يا سبيع يا أهل الثلاث اللـي بهـا تعرفـون = وأهـل البخـوت الكـبـار الـلـي تسمابـهـا

[ابن الفارس]

	:السلام عليكم ورحمه الله وبركاته ( سمعت قصيده من احد الشعراء يقول فيها (ياسبيع يااهل الثلاث اللي بها تعرفون ) ماهي الثلاث اللتي تعرف بها قبيله سبيع ومن هو الشاعر وماهيه المناسبه @ ودمتم سالمين مع تحيات ابن الفارس وشكرا

[سيف ربعه]

الثلاث هي/ المثلوثه
الشاعرهو/ سيف ابن كليفيخ الجروي القحطاني
المناسبه هي/ جاهيه من قحطان على سبيع بشان قضية قتل


سيف ربعه

[اخو شما]

القصيدة قالها احد ال عاطف من قحطان

والله العالم ان الثلاث هي :

المثلوثة _ الغلبا _ كبار البخوت لباسة البشوت

هذه الثلاث تطلق على سبيع دائما مع انه يوجد اكثر من هذا فالامور التي تفتخر بها سبيع كثيرة ومنها:

متية البكار حامية الجار ومنها ايضا ان المرأة السبيعية هي الوحيدة على مستوى نساء الجزيرة التي تفتك حلال زوجها اذا كان زوجها من قبيلة اخرى غير سبيع

وللدلالة على ذلك فقد علق ابن حميد العاني على أمراة سبيعية كانت زوجة لعتيبي وذلك عندما وصلوا الى شعيب خنثل وهو مقابل للحوميات الان

[سعد السلطان]

اشكرك اخو شما على الافاده والله لايهينك



تحياتي لك

[ابن مشعب]

ياسبيع ياهل الثلاث الي بها تعرفون = واهل البخوت الكبار الي تسمابها
واهل البشوت الوساع الي لها تلبسون = اللي تجمل وتذري من تذرا بها
ياسبيع يالي على صم الرمك تحتمون = البل بشلف يفض الاراس مضرابها
ياسبيع يلي على وقت العسر تكرمون = ياللي على المصراعين تفتح ابوابها
ياسبيع يالي بتاريخ العرب تذكرون = تحكي التواريخ عنكم ونتحاكابها
ياسبيع لاكثرت الردات ماتهزمون = لاصاحت المحصنات وشقة اجيابها
ياسبيع ياهل الرماح الي تفض المتون = اهل عزوة ماتخجل من تعزوابها
ياسبيع ياللي على سلم شرف تصعدون = العود يرقا بها والغمر يرقابها
ياسبيع ياهل الفخر من حقكم تفخرون = ولولا صدوق العبارة مانطقنابها
والله لولا اكتساب المدح ماتمدحون = الاقول بعد الفعول اموت واحيابها
عليكم البيض ننشرها وتستاهلون = والبيض لسبيع حاضرها وغيابها
ياللي بنيتوا خيام العفو تستقبلون = جتكم قبايل بنو قحطان واصحابها
قبايل يطلبون الله ثم يطلبون = ذبيحة ربطت في حوش قصابها
بجاه ربي وبجاه الرسل والمسلمون = نطلب رجال تقدر جاه طلابها
عفوا عساكم نهار البعث تستبعثون = في زمرة الانبياء والرسل واصحابها
ياسبيع جينا لكم نمشي على ماتبون = بعد بلتنا البلاوي وابتلينابها
حنا اللحم وانتم السكين والكون كون = كانت وبانت وحنا مادرينابها
من غدر الايام لانسلم ولاتسلمون = بقعا تلف وتدور وتفتل اشنابها
وحنا عن الغيب لانعلم ولاتعلمون = والدهر فسر احلام ماحلمنا بها
واليوم جينا وبكرة جعلكم ماتجون = تشكون من نزعة الشيطان واسبابها
والنفس احانت وادانتها كبار الديون = وابليس لشر وداها ولا جابها
تخضع تحت سيف الله حديد السنون = اما تعشابها والا تغدابها
تسامحوا واعتقوها جعلكم تعتقون = في ساعة كل نفس تعرف احسابها
وصلوا على اللي بنور هدايته تهتدون = نبينا اللي فتح مكة وصلى بها
اللي رفع راية الاسلام للمسلمون = واهدم وهدم بيوت الشرك واحزابها

هذة القصيدة لسيف بن كليفيخ الجروي القحطاني

وهو ليس عاطفي كما ذكر الاخ اخو شما وانما جروي من نجد في منطقة يقال لها الفويلق تابعه للقويعية
وهو يتنقل بينها وبين بيشة وساكن في بيشة حاليا

اما الثلاث
فهي ان القبائل قديما كانو يعانون من الجوع والفقر فاذا جائهم الضيف اكرموه بالذبح له ويعشون لحم الذبيحة مع ماكان عندهم من بر
الا سبيع فانها تقدم لضيف ثلاث وجبات في وقت واحد
1- يقدم له المرق مع التمر اولا ويتعشاه حتي ينضج اللحم
2- بعد نضوج اللحم يقدم اللحم مع الفته او البر
3- بعد الانتهاء من العشا الدسم يقدم حليب الابل واحيانه يخلط اللحليب بالمرق وهذا مايسما بالعبيله

[لاد قبان]

ابن مشعب بيض الله وجهك.
أبوسعد

[اخو شما]

بيض الله وجهك يابن مشعب

انت جبت العلم بارك الله فيك

لك تحياتي

[هلطش السبيعي]

بيض الله وجهك ابن مشعب على هذا العلم وانت من اهل العلوم الطيبه والله يحفظك

[عبيد ابن دبيان]

بيض الله وجهك

ولاهنت عسى عمرك طويل ...

[ابوسبع]

مشكورين على المعلومات