منتدى الشعر الشعبي والنبطي ( شعراء الشبكة )قصائد نبطية شعراء قبيلة سبيع الغلباء و الخليج ، دواوين شعرية بالشعر الفصيح و العامي بأجمل الكلمات وأجزل الأبيات
السلام عليكم ورحمة الله وبركاته
الاخوه الكرام اعضاء وزوار منتديات قبيلة سبيع الغلباء
يسعدني التواصل معكم بهذه القصيده المتواضعه اللتي كتبتها في ربعي الصنادله
وبسم الله نبدآ من غير قصور في جميع القبائل
قالو تغزل في البنات الرعابيب = مالك ومال مهايطات القبيله
قلت العفو مانيب من يكره الطيب = ولاني من اللي يقبلون الهزيله
بشيل صوتي فوق رؤوس المراقيب = تاريخنا مبداه فوق الطويله
وبمدح ربوعي وافتخر والفخر طيب = وبجاوب اللي ماخفاني عويله
الشعر سيف ٍ له حدود ٍ لواهيب = حمل ٍ وانا من لابة ٍ ترتكي له
وأنا ورثت الشعر من شاعر ٍ شيب = وعهد ٍ علي مااقول غير الجزيله
انا من اللي يحتمون المواجيب = آلاد صندل كاسبين الجميله
وانا من اللي يكملون المطاليب = كسابة الناموس زبن الدخيله
وانا من اللي يوردون المقاضيب = سقم الحريب متعبين الكحيله
وانا من اللي يكسرون المحاريب = حريبنا في الكون واعزتي له
عاداتنا مانرضي الظلم والعيب = ومنهاجنا على دروب الفضيله
الضيف يبشر بالكرم والتراحيب = يقلط على هيل ٍ وحيل وعبيله
والجار لاصكت عليه المغاليب = دونه نبيع ارواحنا ونعدي له
ونقدر الطيّب من إبعيد وإقريب= وخوينا لازاد حمله نشيله
ونزجر وندجر دون حرش العراقيبب= ونحط في جوف المعادي مليله
ونخضّب الهندي من الدم تخضيب =عاداتنا نروي السيوف الصقيله
كبارنا يثنون لو رؤوسهم شيب = وصغارنا قدح الوغى والفتيله
ويوم المكاسب بالقنا والمشاعيب = الفوز والنوماس خذنا حصيله
لاثارت الهيجاء سيول ٍ محانيب = كم فارس ٍ عقناه من فوق خيله
وكم شيخ قوم ٍ راح منا عشى ذيب = تعشته سحم الذياب المهيله
وعندي على ما اقول فعل وتجاريب = وقول ٍ بلا فعل ٍ رداة وفشيله
هيّاتنا موثوقة ٍ في المكاتيب = ماتمّحي طول السنين المحيله
اللي تجنّو من ديار الاجانيب= ماذكر به حيٍ ٍ خلينا سبيله
دليلنا جدي عطيب المضاريب = مقعد كعام العايله والمعيله
وابو النفوس اللي حصل فيه تعذيب= قاعه من الدمان كنه مسيله
والغثوري يوم احتمن المخاليب =دجنا على فارس وامير وفصيله
وكون المصيده ذيد عن شمّخ النيب= ذدنا على قب المهار الاصيله
حدن وردن واتركوهم مساليب = واللي شرد مخروش مانام ليله
هذا فعل ربعي طوال الاشانيب= وبأفعالنا بيض الصحايف كفيله
وباقي القبائل والنعم مابها ريب =النعْـم يزهاهم قبيله قبيله
وختامها صلو على صفوة الصيب = محمد اللي مُرسَل ٍ من خليله
.
أنا ليا من جيت اسجل حضوري = أسجله في راس عالي المراقيب
أسجله فيما يناسب غروري = في موقع ٍ يرقابه الحر والذيب .!
أخي الكريم الشاعر / عايش أبو ليل السلام عليكم ورحمة الله وبركاته وبعد : والنعم بك وبربعك اّلاد صندل ويستاهلون الطيب كسابة الناموس منزحة الخصيم وصح لسانك وسلم نبضك وبنانك وإعتلا شأنك على هذه القصيدة الرائعة والمعبرة فيهم والله يعافيك ويبارك فيك ويجزاك خيرا ويبيض وجهك يوم تبيض وجوه وتسود وجوه هذا وتقبل فائق الشكر والإمتنان مقرونا بجزيل المحبة والإحترام والله يحفظكم ويرعاكم مع خالص التحية وأطيب الأمنيات واسلم وسلم والسلام .