استراحة المنتدىالطرائف والنكت والتسلية والفكاهة المقبولة والنكت البريئة حيث ينشر فيه أطرف المواقف و أغرب السوالف التي لا تخدش الحياء ولا تعارض أدب مجالس سبيع الغلباء
: في ذاك اليوم البعيد . وأنا ماشي بسيارتي الهايلكس.. ومشغل المساحات مع شريط فهد بن سعيد الله يرحمه ويرحم اموات المسلمين بين البيوت الطين في حارتنا
وكنت فرحان جدا بالستاره السودا في القزازه الخلفيه واللي مكتوب عليها (وحيد الجزيره) يعني ابي اسوي إني واحد عربجي .
ومن الفضاوه ماخليت جدار في الحاره إلا وقريت وش. مكتوب عليه.. ولا شايب الا وروعته بجلنط .. ولا ورعان الا وفقعت كورتهم ... وإن خذو كورتهم خربت (القده) واللي مايعرف القده يسأل واحد من أهل الخرمه عنها ..!!
وفجأه طلع قدامي بس (هر) .. وشكله كان بايعها .. فانعفطت بالسياره متجهاً له .. وإذا بتلك العنز المسرحه في وجه الموتر .. مما أدى إلى اعلان حالات الإستنفار داخل مقصوره الهايلكس المظلل .. !!
فاليدين وحده مابين الجلنط والقير .. والأخرى متعقله في الدريكسون .. أما الرجلين فيخلف الله وحده من الكلدش إلى الفرامل .. والثانيه جتها النفاضه يوم قربت عند العنز .. !!
المهم كان أغمض عيوني .. وقلت خلاص راحت فيها هالضعيفه .. وما دريت ألا وأنا صاقعن ذاك الجدار .. وماحسيت إلا خشتي لازقه في القزاز القدامي .. والسعابيل صايره اربع اربع ... .. !!
أما حاله الموتر .. فكان شكله وكأنه في عناق حار مع جدار بيت واحد من اهل الحاره .. !!
المهم وبعد أن هدأت الروعه .. نزلت أبي أشوف وش صار .. !!
وانا أقول في نفسي :
مكانه كذا زين .. لأنه لو ينطلق علي هذا الشويب .. والله ما اعاين خير .. .. !!
المهم وما دريت ألا وهالشويب فاتح دريشة المجلس وطلع منها ..!!
وكان لابس وزره كاروهات .. وزنوبه خضرا من النوع اللي لاشافتها البريعصيات والصراصير تنصرع .. وفنيله نص كم ماركة البقره المنقطه .. وطاقيه مشخله من النوع اللي مايحتاج غسل .. لأنها لو غسلوها على طول تتقطع .. .. !!
المهم أول ما وصل هالشويب طمر فوق كبوت موتري .. ونزل من هناك على رقبتي .. والله ياعليه يـد بعد تقول زراديــه .. !!
وشوي إلا وهو يصرخ في وجهي ذيك الصرخه ويقول :
أنتم متى الله يخلصنا منكم ومن أشكالكم يادشير القوايل .. (يحسبني داشر الله يهديه) الحين وش ذنب عنزي اللي ماتت .. وبيتي إللي غيرت معالمه .. !!
قلت :
ياعم الحين همتك العنز ولا همك بيتك المنعفط ، وبعدين ياخي كله من القطو ،قال وشوهوا قالت ((البسه)) والله انا ماتعمدت .
وكان يرعد ويزبد والشرر يتطاير من عينيه .. وبدا وهو منفعل يبخ علي من فمه الكريم ولا بخاخ ابو عشره ريال .. وذلك لبعض العيوب في مخارج الحروف بفعل الزمن (الله يحسن خاتمتنا) .. !!
إلى درجة إني حسيت وكأني مسوى تنظيف بشره عند حلاق .. وذلك من كثر ما أمسح وجهي بيدي .. .. !!
المهم ومع هذا الصراخ والفوضى إللي سواها هالشويب .. أجتمع أهل الحاره .. وكذلك جاءت أفواج من جميع الحواري المجاوره .. ليشهدو هذا الحدث العظيم المؤثر في مسيرة حارتنا .. !!
فقلت وانا انظر إلى تلك الأفواج ..
واحاول أن اتذكر أنا اصطبحت بوجه مين :
يابو بكش عز الله أنك تورطت ورحت فيها .. وما يبغالها إلا خطة للفركه والنحشه ثم الشرده .. !!
( أصلي أنا من الناس إللي تؤمن بهذه الحكمة : الشرده نصف المرجله )
المهم فكرت ثم فكرت ثم فكرت .. كيف اتخلص من هالورطه .. وفجئة ولعت لمبه فوق راسي .. وجاءت لي هالفكرة الرهيبة .. !!
فألتفت على هالشويب إللي حاس الدنيا وقلت له :
أسمع ياشايب أنا بشرح لك الحادث كيف صار هاللي أنت شايف .. وبعدين أنت أحكم وهالناس المرتزقه خلهم بعد يشهدون على هالكلام .. !!
فقال بزعل والشرر يطير من عيونه .. أنت لك وجه تبي تتكلم بعد .. !!
فقلت أنت اصبر اشوي واسمع عذري :
أنا طال عمرك كنت مسوي بثوبي كذا وانا أسوق ( وأسحب طرف ثوبي من تحت وأحطه في فمي ) وصرت أتكلم بنص فم (يعني على جنب) ..
وبعدين يوم كنت اسوق طال عمرك كنت مفصخ نعالي .. زي كذا (واسحب نعالي وأحط كل وحده في مخباة) .. !!
وبعدين الشماغ أصلاً كانت مربوطه كذا ( وألفها على الراس زين ) تحسباً لأي حصاة منطلقه من الخلف مستقبلاً ..!!
وبعدين كنت ماشي بسرعه زي كذا ( وأنطلق كالسهم المنهبل ) واركز سايقي يعني شغلت البخاخات واعدي .. ولا عاد يشوفوني من غبار هالكراعين .. .. !!
هذي احدى مغامراتي ايام الزحف .
ههههههههههههههههههههه. اي شايب المسكين والله العنز الي راحت فيها لا والي قاهرني البس ماجاه شي مدري وش قصتي مع البساس . مشكور اخوي البارع 2000 . على مرورك وردك الجميل .
غير متصل
