هذه قصيدة للشاعر / محمد بن عبد الله البحيح الشماسي - الله يطول عمره - وهي عباره عن رد على قصيدة مسنده له من الشاعر / فارس بن شالح الشماسي عندما حدر محمد البحيح للربيع في نجد (في الموارك قرب الحريق) ومر فارس على النخل ولا لقى راعيه وارسله قصيدة لا تحضرني حاليا .
وهذا الرد
يا طير ياللي في الموارك بلاحيك = ياللي تنكس ثم تضف الجناحي
تأكل زهور العشب والرب معطيك = عشب وصل حده ولا به فياحي
نبتٍ من الوسمي تحدر وناصيك = نزول من القبله يسوقه رياحي
يا زين ما ينبته ضلعك واراضيك = من حدة الربوه لفيضة نساحي
ملزوم لا نبت الحيا فيك لا أجيك = بعفر ومجاهيم تزيد انشراحي
عفر ومجاهيم مع البدو تشفيك = لا طالة الشدة ولا به مراحي
درهم لها الركبي وهي تباريك = تطرب ليا آحت ندب ولا صياحي
ماهي تجود ذي تفهك ورى ذيك = صف تبارى مثل ريش الجناحي
اتخطم القصياء على اللي تواليك = تهوم الأرض وللمواطى مداحي
ولا جالها الزوار فحلب وتعطيك = در به اكبود المراضى صحاحي
ويم النشامى والقبايل توديك = مرباعها يعرفك سبع النواحي
وانته يا راع الغرس ضاعت هقاويك = كافحت مير اليوم عجز الكفاحي
الغرس دوره زل وقت المماليك = يوم العبيد تحوبطه بالمساحي
مغير تشويه السمايم ويشويك = تمره رماد وسايح الجم باحي
يا عزتي لك تعب جسمك وأياديك = وانته تنقي كل يوم وصباحي
ولو بعت منه اتمير مهوب مغنيك = سطل تبيعه قيمته وش تناحي
كانك تطيع الشور والرب هاديك = فنحش يا أبو شالح وطيع اقتراحي
خذلك نياق بالبراري تسليك = عشر بها خلفات واخرى لقاحي
ولا تحسب الدنيا تنقص معانيك = ما يحسب الدينا يكود الشحاحي
اطرخ ما دام الله مع الناس محييك=وأن مت يا قالوا يا ابن شالح مباحي
غير متصل
رد : هذه قصيدة للشاعر / محمد بن عبد الله البحيح
