قصيده وجهتها للشاعر القدير / سعيد مقبل الاكلبي
راكب اللي ماشكا منه سواقه=إن رقابه ضلع و لا قطع وادي
يشبه الصاروخ في ساعة إطلاقه=سرعته تدهش محطات الأرصادي
في مسيره حاجز البعد ماعاقه=مثل ابن ملحم* ليا جاله أمنادي
جيب لكزس تو ماختمة أوارقه=طاح في حبه جماعات وافرادي
يا نديبي لأقبل الصبح بإ شراقه=شغله عندك مع الطيب ميعادي
من غريف سبيع سق وارد أسواقه=وانص به دار المكارم و الأجوادي
ديرة اكلب منبع الطيب و أعماقه=دار قومن ورثها عز وامجادي
وانص بيت سعيد مقبل ومصداقه=تربة ارضه تجمع المسك والكادي
تسمع الترحيب والعود في ساقه=و الدلال اللي من الجمر تنقادي
والشحم فوق الصنايا تدفاقه=في محل اللي عن الطيب ماحادي
عطه مكتوبي وأنا محكم إغلاقه=مابه الا طلبة إسعاف وإمدادي
صاحبك من كثر مايكتم اشواقه=فاح قلبه فوح دله و برادي
والسبب فاللي سكن داخل اعماقه=الهنوف اللي لها الشوق رعادي
جيت ابوها دالاهن يأتبع انياقه=جيت له بالطيب و الطيب مافادي
لابغيت اشكي همومي ركز ساقه=مادريت إنه على الذنب معتادي
الله اكبر ياعرب مأشين أخلاقه=رحت انا وياه في حرب وجهادي
وأشتكى قلبي من البعد ماطاقه=لين صرت اجيه سرداد مردادي
مازهق قلبي ولوحاول إزهاقه=كل يوم ودافع الشوق يزدادي
حلها واقطع عنا القلب ووثاقه=واسعف المرسول بالراي لاعادي
ورد الشاعر سعيد مقبل الأكلبي بالقصيده التاليه
راكب اللي ماربـح منـه تفّاقـه=يسْبق العبْرود من قبْسة زنـادي
لا قِدَح بوجيّـه وحَـرّك الطاقـه=كن صوت محَرْكه نغْمة الـرادي
لا انطلق تقـول مفْكـوك سُبّاقـه=فرْخ شيهانٍ على الصيـد ورّادي
ما يشوف الجُرْف قُدْمه ولا عاقه=طايلٍ شبْره على شبْـر الانـدادي
يطْمُر الجِرْفان مايرْفـع شقاقـه=كنّه مثبّت على الارض باوتـادي
وان رقا له مرْقبٍ فيه شوهاقـه=قلت كنّه فالسهل يلْعـب البـادي
وارد امريكا على جُمْـرك بطاقـه=والجميح مـورْده يدْخـل بـلادي
الهمـر ياللـي تحبْـه وعشّاقـه=موتر الوعْرات وخْطوطه جـدادي
سايقه ماهتـم مـن زرّة بناقِـه=ماتعـوّد قـول مـمّـه ولا دادي
لارقَد فالليـل لا نومـه سْراقـه=ما يفيّخ للضحـى كنّـه رْبـادي
لا بدا ليل السْحَر يرْفـع اشْناقـه=دقْ سِلْفه مع نسيم الهوا الهـادي
معه مكتوبٍ يبـي حـزّة اعْتاقـه=لا وصَل عند السْبيعي على الوادي
في غريف سبيع يلْقـاه مشْتاقـه=عايض اللي للمواجيـب معْتـادي
ابو شيبه بينـي وبينـه علاقـه=رابطه واقوى من الملح والـزادي
حيث له روحٍ على الطيب صَدّاقـه=طيبها يصْعب على بعْض الاولادي
ان سرَح فالمرْجله صعْب ملْحاقه=وان ضوا جاب المراجل معه حادي
من رْجال الجيش والخيل والناقـه=عزْوة الغلبـا معنّيـن الاضـدادي
جاك ردّي يافتى الجود واسياقـه=المشوره والهـدى والله الهـادي
دايمٍ راعي الهوى يكْشف اوراقـه=لو يحاول يخْفي الشوق ما فـادي
وانت لا تزْعل من العود وازْعاقه=حدّه يشوفك صبـاحٍ ومهْجـادي
اعْذره واصبر على نبْـرة اقلاقـه=دام تبْغي مـن فلـذْات الاكبـادي
واعْرف المدْخل على قلْبه ولاقـه=يمكن ان العـود فالمـال كـدّادي
وان ركز ساقه تجـوّد بسمْحاقـه=ليـن يثْنيهـا ولاعـاد تنعـادي
واضْهر الرُبْطه وشف نظْرة احْداقه=كانها صغْرت عيونه فهو عـادي
وان لمحته قـام يكْثـر تبحْلاقـه=فاعرف ان العود مع عدّها غادي
رش كبده بالورق تبْـرد اعْماقـه=وامْتنع من بلْشة العود لا عـادي
الصبر لاطـال يتْعبْـك بارهاقـه=وانت غالي عندنا يابن الاجـوادي
وان بغيت المال جينـاك نسْتاقـه=وان بغيت الجُهْد جينـاك ونْفـادي
والسلام ازْكى من الورد في باقه=والوفا والطيب في رد الاسنـادي
غير متصل
