سالفة بين السودة وآل مسعود................

[المنتبه]

بسم الله الرحمن الرحيم

أيها الأخوة............................................ السلام عليكم ورحمة الله وبركاته...........وبعد....

قصة من أصعب القصص ومن أشدها صبرا إذا حلت المصيبة أجارنا الله وإياكم من المصائب.

القصة وما تحتوي عليه/

تجاور الفارس/ هادي إبن مراد السودة الزكور سبيع هو والفارس/ مجري إبن هويدي آل عائض المسعودي قحطان في

قديم الزمان ما يقارب 250 عام وكانت جيرتهم على ما يرام في كل الأحوال ولايستغرب على هؤلاء الرجلين من القبيلتين

المعروفة كما لا يستغرب على عموم طيبين القبائل ولكن للدنيا صوكات كما تعلمون أن أبنا القبائل في ذلك الوقت شغلهم

الشاغل التدريب على ركوب الخيل وزرق الرماح والشلف وضرب بالسيوف والرماية إذا وجدت البندقية وفي ذات يوم كانو

أبنا المذكورين يتطاردون عند الخيل في مرابطها ومع ولد هادي بندقية والده ( المارتين ) ولا يعلم أن فيها طلقة فارتخى

إبن جاره من تحت بطن الفرس فأرخى البندق إليه موجها له فضغط الزناد فانطلقت الطلقة فوقعت في نحر إبن جاره

فأردته قتيل وقامت القيامة وحصلت الضجة فانطلقوا الآبا إلى الأبنا فوجدوا إبن مجري قد فارق الحياة فألهم الله مجري

ذكر ربه فقال إنا لله وإن إليه راجعون إلي عطانيه الله واللي خذه الله القاتل إبني والمقتول إبني يا وجيه قحطان الشان

شاني والأبنا أبنائي والجار جاري والكلمة كلمتي فأنا عفيت عن إبن جاري لوجه الله فقالوا بيض الله وجهك.

وإنتهت هذه القصة بالعفوا وفي الصباح الباكر جاء هادي وأخيه يسوقون ديدانهم الثنتين وأفراسهم الثنتين إلى

مجري فقال ما هذا ياهادي قال هذه دية إبنك فقال والله ما يدخلني منها غزلة ردوها إلى أهلها وفعلا ردت إلى أهلها

وهذه من سوالف الطيبين الذي يستحقون الذكر.

ختاما تقبلوا تحيات/

المنتبه.

[مسلط 22]

بسم الله الرحمن الرحيم
المكرم الاخ الراويه المنتبه السلام عليكم ورحمة الله وبركاته وبعد جزاك الله خيرا على ايراد القصة التي تدل على عظم فضل السوده تجاه الجار وهي مفخرة للسوده ولسبيع عامه واحيي فيك حرصك على القصص البطوليه لقبيلة سبيع لانك وباختصار من ابنائها البرره وانت سالم والسلام

[أبو يزيد]

قصه رائعه

من قصص العفو والتسامح ومن ترك شئيااا لله عوضه الله خيرااا منه

رائع

اخي


المنتبه


بيض الله وجهك.

كن دائماااا هكذا

[الطير الخضر]

السلام عليكم ،،،

ال مسعود علومهم مثل ذي واطيب شي الله كتبه والمكتوب مامنه مفر وبيض الله وجه مجرِّي وجعلها في موازين حسناته والطيب لايستغرب من اهل الطيب والعلوم الغانمه منا وفينا جبلَّه

متوارثينها من ابو وجد .

[فاكس الغلبا]

مشكور وماقصرت وهذي عوايد ربعي الغلبا
ونعم ال مسعود
ولاهنت

[القريشي11]

يوم انها مدحه جيت تعدي ولقلنا ذبحنا منكم قمت من محلك الحمد لله واهل الشرف القريشات لاصاح وقال خيال الشرفا عسيلي عرفت الجنوب واليمن

[الطير الخضر]

ونعم بالسبعان ،،، ولا على صبيان قحطان زووووووووووووووووود

يالقريشي11 منطوقك منطوق المستشك انصحك لاتحوص فالكلام فينطبق عليك البيت اللي يقول/

ما تشحن الغلبه يـا كـود الهدانـي -- وألا غلام ٍ ما يعرف التقاييس

ولا تغدي مثل اللي قال فيه الرشيد/

مايستشك يا حسين كود الرديين -- والا ترا الطيب وسيع بطانه

خلك ذرب لسان وفعل علشان ينطبق عليك البيت اللي يقول/

نفعل ولا ننكر فعول ٍ للأجـواد -- ولاني بخطوات البخيل الجحودي

أما السوالف يالسبعان بينا وبينكم والله واجد ،،، يذكر ان ال مسعود ضاعت ابل لهم قبل 40 سنه وراحو يدورونها في ديار سبيع اهل الوديان وعينوا لهم رجال سبيعي شايب (عود) وجهه عريض وايديه عراض وجوه ال مسعود وخذا حمايض علومهم وعلموه بانهم يدورون ابلهم الضايعه،،، قال الشايب ما شفنا شي ،،، نشدهم ويش انتم؟؟ قالو حنا قحاطين،،، قالوا من انتم منه من قحطان،،، قالوا حنا جحادر قال السبيعي خابر انكم جحادر من انتم منه؟؟؟ قالوا حنا من ال مسعود على الشر والخير،،، فضج السبيعي الشايب واعتزا ((بابن شديّد)) ورد لسلاحه وقام ينطق بكلمه وحده ويرددها ال مسعود ال مسعود ال مسعود ،،، الرياجيل بغو يذبحونه يحسبون وراه علم وشافوه شايب ورحموه ونشدوه وش علمك يا عود؟؟ قال ال مسعود الله لا يوفقكم وقام يدعي ويعتزي،،، قالو علمنا بعلمك قال: سنه من السنين على عهد (الفديع بن باحص) غزانا على ال مسعود وسبيع على (6 بيارق) وقايد البيارق كلها (الفديع ابن باحص شيخ السوده) وقام يدعي السبيعي على ابن باحص ان الله لا يوفقه،،، يقول غزو سبيع ببيارقهم وخذو ذود ال مسعود كله ماخلو منه حوار وشافوهم ال مسعود وخلوهم يوم قفوا السبعان بالبل يحلف السبيعي يقول والله ما جانا من ال مسعود ال (6 خيول) مردوفه كل خيل فوقها (رجالين) وحوطو بنا من كل جهه ويقول الشايب ان واحد من البيارق كان عليه رجال من جدانه او عمانه ومعه بعير ما يسبقه حافر يقول الشايب: يوم تحاودو بنا الرياجيل قامت كل فرس فوقها رجالين تخرق صفوف البيارق وتظهر من طرفها الاخر واول من طاح من السبعان عم او جد الشايب اللي يسرد القصه اللي يقول بعيره مايسبقه سابق ويحلف يقول والله ما عهدناه الا شواه طايح في الارض قد حولو به ال مسعود من بعيره،،، وردو ال مسعود البل كلبوها مانقص منها حوار :)

العلوم واجد والسالفه ذي ساردها سبيعي من ربعكم قبل 40 سنه ،،، واذا فيكم منصف اخص بالكلام ادارة المنتدى يروح احد منكم ينشد شيبانه الصدقان من العلم والصادق منهم بيعلمكم بان السالفه هاذي صحيحه ...

وسالفة السبعان اللي خذو ابل ال حسين ال مسعود (سكان هجرة لجعه) شافوها في المفلا ما عندها احد وخذوها وكان الوقت امن وامان وكانت على عهد الامير المحنّك (معيض بن جعفر بن عبود) وراح معيض بن عبود وخذا معه 10 (رياجيل) من ال مسعود لثقته العاليه في نفسه وفي شجاعة ربعه وراح للملك عبدالعزيز في مجلسه وقال: يابو تركي السبعان ماخذين ابل ال مسعود اهل لجعه والبل ان كانها بترجع بالطيب فزين وعجب عين وان كانها ماهيب راجعه الا بالغصب فوالله ان اخذها بالغصب واخذ معها عرب واجد (يقصد السبعان) والسبب في ذهاب معيض للملك عبدالعزيز انه لا يريد احراج نفسه وربعه عند الملك عبدالعزيز خاصة بعد استتباب الامن وارساء معاالم الاستقرار والهجر في الدوله السعوديه، اضافة الى ذلك كون معيض بن عبود من ابرز فرسان الملك عبدالعزيز المعتمد عليهم كثيرا في قيادة الغزوات مع الملك عبدالعزيز لتوحيد المملكه ،،، فقال الملك عبدالعزيز يا معيض لا تروح للسبعان وابل ال مسعود بترجع كامله ما ينقصها حوار واحد ،،، وردو السبعان ابل ال مسعود بالطيب .

شكرا لاتاحة الفرصه للمشاركه .

[ناصر علي]

هلا بالطير الخضر ال مسعود مانقول الا ونعم هم من افرس واشرس القبايل من قحطان وغيرهم وسالفتك ذي والله يالطيب ماسمعناها والمعارك بين قحطان وسبيع واجد ويوم لك ويوم عليك

[الـلامع]

ياكثر كلامك يالقحطاني

عندك اثبات على السالفة ؟ مافيه سالفة الا وتعارضها وتحاول تنحرف من الموضوع الاساس على شأن تمدح ربعك ال مسعود و قحطان مانقول في مدح ربعك شي ولكن ليته يكون في محله وان لاتنحرف عن الموضوع الاساسي من سالفة هديف بن عبود الى هذا الموضوع الذي يمدح قحطان وال مسعود بوجه الخصوص ماأدري هل تريد أن تعارض حتى سوالف المدح واللي تنومس بين القبيلتين ؟؟

[القريشي11]

هو يعرف القريشات ويعرف السوده