من طيب حمران النواظر عطيتها

[شاعر مطيري]

أقل ما أقدمه لعزوتي ((حمران النواظر))

البارحه فالثلـث الأول مـن الليـل=دعتني أجـزال القصايـد وجيتهـا
وكتبتها والشطر الأول علـى أيـل=وفي شطرها الثاني كتبته على أيتها
وحشمتها عن صاقط القال والقيـل=مثل الذهب من نبع فكـري نقيتهـا
نـوادر(ن) ماجابهـا بـارد الحيـل=ماصاغ معناهـا ولا صـاغ بيتهـا
كتبتهـا وللمجـد فيهـا تفاصيـل=ومن طيب حمران النواظر عطيتهـا
وسرّيتها وأمجـاد ربعـي مداهيـل=دعتنـي الأمجـاد مـدري دعيتهـا
كتبتها فالرمـح والسيـف والخيـل=والحرب وأرجال(ن) تزامى بصيتهـا
نظمتها في مدح قـوم(ن) مشاكيـل=مطير ربعـي عزوتـي لا نخيتهـا
أهل السيوف المرهفـات المصاقيـل=عدوانهـم ماتهتنـي فـي مبيتهـا
ربعي حمات الذود قوم(ن) حلاحيـل=قصة صلاطيـن الوغـا ماوفيتهـا
المعجزات ألهـم توثّـق بتسجيـل=في صفحة التاريخ سيـره قريتهـا
متوارثين المجد جيل(ن) بعد جيـل=أمجادهـم ماتنتهـي لـو بديتـهـا
ربعي ذخر سـود الليـال المقابيـل=والماضيـات بطيبهـم مانسيتـهـا
فيهم كرم مثـل المـزون الهماليـل=قبيلة(ن) تلقاء الكـرم لا نصيتهـا
ستر الهنوف أم الرموش المظاليـل=هيبة مطيـر أتشوفهـا لا رئيتهـا
الله منزلهـم مـع الحـق تنـزيـل=هاذي أعلوم الصدق ياللـي بغيتهـا
ماهمهم هـرج الرخـوم المهابيـل=اللي ضمن حزب الهوامش لقيتهـا
كدوش(ن) على الخيبه تجر المواويل=جلايب(ن) لـو بعتهـا ماشريتهـا
توافه(ن) كبروا وعاشـوا مباديـل=قصة توافـه تافهـه لـو رويتهـا
ولا والذي نـزل تبـارك والأنجيـل=أفعـول ربعـي كلهـا ماحصيتهـا

[مطلق35]

شاعر مطيري صح لسانك وتستاهل مطير المدح بس لي تعليق على شطر (الله منزلهم مع الحق تنزيل) ياليت تشرحها او توضحها انا اشوف هذا الشطر حوله اكثر من علامة استفهام ؟؟؟؟ وتقبل تحياتي

[شاعر مطيري]

الله منزلهـم مـع الحـق تنزيـل
هاذي أعلوم الصدق ياللـي بغيتهـا


اول شي صح بدنك وتستاهل الطيب ثاني شغله

البيت واضح الله منزلهم مع الحق تنزيل اقرا البيوت اللي قبله والشطر اللي وراه وتفهمه


ان الحق دائما معهم ولا يظلمون احد واقرا البيت اللي ورا البيت اللي قلت عليه


اذكر اللي يظلمون ومافيهم خير ولاهم بطيبين

ماهمهم هـرج الرخـوم المهابيـل
اللي ضمن حزب الهوامش لقيتهـا
كدوش(ن) على الخيبه تجر المواويل
جلايب(ن) لـو بعتهـا ماشريتهـا

[مطلق35]

اخ شاعر مطيري ( الله منزلهم مع الحق تنزيل) اترك باقي القصيده مفهوومه وواضحه ... كيف الله منزلهم هنا السؤال ؟؟؟؟؟ قال تعالى (( انا نحن نزلنا الذكر وانا له لحافضون)) هذا معنى التنزيل وغيرها الكثير من الايات الكريمه التى تشرح هذا المعنى . انا اشوف ان هذا الشطر فيه تجاوز .. ياليت تكون فهمت قصدي ... وتقبل تحياتي

[شاعر مطيري]

أخوي انا اقصد فالبيت مثل ماقلت لك


ان الله نزلهم على حق مو على ظلم

عكس اللي فالبيوت الثانيه


والبيوت بعضها يشرح بعض مو تاخذ شطر وتخلي الباقي الله يرضالي عليك :)

[مطلق35]

المشاركة الأصلية كتبت بواسطة شاعر مطيري

أخوي انا اقصد فالبيت مثل ماقلت لك


ان الله نزلهم على حق مو على ظلم

عكس اللي فالبيوت الثانيه


والبيوت بعضها يشرح بعض مو تاخذ شطر وتخلي الباقي الله يرضالي عليك :)

ياخوووووووووي ما نبي ندخل في مساجلات ونقاش عقيم انت في ردك علي تقول: ان الله نزلهم ....؟؟ الله سبحانه وتعالى عرشه بالسماء ونزل جل جلاله اشياء ذكرها في كتابه منها القران والماء والحديد واشياء اخرى لا يتسع المجال لذكرها.... ياخوي اعتراضي على كلمة( نزلهم ) ومطير تستاهل المدح قبيله معرووفه قبلي وقبلك .... وسلامتك ....

[شاعر مطيري]

اخوي مطلق اللي اقصده

انا الله جعلهم مع الحق دائما وشكر على تعليقك وتستاهل الطيب :)

[ابودخيل السبيعي]

قصيد جزل وصح لسانك وتقبل مروري يامطيري ياقرم ولاهنت

[شاعر مطيري]

تسلم يابودخيل

وصح بدنك طال عمرك