بيض الله وجيهكم على هذا اللقاء المتميز وسمحولي بوضع هذه المراسله بيني وبين ضيف اللقا
ارسل لي ابو فائز هذه الشامخه
سلام يـا رجـلٍ وقف ماقف الطيب=رجـلٍ حـكيمْ وبالوفا بان طيبه
رجـلٍ بـفعل الطيب جاله تجاريب=لـه وقـفةٍ بالطيب ماهي غريبه
مـن قـبل أعرفه جا لطيبه مناديب=وعـلم الحيا والطيب كلٍ دريبه
ولـه ماقفٍ بالطيب حكمه وترغيب=ومـن مـوقفه كلٍ يبي يقتديبه
رجّال أديـب وموقفه موقف أديب=وأنـا أفتخر في موقفه وأعتزيبه
مـن ربـعنا اللي ينطحون المواجيب=يـوم المواقف عند أهلها صعيبه
من لاد صامل لا حصل شقّة الجيب=لا صـار فـي سد المصيبه مصيبه
لا جـا نـهارٍ يطْلِع الطيب والعيب=مـوقـف رجال سبيع كلٍ يهيبه
يـتلون شيخٍ كم قضى من مطاليب=شبّاب ابن جروه عسى الله يثيبه
كم وقّفوا من دون حرش العراقيب=بـالوادي اللي ما طمع في شعيبه
مـصلح عرفته واحترمته على الغيب=فـعله عجيب وله مواقف عجيبه
والـذيب مثله يكشف رغبة الذيب=وأنـا فـخورْ بـوقفته وأعتنيبه
وأرسـل لأبو راضي جميع المكاتيب=أمـا يـرد الـعلـم ولا يجيبه
وأرخـص لعمّي كل ما يملك الجيب=لا حـيث عمّي كل مرمى يصيبه
والـناس فـيهم يخطي الظن ويصيب=وكـلٍ لـزومٍ يـقتنع في نصيبه
وبلال بـن ربـاح بـيَّن به الشيب=وعـمّه يـعرفه في شبابه وشيبه
والـناس كـلٍ فيه عيب وعذاريب=لـكن مـحدٍ يعترف ويش عيبه
وهذا ردي على اخي الشاعر الفاضل مبارك البخيت
يامرحبا واثني جزال التراحيب=فيها الوفا لهل النفوس الرحيبه
يا مرحبا بكتاب راع المناجيب= اعداد ماسارت اخطاها النجيبه
يا مرحبا يامرتب الشعر ترتيب= ترحيبت(ن)تطلع بعال الرقيبه
نطلع بها في عليات المراقيب= بالطيب ماسارت اخطاها غصيبه
حنا لها يا ابن البخيت معازيب=بحلالنا تلقى معزه وهيبه
رسالة الطيب لها حق(ن) مصيب=من طبعنا راع الوفاء نحتفيبه
واجب علي اصغي با الاسماع واجيب=وابحث عن الطيب لقدره واجيبه
ونفتح لها حدب الضلوع المحاديب=وتصغي لها افكار العقول اللبيبه
بالذات لاجت من حشام الاصاحيب=من شاعر(ن)نفخر به ونشتقيبه
شهم(ن) يهذب شرد الشعر تهذيب=حتى تجيه الشارده مستجيبه
يصوغها من محكمات الدواليب=وان كبرت القالات يدرك طليبه
ياابن البخيت يا حصان الاطاليب= يا سعد من فى النايبه ينتخيبه
محمدي ذخر الرجال المعاطيب=اهل المواقف والفعول العجيبه
وقفاتهم في شف عرب(ن) حنازيب=ترعى زماليق الفياض الخصيبه
من دونها يردون للموت لاهيب=رجالهم وقت اللقاء يندعيبه
با المارتي والآ وساع المضاريب=شلف(ن) مضاربها تسد التريبه
وحنا سندهم فى السنين الشلاهيب=اليا انتخا خطو الشجاع بقريبه
والله ولا علم(ن) يجي فيه تعقيب=لاصار ماله ساس ما نستنيبه
وارجع لبو فائز حميد التعاجيب= اللي بعلم الطيب كلف صحيبه
كلف ولد راضي خيار المناديب=وافي وفي حمل الرساله ينيبه
حر(ن) اليامنه صطى با المخاليب=تبين وقعت صطوته فى الضريبه
وفزعاتنا نفخر بها فى الاجانيب=اليا نخونا والمواقف عصيبه
ورفيقنا نفزعله بدون تحسيب=فى الواجب احقوقه علينا غصيبه
والله ماذخرعنه كود العذاريب=حتى على راسي تحط النصيبه
واللي بفعل الطيب ماله مجاذيب= لايامن الوقت الشقاوي وغيبه
غير متصل
