمل والا الحزوم المصاقيل
احمولهن وحمول اهلهن خفايف=حاسنيهن لاجل السفر والغرابيل
ماحملوهن بالحمول الكلايف=غير الاشده والرسن والمعاميل
سود المدامع والاذاني شرايف=وكنهن من الزيله لاقفن مجافيل
كنه وبرهن مثل وصف القطايف=وخشومهن كنها صبغ فوقها نيل
مدامني طايح وحالي مهايف=تكفون شيلوني على اردوفهن شيل
وتنحرو بيتٍ على البعد نايف=بيتٍ ينادي بالشحم للمشاكيل
تلقون في بيته جميع الكلايف=فيه الشحم والطيب والبن والهيل
ثم نزلوني وازهمو يابن هايف=ثم قولو اني طحت وانهرت بالحيل
ولاعاد يلحقكم ملام وحسايف=البيض فال وجيهكم يا مراسيل
اعوام اقضيها طريح الوطايف= صبرت صبراً هدني واتعب الحيل
واليوم من وقتي ودنياي عايف=شربت كاس الموت خمسة فناجيل
اكتم ونيني والعباير ذرايف=اغرقت جيبي واغرقن المناديل
وانا سبب جرحي عديم الوصايف =اسقاني الموت الحمر والبهاذيل
يحكم علي حكمٍ مثل حكم نايف=اليا حكم حكمٍ بعيد من الميل
ماهوب ياويلي ولاهوب رايف= ولاله على حجه ولاله دواليل
العود زملوقٍ من الوسم زايف=والخد برق لاح في ظلمة الليل
ياحظ من يجمع قلوب الولايف= ترجح موازينه نهار المكاييل
ومن عاد بزهم غيركم يابن هايف =عورٍ عليكم طيحتي يارياجيل
والفرق ماهوب في الرتب والوظايف= الفرق في روس الرجال الحلاحيل
وانته من اللي يتعبون الرهايف=لاد الحميدي لااعتلت عجت الخيل
افعالهم مثل الجبال النوايف= تاريخهم معروف جيل بعد جيل
الحق عليه قبل طوف الطوايف =والا احسبوني من حساب المهابيل
والا قولو يالله عليك الخلايف=تعوضو في بالليالي المقابيل
ولاصار ماجبت القضى والنصايف = ويش عاد عذرك يارفيع المنازيل
والله لاقول ذل وتردى وخايف= ولاعاد به فوق البسيطه رياجيل
ورد الشاعر دسمان مناحي المحمدي السبيعي=
حضرت فكري والقلم والصحايف=يوم المشاعر شوقتها التماثيل
شردٍ تعلن فوق روس الشعايف=ماصخروهن ناقلين المفاتيل
مقيالهن في عاليات الطنايف=مايردن الا قراح الشهاليل
الهن طويلات الشغايا مصايف=والهن عسيرات المراقي محاويل
ساعة صفقت الهن نصني عطايف=واليوم اسجلهن على الطرس تسجيل
وخلاف ذا ياراكبينٍ وجايف=عوصٍ النجايب مقفيات مقابيل
مع صحصح البيداء تبارى صفايف= هوجٍ هجاهيجٍ هجاجٍ جهاجيل
فجٍ مهاضيعٍ ضمارٍ ضفايف=جردٍ مقاويسٍ نشاشٍ مخاليل
قطم الفخوذ الموميات الحذايف=شيب المحاقب قاطعات الدهاكيل
بيض اللواحي زاهيات الشنايف=ورقابهن مثل المطارق ذواحيل
عوصٍ مضاريسٍ خفاف نحايف=مع مشيهن تقول يعزف مواويل
لاجاء لغزلان الاشده صرايف=ثنوا يدين المسرفات الهواذيل
عند الذي يشكي علينا العجايف=من لوعة الفرقا دموعه زعاجيل
اصخى لنا بأبيات شعرٍ طرايف=نوادرٍ ماهيب تحتاج تأويل
واثنا علينا في بيوت نضايف=الذ واحلى من حليب المباهيل
شقحٍ رعن زملوق عشب اللغايف=يرعونهن عوج العصي بالدرابيل
رد الثناء واجب وتركه سلايف=وانا بمدح اهل الوفاء شره وبخيل
يابن نوار العمر عندك تلايف=من طيب ذاتك ماتصر المحاصيل
من روس ربعٍ ضربهم فالنعايف=اولاد مالح مبعدين المصاويل
تشكي غرام معسلات الشفايف=سود المحاجر لابسات الخلاخيل
يم الرياض صاحبك فالذلايف=امشوعٍ له في حراضه مداهيل
فالقيض ينزل في علو الحتايف= وان جاء الربيع من الطرف لا الغراميل
وانا معك بالمذهبات الصلايف=احوف وارمي واتخطى المحابيل
اما نجيب جريو قلبك نكايف=والا نروح وقيل روحت هل الفيل
اللي غزو يبغون هدم السقايف=وارسل عليهم ربنا طير ابابيل
لاكن حنا غزونا له هدايف=ماقصدنا هدماً ولاكيد تظليل
غزو نبي سيد البني سيد العفايف=طرح الشبك راع الرموش المضاليل
الا انها بالمال جبنا لفايف=شهبٍ زهن من صوره العود تجميل
والجاه وعلومٍ ماهيب الزهايف=ومسايس الغصن العوج بالتماهيل
فان كان حضك عن عشيرك مسايف=ما في يد المخلوق قوة ولاحيل