ملحمة الشاعر / محمد بن مقعد السوده السبيعي

[سعود القويزاني]

بسم الله الرحمن الرحيم

هذه ملحمة الشاعر الشاب / محمد بن مقعد السوده السبيعي :

بسم الكريم اللي عليه اتكالي
= الواحد الوهاب رب الجلالي

الدايم اللي ما يجيه الزوالي
= إلهنا المعبود ملاك الأكوان

أبدى قصيدي وأجتهد بالتواصيف
= أوصاف حق (ن) ما لحقها تخاريف

في اللابة اللي مجدها سنه السيف
= إعيال عامر لا حمى الوقت شجعان

إعيال عامر عزهم فايق الناس
= فوق النجوم وهيبته ترفع الراس

شامخ ولا هزه صعاليك وأنجاس
= عليا هوازن من ضنا قيس عيلان

ربعي هل الطوله ليا عكر الجو
= منهم زحازيح العرب ما تسجّو

من باس ربعي روس الأقوام هجّوا
= يا معاند السبعان لا شك خسران

وياللي تبي تفصيل ببدى بتفصيل
= هاك الوصوف وحلل الوصف تحليل

أربع بطون وكلبوهم حلاحيل
= نالوا الفخر وافي ولا فيه نقصان

منهم زكور (ن) بالوغى تكسر الحوم
= منهو سمع طرياهم يقول معلوم

هذول ربع الطيب والمرجله دوم
= أهل الكرم والجود والسيف شامان

والعامري بالطيب لا ما نسيناه
= وسهيل معروف (ن) وصعب نتعداه

العامري ما خاب منهو ترجاه
= بالطيب جايد دون شكر (ن) وعرفان

ويمنى بني عْـمرْ بالفخر تعتلي فوق
= كم فارس (ن) من ضربهم صابه العوق

والجار له في سلمهم دايم حقوق
= يبقى بطول الوقت شامخ ولا هان

وذولا بني عْـمير الوفا والمروات
= أهل الفعايل والسيوف الصقيلات

رجالهم ما هاب نطح الصعيبات
= ينطح شعيب الموت لو كان مليان

وتحت البطون أذكر وصايف قبايل
= منهم زحول المجد تشكي الهوايل

سادوا بنجد الطيب بأروع فعايل
= هذا كلام الحق ما هوب بهتان

من الزكور أذكر عيال القريشي
= عدوهم يمسي بقلبه خريشي

كم شيخ قوم (ن) راح راسه طشيشي
= من فعلهم لا من غشا الجو دخان

وعيال ثور العز ربع الجزيلات
= أهل الكرم والجود وأهل الحميات

رجالهم يثبت ثبات السراوات
= من القرامه لا حمى الوقت سكران

أيضا ولا أنسى بالفخر لابة سويد
= صنديدهم ينطح ثلاثين صنديد

يوم المعارك عندهم كنه العيد
= ووقت الرخا للجود عز (ن) وعنوان

وخيالة الشرفا عيال الحميدي
= عزومهم صلبة سواة الحديدي

الوصف فيهم بالمزايا فريدي
= طيب المزايا عمت طيور حوران

وجود الشماسي بالمدى فايق الحد
= فالعد يتعب راعي العد بالعد

ضد المعادي عزمهم كنه السد
= عاداتهم للطيب والبذل نيشان

ألف ونعم مليون صيت الرويبي
= كم فارس (ن) ضرغام منهم عطيبي

في جنبهم يا من جناب الغريبي
= ويبدل الضيقه بسعد (ن) وسلوان

وفريعني بالطيب وافي المزايا
= أهل الكرم والجود وأهل العطايا

رجالهم ينطح سهوم المنايا
= لا جيت بأوصفهم كما الذيب سرحان

ومجمَعي راع الصفات الحميده
= في الطيب والنوماس يا جيد جيده

في ساحة الأجواد عالي رصيده
= وعدوهم ما نال يا كود خذلان

وياللي تبي الخوه هذول المراغين
= ربع (ن) على مر الزمن دوم صلفين

بغالي الأثمان للجود شارين
= طبع الفتى فيهم ولو مات ما خان

وأهل الوفا وقت الشدايد ليا جن
= ناس (ن) تسن الطيب في دربها سن

رجالهم لا من فزع ما رجع من
= أهل الحميه والوفا دوم وزران

والطيب ما ينقص جموع الجهومي
= الغالبين الراجحين القرومي

رجالهم بالهوش يقضي اللزومي
= وصف الفتى فيهم كما طير شيهان

وملوح مثل الضلع بالعز راسين
= وافين لا جاء اللين بالطيب وافين

ووقت القسا والجور لا شك قاسين
= ما يخلفون الظن لو كان ما كان

ذول الزكور وتم وصفي وقولي
= والدور للي بالمواقف بطولي

العامري للمجد دايم يطولي
= ما فيه مثله بالشدايد كحيلان

منهم عيادين (ن) على الهوش ضارين
= ويا كنهم للطيب ربع (ن) موالين

ما فيه بين الناس مثل العيادين
= في جودهم يلفون بأصناف والوان

وأهل الكرم والجود لو هو كليفي
= رجالهم بالطيب ما له وصيفي

عدوهم يمسي بقلبه رجيفي
= دوم ونعم مليون بعيال صيفان

وأهل المراجل والكرامه بني حْـميد
= رصيدهم بالطيب من دون تحديد

ناس (ن) على حوض المنايا مواريد
= والخوف عن رجالهم دوم شتان

وقواوده للطيب والبذل نوماس
= رجالهم معروف بالجود والباس

والساس يا طيبه يالأجواد من ساس
= ساس الوفاء ساس الرجوله والإحسان

وخيالة الهدلا نهار التحدي
= عزومهم فوق العوالي تعدي

واللي تحداهم عزومه تهدي
= ذا بالعَجم لا من زعل كنـْـه طوفان

والطيب بالقدعا يفوق الوصايف
= وقت الوغى كم فرقوا من ولايف

وعند الشدايد هم ذرا كل خايف
= امشيدين المجد ثابت بالأركان

وابن الضعيفي بالمواجيب كامل
= طبع الفتي فيهم على المجد صامل

وفي الطيب منهاجه ليا من تعامل
= ووقت المعارك يشعل الجو نيران

والطيب كله والمراجل بني عْمـر
= ناس (ن) تحوش المجد في كل مضمر

ورجالهم منصور لا من تشمّـر
= في حزة الشدات والنايبه بان

منهم جبور (ن) يعشقون العوالي
= ما فيهم اللي مركبه بالتوالي

وإن كان نرجع للسنين الخوالي
= لا ثارت الهيجا فلا شك ظفران

ويا حي صيت الطيب صيت المديري
= رجالهم ضربه بسيف (ن) شطيري

كم شيخ قوم (ن) عقب عزه كسيري
= حظه رماه الشين في وسط بركان

وطاري العزيزي لا ذكر طاري الذيب
= هَـل الوفاء والجود وأهل المواجيب

عدوهم مطواع غصب (ن) بلا طيب
= يرجح فخرهم لا تقارن بميزان

وإن كان تبغى المجد دوك العرينات
= رجالهم يحتال شيل الثقيلات

مرقاه دايم فوق روس الطويلات
= طبع الفتى فيهم يجي عالي الشان

وخيالة العشوا وسقم المعادين
= ريف الكرم والطيب قوم الجمالين

في حزة الهيات مثل المجانين
= يا كنّـهم للموت ربعن وخلان

ومليح تلقى الجود والبذل بمليح
= اللي لهم في ساحة المجد ترجيح

ناس (ن) تحوش الطيب حوش الزحازيح
= وتارد على حوض الفخر ورد ظميان

وصيت الفخر والعز صيت الصميلي
= في فزعته لا شك ما له مثيلي

لو كان ما يملك يا كود القليلي
= ما يحسبون المال ذربين الأيمان

وابن العلي بالطيب كامل ووافي
= لا من نخي لا هو كريم (ن) سنافي

وفعل العلي بالكون ما هو بخافي
= ضرب الفتى فيهم يجي بين حجان

وصيت النبيطي بالفخر ما له أشباه
= طبعه يجي فوق السحب دوم مرقاه

أهل الكرم والسيف لا حل مدعاه
= نالوا الفخر والعز في كل ميدان

والمجد والنوماس تاجه بني عْـمير
= والوصف فيهم والمعاني تجي غير

من ضربهم كم شبّعوا حايم الطير
= وفي حزة المدات بلعون كرمان

منهم نديم الجود راع الجزايل
= مفيلحي طايل على كل طايل

في صفحة التاريخ تكتب مثايل
= للي كرمهم وافي (ن) دون نكران

والصندلي ناخيه يبشر بفزعه
= ويا سعد منهو باللقا ذول ربعه

سمعة كرمهم والوفاء طيب سمعه
= منهاجهم ثابت على مر الأزمان

والمكحلي يا زين طاريه زيناه
= مثل القصر شامخ على الدوم مبناه

دوم ونعم تنقال لا حل طرياه
= وفي حزة الأكوان ما هم بذلان

والمشعبي راع العوالي على طول
= وياللي نشدت اتقول هاذول وش ذول

ذول الفتى فيهم إذا ضاق مسطول
= من القرامه لا قفل كنْه شيطان

وهذي قبايل في ذراها حمايل
= غير الفخايذ والأسر والعوايل

ذولا هل الغلباء ونعم السلايل
= تشهد لهم قبل الأصاحيب عدوان

حنا سبيع اللي نطوّع عدانا
= ونفزع لمنهو بالشدايد لفانا

وحنا سبيع اللي بعيد (ن) مدانا
= لنا بدرب المجد مسهم وسلطان

فقيرنا كنـّه ملك مال قارون
= يعطي ولو حاله تجي دون في دون

أَجل هل الأموال بالجود وشلون
= ناس (ن) عطاياهم كما هل ودان

أهل الكرم والجود صبيان غلبا
= خذنا المكارم والتنوماس غصبا

كم راس شيخ (ن) لا زعلنا تدربا
= لا من تعزوينا فلا شك فرسان

هذا ولا أنكر بالجزيره قبيله
= كل (ن) خذا عند المراجل حصيله

أوصافهم بالطيب ما هي قليله
= نالوا الفخر وافي ولا فيه جحدان

حنا الحرار الساميه والشهيره
= عند الوغى حنا السيوف الشطيره

وكل القبايل درع يحمي الجزيره
= ولا تاقف السيسان من دون عمدان

هذا وصلوا عدّ دورات الأيام
= وعدّ البشر وإعداد ما طاير (ن) حام

على الذي بالطيب هو خير الأقوام
= على النبي الهاشمي نسل عدنان

صح لسان الشاعر الشاب / محمد بن مقعد السوده السبيعي وأنتم سالمون وغانمون والسلام .

[خيَّال الغلباء]

أخي الكريم / سعود القويزاني السلام عليكم ورحمة الله وبركاته وبعد : شكرا جزيلا لك على القصيدة وصح لسان الشاعر الكبير / محمد بن مقعد السودة السبيعي علما أن القصيدة موجودة في منتدى الشعر النبطي هذا وتقبل فائق الشكر والإمتنان مقرونا بجزيل المحبة والإحترام مع أطيب الأمنيات واسلم وسلم والسلام .

http://www.sobe3.com/vb/showthread.p...C7%E1%E3%CC%CF

[سعود القويزاني]

انا عطانيها ولد عم الشاعر وقال نزلها في منتدى سبيع ولا كان عندي علم انها موجوده وان بغيت تحذف احذفه لانه موضوع مكرر والله لا يهينك
سعود القويزاني القباني الشماسي السبيعي

[فهد أبــــوثنين]

صح الله لسان الشاعر/محمد بن مقعد السبيعي

وماقصرت

تقبل مروري

[كليب]

صح لسان الشاعر / محمد بن مقعد السويدي السبيعي وبيض الله وجهه على هالملحمة الرائعة مع أطيب أمنياتي وخالص تحياتي .

[عواكيس]

صح لسان محمد بن مقعد

[ابن جعوان]

:أخي: سعود القويزاني : بارك الله فيك :

صح السااان الشاعر
وبيض الله وجهك ماقصرت طال عمرك
اصفقلك على نقل القصيدة الراااائعه

تستاهل
تقبل مروري لاهنت

أخـوك

أبن جعوان

[منسم الحفيات]

صح لسانك يا أبو مقعد

[صامل الميقاف]

مشكور وما قصرت والله لا يهينك

[خيّال العرفا]

مشكور وما قصرت والله لا يهينك