آمل أن تحوز قصيدتي التالية رضاكم
يا الله دخيلك من الشرهات والزله=من زلة أقدامي ومن زلة لساني
ومن صاحب لا صفا لي ما صفا كله=وأنا ما.. اعده سوى واحد من اخواني
والصاحب اللي كذا ...في صحبته خله=ما هيب صحبة على قول ابن جدلاني
يعني يمسح لي الجوخة على الدله=وان رحت من عنده شوي تقفاني
آجيه واعاتبه بالطيب وأمهل له=واقول يا فلان ماتدري عن فلاني
أضرب له امثال في أهل الطيب واجله=أبيه يفطن وهو مايفطن.. هداني
لكن يا اللي تواجه صاحبي قل له=ما عندنا في الخطا الاول ولا الثاني
سمحت في الأول وفي الثاني بحله=ولا نبي منه رد احسان باحساني
والثالث ان صار لا بالله ولا بالله=يشره علي كان خاويته وخاواني
وان عاسرك يا وسيع المعرفة خله=لايكثر الهرج والا يصير نقصاني
والله لأمّره وهو يشوف وازله=واعقبه واتركه ما كنه يعناني
غيره لي أصحاب ورجال على المله=من أكلب ويام وعتيبه وشهراني
ومن كل بد وقبيله سيف (ن) اسله=ماهوب من صلب بوي وصلب جداني
ارافق الطيب اللي ينعرف دله=واقدره مثل تقديري لشيباني
والا ترى العلة اللي خوته عله=لابد ما انساه في يوم وينساني
وأخير ختم لكلامي دقه وجله=البيت الاول ...عسى الله يصلح الشاني
يالله دخيلك من الشرهات والزله=من زلة اقدامي ومن زلة لساني
وســــــــــــــلام ... ســـــــــــــلام .
غير متصل
