عزي لحالك يا عزيز وأنا أبوك = كان الزمان اللي وطاني توطاك

[خالد الشماسي]

القصيدة للشاعر / سليمان بن شريم علم من أعلام الشعر الشعبي
نصيحته لابنه يعرفها القاصي والداني

وإليكم القصيدة

يا من لعينٍ في محاجيرها شوك=والقلب به عن لذة النوم تكاك
لا دك في قلبي من الهم داكوك=جاوبت طربان الحمايم والادياك
عزي لحالك يا عزيز وانا ابوك=كان الزمان اللي وطاني توطاك
امشي وكني يا عزيز بتابوك=في حبس جبارٍ تحت حكم الاتراك
على عشيرٍ دونه الباب مصكوك=ما غير امره واتعداه مناك
بابٍ وراه حروس ما هو بمفكوك=ومبرزٍ دونه مكاين وشباك
وبقيت انا في حضرة الوقت مملوك=دولة زمانٍ بين جاك وتعداك
افهم وصاتي ياعزيز وانا بوك=دامك صغير وغاية العلم يقراك
تراه ما ينفعك خالك ولا خوك=لا صار ما تقضي لزومك بيمناك
وربعك الى بان الخلل فيك عافوك=اقرب قريبٍ لك من الناس يشناك
ان كثر مالك صدقوا لك وطاعوك=وان قل ما بيديك شانت سجاياك
لو تطلب الما عندهم كان ما اسقوك=ابعد مزارك عن وطنهم ومرباك
ان جاد حظك صدقوا لك وزاروك=وان بار كلٍ ما يبي غير فرقاك
والى اعترض لك من صروف النيا صوك=كلٍ تبرا منك ما هو بوياك
وهراجة المجلس الى جيت وروك=منازل تطرب نظيرك بدنياك
والى قضوا منك اللوازم وخلوك=تفرقوا وانت احتمل كل ما جاك
كنك سراج البيت للنور شبوك=والى قضى الوارد حدا الربع طفاك
والا كما ليمونة الحمض مصوك=والى قضى منه الطعم فرغوا لذاك
واللي يجي من رفقته ريب وشكوك=احذر عنه لياك تصدق بمسراك
والى جفوك اهل الوطن واستخفوك=قلّع غريسك منه واهدم ركاياك
تراك لو تنجع على الرجل صعلوك=احسن من اللي تلتجي له وياطاك
عطهم وضيايفهم الى منهم جوك=وغلّق ضميرك لا تعلم بقصياك
وخدمتك شيخٍ كنك العبد مملوك=يامرك فيما يشتهي وانت ينهاك
اعرف تراك مبرقعٍ منه مشبوك=حدّرك في حبل المهالك ولا ارقاك
واصحا لخلان الرخا لو تغالوك=اعرف ترى اطيبهم الى احتجت يجفاك
كنك خوي مقيط دهووك واغووك=وحقك عطاك رشاك واقفى وخلاك
واحذر عن العيله ترى الحق مدروك=مثل العمل يدرك ما منه فكاك
وان كان عدوانك على الضيق حدوك=اخصم طلابتهم بعجفاك وقداك
وان كانهم لمشرّف الحق ماشوك=ناظر مطاليع الفرج قبل مبداك
وان طوعوا شيطان الانفس وهانوك=فاصبر على البلوى ودفنت رزاياك
زرهم تراك الى توانيت زاروك=اما بديت بصاحب السو يبداك
مادامهم ماطاوعوا لك وعرفوك=اضرب على الكايد الى عمست ارياك
لو هذبوك من المصايب وضدوك=ما يذبحونك قبل تدني مناياك
واحلم عن الجاهل ترى الحلم مبروك=وقم للضعيف اللي من الضيم ينخاك
وادمح خطا جيران بيتك الى اوذوك=ترى القصير وحرمة الجار بحماك
عطهم رواتب حقهم لو تناسوك=في كل ما يصلح لدينك ودنياك
وقم للضيوف الى عنوا لك وضافوك=اغلى كرامتهم حجاجك وبشراك
واعرف ترى ما لك من الضيف مشروك=لولاه يطلب حاجته فيك ماجاك
وقم للرجال ان ريعوا لك وحبوك=واحشم خويك واكرمه عند ملفاك
والى اعتبرت بسيرة الناس كفوك=ما كثر من شي تعبته وعناك
ولا تبات بهم دنياك مضنوك=ما طاب لك مادام لك وافتهم ذاك
لو يطلبون اخفايك الناس ما اخفوك=والرجل مثل النجم في كل الافلاك
وصلاة ربي عد الاوراق والشوك=ما ناض براق وما هل سفاك
على الذي ما فيه ريب ولا شكوك=محمد مادك بالقلب دكاك

[الحميدي السويدي]

الاستاذ ابو عمر سلمت يمناك على طرح هذه القصيدة الشامخه
التي فيها الكثير من التوجيهات والفوايد العديدة .... بيض الله
وجهك ولاهنت على نقلها وتقبل تحياتي وتقديري أخوك ابن بلعوس

[ابوعزوز]

الاستاذ/ ابو عمر


نقل طيب


قصيده رائعه


تحياتي

ابو عزوز

[خالد الشماسي]

أخواني الحميدي السبيعي وأبو عزوز


شكرا لمروركم على الموضوع ،،،


لكم اطيب تحية

[مصلح ربح]

لاهنت يابو عمر على نقل هذه القصيده الرائعه التي تحتوي على فوائد عده
ونامل منك اذا تحضرك القصيده المشابهه الهذه القصيده
قصيدة بركات الشريف الذي يقول فيها
يا مالك احفض كلمتي يوم اوصيك
نامل منك او احدى الاخوان الذين يحفظونها نقلها للفايده
حيث اني لا احفض منها الا القليل

[وافي السبـيعي]

[مجنووون شروووره]

يعطيك العافيه يابو عمر

[مجنووون شروووره]

شوف المعادن ذهب ونحاس والتفرقه بينهم واجد
وحذروشوف العباد اجناس اذا جيت تختارلك صاحب

[محمد بن سلطان]

استاذي ابو عمر ..

لا هنت على ايراد هذه القصيده الجزله .. والتى فيها من المعاني الكثير ..

نصائح قيمه وخبرات تهدى على طبق من فضه من آبائنا واجدادنا ..

عسى الله يرحمهم ويسوع منازلهم ..

اللهم آمين ..

تقبلوا تحياتي يا لابتي ،،

اخوكم
محمد بن سلطان الثوري

[ناصر المديري]

الله لا يهينك وسليمان بن شريم من اعلام الشعر ..

مشكور