بسم الله الرحمن الرحيم
إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : لقد سافر الشاعر الكبير / عبدالله بن غصن اّل علي السبيعي إلى مصر لأول مرة في حياته فلما رأى ما بها من الفتن والمنكرات قال هذه القصيدة والتي تعبر عن ردة فعله من فطرته السليمة رحمه الله تعالى رحمة واسعة وأسكنه فسيح جناته :
دار الفكر مني ثم درت مشاعري = بأمثال ما دارت على فكر شاعري
تعاليل ما بيني وبين هواجسي= علاقة عنا ما بين قلبي وناظري
جفا النوم جفني واستجابت جوارحي= ولولا غرام القلب ما بت ساهري
ينام الذي قلبه من الهم خــــــــــــــاليا= ويسهر من همه على القلب دايري
أنا من قرى نجد اليمامة موطــني = ومن قرية الحائر وتلك الماثري
أحن إلى تلك الديــــــار ولي بــــــها= حناناً وحلماً ما سلا عنه خاطري
إذا طاف بي فيها خيالي حسستها = نعيماً على قلبي وقرت بصايري
مرابي المها وأرض البها والذي بهــــا = غزال على شوفه نسوق البشايري
طبيعية الأخلاق والخلق كلـــــــــما = يبان البها تظفي علية الخمايري
تجيد الهوى بأربع وتسعين لهجة = أفانين يجهلها قليل الخبايري
حياوية من كل ما كان مخجــــــــلاً = نجيلاً على من راد منها برايري
ألا يا عنا قلبي ويا كثر لوعـــــــتي = ويا حر أشواقي لتلك الحواجري
عيونٍ عيون السحر فيها وحـــولها = وعنقٍ طويل كاسيته الظفايري
وصدر لها عال على هافي الحـــشا = ونبا عن خواصرها رفيع الحصايري
إذا أدبرت تمشي ويهتز عودهـــــا = تذوب القلوب وتستفز الضمايري
وإذا اقبلت تفرح قلوب حـــزينة = بحكم الهوى يركع لها كل طايري
أقدم لها قلبي وروحي هديــــــــة = عسى تقبله مني خيار التجايري
ألا يا سنا يا أم المنى غاية الهــــــنا = ألا تذكرين مولعٍ فيك حايري
ذكرتك وأنا في مصر والكل سابحاً = بغبة غرام المترفات النضايري
فتىً فاتني عمري وأنا ما عرفتــــهم = وأنا قبلهم في عفة الحب سايري
حدوني وحدُوني وحديت جمعهم = ورمت النجاه وعارضتني عثايري
استبشروا حالي وبالي لغيرهـــــم = لا فقت من سكرتهم أذكر ذكايري
وزادوا علي وسادتي عامل الهــوى = وأيست من روحي وهلت عبايري
متي طاف بي هاجوس طيف من الهوى = ذكرت الغزال اللي عن الناس ذايري
يجي دونها القناص ما نال نولهــــا = يذوق الحفا من دونها والعزايري
مداهيلها كوٍد على من يريدهـــــــا = مداهيلها روس الجبال الوعايري
بعيدٍ عن السرحان والنمر والفــهد = وعن الأسود وناقلين الذخايري
ألا يا بعد غيدٍ غديدٍٍ غدابهـــــــــــن = ظلام الجهل فالليل والنور غايري
أدوات سمار وتسلات خــــــــــــاطرٍ = وتضييع وقت مكثرين الخسايري
رفاقي يشوفون الحلا والملــــــــذة = بمصر وأنا أشوف العنا والنكايري
بلاد بها كثر التماثيل عـــــــــــــــــبرة = أشباح بغير أرواح يا ذا العبايري
إذا صار لا دنيا ولا دين عــــــــــــندهم = سوى الزور والبهتان والحكم جايري
فلا خير في دار رخاها حـــــــــــــرامها = وتخسى رجالٍ ما تصون الحرايري
خراب وشراب وزاد والحلف بالنبــي = على الشرك بانين قصور وعمايري
عسى الله يديم أمجادنا في بــــــلادنا = وعسى الله يبور بملزمه كل بايري
ترانا العرب وأصل العرب قمة العـــــــــرب = أصحاب الوفا وأهل السيوف الشطايري
لنا الفضل فالدنيا وفالدين والأصــــــــــــل = هل الهمٌه العليا إلى صـــار صايري
جبلنا على الأخلاق والدين والهــــــــدى = وحكامنا مثل الجبال العــــسايري
يعزون مظلوم ويردون ظــــــــــــــالم = ويعطون مٍحتاج ويهــــدون زايري
يعينون مكسور إذا ما التــــــــجا بهم = فكم واحدٍ صاروا لعظمه جــــبايري
عسى الله يعز أهل النفوس العـــــزيزة = ويضفي على خلاتٌهم بالســـتايري
أنا فرد عادي ٍولي بس فـــــــــــــكرة = أبا أقولها لو كان تقلع ودايـــــــري
أعبُر ولا أدبر سوا دبرة الــــــــــــولي = ولا نيب سياسي ٍولا نيب ثايري
أخاف الخطا وأرجي العطا من راع العطا = جزيل العطا عالم خفي السرايري
فيا رب سامحني وبدٌل خطيـــٌــــتي = بحسناك يا عافي عن أم الكبايري
= : (( مرثيته في جلالة الملك / فيصل بن عبدالعزيز اّل سعود )) : =
وهذه مرثية الشاعر الكبير / عبدالله بن غصن اّل علي السبيعي بالملك / فيصل بن عبدالعزيز اّل سعود رحمهم الله تعالى وأسكنهم فسيح جناته وقد رثى الشاعر جلالة الملك / فيصل وتوفي بعده بزمن يسير عدة أشهر غفر الله لهم :
الأيـام حبلـى والزمـان ولــود= بأحـداث ما يعـرف لهـن حـدود
والإنسان مهما كان قدره من المـلا= ماله عن لقـاء رب العبـاد صـدود
والأقدار مكتوبه على سايـر البشـر= ومخلابهـا للخيـريـن صـيـود
يا حظ من ياخذ من الوقت عبرتـه= قبـل يعتبربـه ماجـد ملـهـود
ومن ياخذ العبره تخفـف مصايبـة=ويزود مع كثر الحـوادث جـود
عسانا من اللي لا تحنهـم زمانهـم= يزيدهم جـور الزمـان صمـود
جسور مع البلوى برور مع الرجاء= مصابيـح لازاد الظـلام تـزود
فلا يقدر البلـوى لياجـل خطبهـا= إلاصابر صلـب الفـواد جلـود
صبرنا على ما صابنا في عزيزنـا= عزيز عجزنا عـن كمـاه جحـود
صبرنا ولولا الصبر ماطال عزنـا= ولولا التحمـل مـانقـود جنـود
ليت المنيـة جنبـت راس فيصـل= وخذت من سواد الناس بيض وسود
خذت كل نذلل وكل سقط وخايـب= تخص الذي مامـن وجـودة زود
ليتـة بقـى عشريـن عـام يقودنـا= للمجـد حتـى نبلـغ المقـصـود
يهز السياسة ليـن يفحـم رجالهـا= ويجـي لنا بيـن الوجـود وجـود
منه احترمنا الشرق والغرب هابنـا= وعالم أوروبـا يرسلـون وفـود
هذا يبي حكمـة وهـذاك معرفـه= وهـذا يبـي خبـره وذاك نقـود
ناس يودعهـم ونـاس يجـون لـه= ونـاس يوخرهـم بربـط وعـود
يردون عد عادتـه يـروي العـرب= عـد العـدود العيلـم الـمـارود
يعطي صديقة جل مالـه وحكمتـه= ويكسر قناة اللي يجـي بـه زود
حضب حجوجـي حكيـم عـارف= صلـف صمـوت صـارم نقـود
حكيم حليم مستقيـم علـى الهـدى= عزوف عطـوف للضعيـف ودود
عليم سليم القلب والنطـق والعمـل= زعيم عديـم فـي رجـال الكـود
وحيد فريـد فـي زمانـة ودولتـه= ولا أظن الزمان باللي كماة يجـود
فقدناه فـي وقتـه وحنـا بحاجتـه= الجـو كاتـم والليـالـي ســود
فقدناه مـن سبـة غريـر طايـش= نسي الوصل والرحمة وبر العود
نحسب عدو الدار من غيـر أهلهـا= وأثر عدو الـدار صلـب جـدود
لا سامـح الله فيصـل بـن مساعـد= أثـره عــدو غــادر الــدود
فجعنـا وروعنـا وكـدر حياتـنـا= وتبدلـت حـال النعيـم نـكـود
على فيصل الأسلام هلـت دموعنـا= وخيم علـى كـل البـلاد جمـود
يبكي على فيصل شبـاب وشايـب= يبكي ولو قلبـه صخـر جلمـود
يا حسرتـي يامـا بكـاه مـن أبلـج= رجـال كـود طيبـيـن ســدود
وياما بكـا مـن كاعـب مصيونـه= حمـام دوح صاعـه المـقـرود
عيونـهـن بدموعـهـن همـالـه= حمر حدقهن عقب ماهـن سـود
هـذا وكلـن فـي ذهـول وريبـه= وكبر المصيبه من غـلى المفقـود
إلا وخـالـد للجمـيـع يـنــادي= وصوتـه لحـر فالكبـود بـرود
نهض وقـال الحمـل أنـا شيالـة= وتمت له البيعـة مـن ال سعـود
وجينـا وبـا يعنـا ملكنـا خـالـد= بقصر الحكم في يومـه المشهـود
جينـا نبايـع بـالـولا والطـاعـة= ما يكفـي الوالـد عـن المولـود
عاش الملك خالد وعاشـوا اخوانـة= عاشـوا ذخيرتنـا عيـال العـود
عاشوا وعاش الشعب في ظل حكمهم= رغم انـف كـل مكابـر وحقـود
متكاتفيـن وكـل منهـم فيـصـل= وعدوهم فـي نـون عينـة عـود
يا نصـرة الإسـلام يـا أولاد مقـرن= يا نـور نجـد وعزهـا المنشـود
لا تتركون الجرح يكبـر وينفجـر= ترى كل شي لـه مـدى وحـدود
ما فـاح قـدر إلا ولــة وشـايـة= ولا مـن لهيـب إلا ولـه وقــود
تعاونـوا وامشـوا بـعـز وقــوه= ولا يصير ذا عاري وذا مشـدود
خلوا عدو الـدار يصغـر ويندحـر= ويدري إن في وسط العرين أسود
هـذا كـلام اللـي يهمـه شانكـم= هديـة مـا بغـي لهـا مـردود
= : (( قصيدته في خادم الحرمين الملك / عبدالله بن عبدالعزيز حفظه الله ورعاه )) : =
وهذه قصيدة شاعر الحرس الوطني الشيخ الشاعر الكبير / عبدالله بن غصن اّل علي السبيعي رحمه الله وكان شاعر للحرس قبل شاعر الوطن الشاعر الكبير / خلف بن هذال العتيبي في خادم الحرمين الملك / عبدالله بن عبدالعزيز اّل سعود حفظه الله ورعاه في أحد زياراته لهم في الحرس الوطني عندما كان جلالته نائبا ثانيا لرئيس مجلس الوزراء ورئيسا للحرس الوطني العربي السعوي ويقول فيها :
سـلام يا شـيـخ بــدا بالطـيـب = والطيب من مثلـك ما هـوب غريـب
غريب عليك الدون وشلون يلحقـك = وأنـت الأصيـل العالـي النجـيـب
نجيب النجيب من النجيبة اللي أنجبت = فـذٍّ عـريـب الـجـدود عـريـب
عريب من الجديـن خـالٍ ومنسـب = نـورٍ علـى نـور يكـون عجيـب
عجيبٍ يا بدر الدجـى مرهـق العـدا = صـاروخٍ أطلـس والحديـد صليـب
صليب راس و باسه أقوى من الحجر = ومن هيبتـه منـه الرجـال تهيـب
تهيب مـن باسـه صناديـد العـدا = وإلا على الصاحـب حـلا وحليـب
حليبٍ على الصاحب ومرٍ على العدو = ضـد البعـيـد وعــزٍ للقـريـب
قريب الندا رجل الهدى غالـي الفـدا = طبيبهـا لا عمـس كــل طبـيـب
طبيـبٍ يعالجهـا بعـلـم وحكـمـة = واللـي يعالجـه الطبيـب يطـيـب
يطيب عبـد الله وحنـا نطيـب لـه = جندٍ علـى الأمـر السريـع نجيـب
نجيب لا جانا أمركـم فـي لزومكـم = ولا خير في اللي فـي اللـزوم يغيـب
يغيـب الـردا عنّـا ويبيـن طيبنـا = لا بـان مـن ورى الحـدود حريـب
حريـبٍ يريـد الـدار وإلا يريدكـم = وإلا يسـوي فـي البلـد تخـريـب
تخريـب داره قبـل ياصـل لدارنـا = حـقٍ علينـا والفـعـول نصـيـب
نصيب الهدف لا من قصدناه بالتلـف = وعلـى الرمايـه ما نبـي تـدريـب
تدريبنا جـاء مـن طبيعـة بلادنـا = مثل ما تـدرب فـي الظـلام الذيـب
الذيـب عبـد الله وحـنـا عيـالـه = جنـدي ونايـب والعريـف رقيـب
رقيبنـا عنـد المهـمـات أميـرنـا = يحسـنـا بالضـبـط والتوظـيـب
توظيبنـا فـي كـل شـانٍ يهمـنـا = وأنا أشهد إنه فـي الكـلام مصيـب
مصيبٍ على راي البطل ريّس الحرس = أبـو مرحبـا حـلاّل كـل صعيـب
صعيبات الأريا حين ينـوي يحلهـا = ينحـل محكمهـا لـو كـان قطيـب
قطيب المعاني باني القـاف صاغهـا = وختامهـا صلّـوا علـى الحبـيـب
وقال الشيخ الشاعر الكبير / عبدالله بن غصن اّل علي السبيعي هذه القصيدة في التوجد :
يا والله اللي شدوا البدو يا بداح
= شدوا وأنا يا أخوك ما لي مراحي
من عقبهم يا بداح ما ني بمرتاح
= الله لا يقبل سواد المراحي
يا ضيقة (ن) فالصدر ما عاد تنزاح
= ولا عاد يمحاها من الصدر ماحي
يا بداح دور لي طبيب (ن) وجرّاح
= اللي بخيص بضيقتي وانشراحي
أبـنــدبـك يــــا بــداح ما ني بمـــزاح
= كـانك رفيق لي من القلب صاحي
حطيت لي من ضيقة الصدر مسباح
= وأوميت به حتى تقطع وطاحي
وأثره خرز ما ينفع القلب لو لاح
= لا شك بعض الناس ما هو بصاحي
أنـــا هوى بالي سواليف وامـــزاح
= ومجالس فيها أشقر البن فاحـــــي
شفي بني عمي مروين الأرماح
= بني عمر لا قل هرج المزاحي
من أول (ن) لا أصبحت أنا جيت سراح
= أشوف غزلان المها بالبطاحي
واليوم ما عندي سوى كل فلاح
= سود العبيّد اللي تشيل المساحي
منقول وأنتم سالمون وغانمون والسلام .
غير متصل
الشاعر الشيخ / عبدالله بن غصن اّل علي السبيعي رحمه الله
