البارحه سهران والنوم ماطاب
حلو الكرى من موق عيني جفاني
جاني خبر مكتوب في خط وكتاب
وموضحه جواه بعض المعاني
فزيت له مابين فرحه ومرتاب
ونا ضعيف الحال والله ماداني
جاني كتاب من عزيزين وانساب
ومروح لاشك ماله معاني
رحبت بالمكتوب ثم قلت ياحجاب
اطلب طلبك اليوم من وين كاني
وترى حقوق الجار عسرات وصعاب
ولاينصف المضيوم ولد الهداني
قال الكلام مزوح ماني بطلاب
لاطالب(ن) دنيا ولا لي معاني
لاشك هاجوس الضحا جاب الاسباب
ونا منول خبركم مسلماني
قلت السبب مجهول والحب جذاب
لاكني اسمع في نحاكم غواني
ان كان قصدك حب عذبات الانياب
دفعت موجودي وجودي رهاني
حتى نجيب معطر الخد باطياب
ونشد باليمنى رهيف الثماني
فان كان قصدك تايه(ن)فيه الاطباب
قله بقى شهرين عقب رمضاني
لافرخ القمري لنا وعد وحساب
وماجاك بالماضي ترى اليوم جاني
فان كان صدرك ضاق سير للاقراب
سير على الجيران ولا العواني
فنجال بن وهيل إن كنت شراب
يشفيك باذن الله عيان(ن) بياني
ولاتشفي العله ترى كثر الاطباب
كثر التطبب يجعل الحيل واني
خذ يافتى فوق احمر الجمس ركاب
مع دله(ن) صفرا وكل الاواني
عده ثلاثه مانبي زود الاصحاب
والكل منهم بالمراجل ايثاني
لاهبت النسري غطا الجو سحاب
تلقا غلام(ن)مايحب التواني
وان قلت فزعه للحطب قال حطاب
من صغرته ماقال هذا مكاني
والتيس علق والعشا صانعه جاب
في فيضة(ن) ريح الخزامى شعاني
غب المطر ريح النفل في الوطى ساب
صوت ام سالم فيه مثل السواني
ياحجاب ثبت خيمة العز باطناب
واصحا يفوت العز مع درب ثاني
تراك شيخ القوم ماني بكذاب
الله يقول الحق والحق باني
فيك المواري بينه كنك عقاب
العين مبرومه وطلق اللساني
عين اشقر(ن) هدوه في جول واسراب
جاب العشا مابين لحظه وثواني
يابو حسن ظن العرب فيك ماخاب
ريف الضعيف اللي لفى البيت عاني
يفرح ليامنه لفى البيت ركاب
رجل(ن) كريم وعادته مرحباني
اهل الركايب من عنا البعد تعاب
قام وركض بالحال شد العناني
ولد الكريم من الكرم ماش مجناب
حتى ولو طوق عليه الزماني
وترى الكريم معان من رب الارباب
واليا إنصك باب(ن) يفتح الله ثاني
واصبر ولاتنظر عناقيد الاعناب
تصبح تهيم هيام مثل الجناني
إنظر براسي دوك يامسندي شاب
باسباب مردوع الشفايا شواني
واصبر وكامد طول وقتي وانا اهاب
وادرا واداري زلة(ن) من لساني
واقول جرحي طاب لو كان ماطاب
علاج الدكاتر كلهم ماشفاني
ولو نبذل المجهود مع كل الاسباب
الا ان صافي اللون مر وسقاني
من ذبل(ن) ياحجاب فيها العسل ذاب
تشبه زهور الفول والقحوياني
ياحجاب ياخيرة طويلين الاشناب
ربي بلاني بالهوا في زماني
ولع لطيف الروح في راس مشهاب
بين الضلوع المحدبات وكواني
كوية غلا تجذب على القلب الاتعاب
منها الحمام ينوح فوق المباني
ولاينفع الدكتور مع طب الاعشاب
زادي وشربي يافتى ماهناني
ياحجاب جارك تابو الناس ماتاب
باقصى بحور الحب ربي رماني
واخذت لي يومين وقفان بالباب
يوم الحبيب زارني في مكاني
ورحبت بالمجمول من عرض الاصحاب
واللي يدور بخاطره ماخفاني
ومن يوم راح ودمعة العين تنساب
واخفي ولا يدري ولا مودماني
وارسلت له مكتوب وتلكس ماجاب
والبعد والمشوار دونه حداني
بغيت اجر الصوت في كل الاشعاب
لاكن رب البيت قبله عطاني
اهدا عليه خير من حط الاطياب
والحمدلله يوم ربي هداني
قالو وقلت ابليس اخطا ولا صاب
يجري مجاري الدم باسرع ثواني
ولو القتال يفيد قاتلت با عجاب
لين الدماء من فوق راسي غشاني
واخذت لي بالحرب عجرا ومشعاب
ومصقل(ن) يصهل صهيل الحصاني
والله يفك الحر من شبك الانشاب
ويبدل السيئات بخضر الجناني
وصلو على المختار هو سيد الاحباب
اللي بعث عند الملا مكلماني
وسلامتكم
للشاعر / رويفع بن دبسي الشيباني
غير متصل
