بسم الله الرحمن الرحيم
إخواني ,
أسعد الله مسائكم جميعآ وأدعوا الله أن يحفظ لنا قادتنا وأمننا وينصرنا على من عادانا ويجمع كلمتنا على الحق ويرحم أبائنا وأجدادنا ويشفي مريضنا ويسعد حينا ويثبتنا على دينه آمين آمين .
يقول الشاعر / عبيد بن سعود بن جفال العزه السبيعي رحمه الله وأسكنة فسيح جناتة
يالله يا علام خافي وما كان=ياصافطٍ عبدك ومن الخير تعطيه
بطلب اللي سامكن سبع الأركان=سبع ٍبسطها الله بامره يسويه
الدين نور وطاعة الرب برهان=والصدق ينزل عالي الخلد راعيه
سميت بأسم الله من كل شيطان=يدلنا للرشد وابليس يغويه
ولا طاح وسم الوبل في كل الأوطان=وكلن تنوى يم غالي شهاويه
يا محمد قربه مع الصبح لا بان=ممتاز توه واردٍ من مسويه
سواقه شاطرٍ هود رحمان=بالحظ والتوفيق والرب هاديه
دنّه لنا بنتجه يم هدلان=بني عمر والاد عامر بنو فيه
جعل الحيا لامن نشى الوسم ودان=يروي جباه وينحدر في مناديه
يروي الحفر والنفد مدهال ظفران=ويطمن على الصمان يملي خباريه
ولا زاف نور الروض زبيدي ومكنان=والله ما غبط اللي يصرف ربابيه
تنزل بخلفات بها ضوار حيران=حليبها للضيف واللي يخاويه
ومروبعات كنها وصف حيطان=يفرح بها اللي بارد الليل حاديه
يلقى بها بنٍ وهيلٍ برسلان=والزعفران وطيّب العوُد نشريه
ونجرٍ بوزن أسنافي ريف ضيفان=حسه يشادي اللي ضلوعه تلاحيه
يقنب قنيب الذيب لا صار جيعان=ولا كما حس الرعد في مناشيه
صوته ينادي كل قرم ٍوطربان=يشتاق له منهو على البعد يوحيه
لصياني ٍ قلط بها أفطح الضان=قولت هلا بالضيف واللي يداليه
ومرباعنا بين الردايف وساقان=مدهال ربعي دايم ٍما نخليه
بني عمر لا شب للحرب نيشان=سقم الحريب ويل منهي تعاديه
وليا تنكر بالعهد خاين ٍخان=مالوا عليه ومن دياره تجليه
قفى معيف ونارمن ضرب الإيمان=وعاف الوطن ومنول ٍكان مغليه
حماي بيض ٍللحباري بسلطان=خلا البيوت مثومنات ٍمبانيه
وقفى من الديره معيف ٍوزعلان=يبغى المنار وساحل السيف حاديه
ذا فعلنا في صاحب الشيخ وبدان=ما قدر الصحبة وربي دعا فيه
ولاولاد عامر في اللقا موقف ٍبان=ارواحهم في الحرب للموت تهديه
بني عمر ولادعامر للأوطان=ذباحتن للروم تذهب تواليه
يوم جوهم العسكر مع وقت الآذان=تضرب مزامير تبي البوش تشعيه
هم أظهر الباشا من الجمع حصان=جاه العذيبي كنه النجم هاويه
جاه القطامي صامل ٍطير حاران=صوايده للخرب تفري ثناديه
أهوى عليه بهيلع ٍقض الأمتان=بسيف ماصن في الملاقي يحنيه
كدوا عليهم والهنادي في الايمان=بحدب ٍتعزل الراس من متن راعيه
في ساعة ٍيطرب لها كل ديقان=بالنصر والناموس من عند واليه
هاذي عوايدنا على طول الأزمان=عدونا ما عاد يرجع لغاليه
يرمى عشى للطير والذيب سرحان=والضبعة العرجى تقفي بتاليه
هذا كلام عـبـيـد ما فيه بهتان=مرسوم في التاريخ محد ٍ بناسيه
وشهودنا اللي فيه شيب ٍوشبان=بمجلد ٍ مثبوت ومختم ٍفيه
وصلاة ربي عد همال الأمزان=على النبي واللي على الدين يتليه
هدلان : رماح لكثرة الماء
حماي بيض للحباري : أبن عريعر
العذيبي : من بني عامر
ويقول في قصيده أخرى :
مرباعنا حد الدكاك الشمالي=من بين صلب محقبه والغثامير
ولا ذكر وسمي في الوبل مالي=تنزله سبعان ٍبشعل المغاتير
نقطف زماليق الزهر ما نبالي=جوس ٍعلى شمر مع حرب ومطير
وليا بدى السبار في راس عالي=جنه سريعات الفرج بالمناعير
في دقلنا نروي رهاف السلالي=وعاداتنا في الكون قلع المشاهير
بني عمر للحرب وصف ٍيحالي=مثل البحر لا هاج جاله زوافير
وناش اليمن منا حقوق الخيالي= ترتع به العرجى مع الذيب والطير
ويشهد لنا ضبع ٍ وغرس ٍ جزالي=ومحقبه تشهد بخبر التذاكير
تشهد ام عقلا والسبيه توالي=وخريم يشهد لي على النصر والخير
ولادعامر مكرمين السبالي=ذباحتن للروم حمر الطوابير
يوم جاهم الباشا جروسه تلالي=يقوم النايم بحس المزامير
قاموا عليه بقوة ٍواحتمالي=لا فيه لا ملوى ولا فيه تشوير
لكن ضرب سيوفهم في الموالي=ضرب البرد لا من حدته المعاصير
هذي لنا وجدودنا يوم اسالي=هرج ٍعليه أثبات ما فيه تزوير
هذا كلام عـبـيـد هرج الكمالي=وعَقب كلام ٍما يجي له تعابير
وبختم بذكر الله عزيز الجلالي=ومحمد اللي نور الحق تنوير
غير متصل
