جريدة الجزيره في عددها لهذا اليوم نشرت قصيده لشاعر قصيدة التحدي الشاعر القدير هاجد بن صنيدح السبيعي في امير الرياض المحبوب الامير سلمان واحببت ان انقلها لكم هنا وايضاً أجدد الدعوه لدعم ابن عمنا في مسابقة قصيدة التحدي نسأل الله أن يوفقه ويستاهل والغلباء تستاهل وابناء الغلباء لن يبخلوا بجهودهم في دعم ابناء عمومتهم المشاركين في المنافسات والمحافل.
زيزوم الامـــــــــاره
يا سلام الله على سلمان زيزوم الاماره =الامير اللي لغيره كنه سراج منيري
الامير اللي يواصل جل لليله مع نهاره =ولا قضى حاجات غيره بات في نومه قريري
كنه اللي وحد الدوله على دين الطهاره=فيه من عبدالعزيز الفيصلي شي كثيري
المليك الراحل اللي ثبت الحكم بجداره =ما خذاها بالعطايا جات بالسيف الشطيري
لين رجع حكم أبوه ورجع الهيبه لداره =واستقرت بالأمن واستقرت بالمصيري
قال عهد الجوع ولي واسدلو كل الستاره= ابشرو يا هل الوطن جاكم الخير الوفيري
ثم خلاها تسير وتلحق بركب الحضاره =وحط له في كل دوله قنصيله أو سفيري
يرحمه رب العباد وينقذه من حر ناره =ويسكنه جنات عدن ويلبسه لبس الحريري
وأكملو من بعده الابطال كل واقتداره= من سعود الين عبدالله على المنهج تسيري
ومن يجي سلمان يشكي ما يطول بانتظاره =دون بابه ما يرجع لا غني والا فقيري
مجلسه عامر ومن ينصاه يلقى به وقاره =فاتح باب الاماره للكبير وللصغيري
كل شاكي يستمع له قبل ما يصدر قراره =ويتحرى للحقيقه لين يعرف وش تصيري
نصرة المظلوم دايم سيدي هذا شعاره =وقفته دايم مع أهل الحق واللي يستجيري
وبالعطايا والبذل سلمان له راس الفقاره =اليتيم وكل من يحتاج في ماله خشيري
له يمين لا عطت مادرت عنها يساره =وكل يوم سيدي فاتح له باب خيري
تجتمع به سيدي كل ميزات الاداره =الامانه والعدل والتواضع فيه غيري
والله إنا لو كتبنا لو تنقينا العباره= بعض وصفك سيدي ما قدرنا له نشيري
كل ما يكتب ويذكر سيدي عنك إشاره =أنت وصفك ما يجيده عنتره والا جريري
غير متصل
