موتي برمشك والعيون المخادير

[جزل العطايا]

يا راعي الرمش البهيم ألمضلـي=موتي برمشك والعيون المخاديـر
لا تذبح القلـب المهيـم المولـي=بعدك يشق أقصى خفوق الأسارير
ربطت قلبي ربطـةٍ مـا تحلـي=وشديتها لين أحكمـن المساميـر
ما مجت عن رمانة القلـب ملـي=حبك سمر رمانة القلـب تسميـر
وقام أيتوزع في خلا يـاي كلـي=دمي يضخـه للخلايـا شخاتيـر
عز الله انـك فالضميـر متعلـي=منزلـك روضٍ فايـع بالنواويـر
ليه الجفا يا مهجة الـروح قلـي=نهجك يخالف نهج كل الدساتيـر
اللي بدالي منك ما هـوب تغلـي=ما هوب كذا والله تغـل الغناديـر
يا ترفة الخفرات قربك دون لـي=وبعدك على قلبي عذاب وجثامير
أدخل على الله منك كلٍ فطن لـي=وجهي ويلحقني علوم ومخاسيـر
حتى وأنا خلف الإمام المصلـي=تروح لك صدار قلبـي مساييـر
يا جعل ذنبي مـن رقبتـك يتلـي=في يوم ما تنفعك فيـه المعاذيـر
كأنك تحسب الودّ ضحك وتسلـي=شهادتك راسب وفيهـا دواويـر

منقوووول

[خالد الشماسي]

كأنك تحسب الودّ ضحك وتسلـي
شهادتك راسب وفيهـا دواويـر



رائع يا جزل العطايا


قصيدة جزلة نشكرك على نقلها



ولك اطيب تحية

[جزل العطايا]

مرحبا والله يابو عمر ولاهنت على المرور الطيب نورت صفحتنا ياكحيلان

[المفالحه]

اخوي الغالي جزل العطايا يعطيك الف عافيه على النقل الرااااااائع

اخوي الغالي احسدك على رقة وارتفاع الذوق الله قصيده كل بيت يقول الزود عندي

والله لايهينك لاتحرمنا من مثل هالمواضيع

وتبي الصراحه هذي افضل قصيده غزليه قريتها او سمعتها الى الآن والله على مااقول شهيد

اخوب ممكن طلب : ابي اسم الشاعر لو سمحت

وفي الأخير تقبل تحياتي

[جزل العطايا]

يا مرحبا والله بالمفالحه مرورك يسعدني ويزيد من عطائي لهذا المنتدى الشامخ دمت على خير ومحبه