((( يوم أنتها دور الأسهم جاك دور الغلال )))

[الحميدي السويدي]

	بسم الله الرحمن الرحيم أخواني مشرفين وأعضاء وزوار هذا الصرح الشامخ شبكة سبيع الغلبا أنقل لكم هذه القصيدة للشاعر المبدع / فيصل بن فرج بن شعيفان السويدي السبيعي بمناسبة نفوق الابل في عدد من محافظات المملكة بسبب تسمم النخال ,,,,,,,

الحمد لله والمنة على كل حال=ولا نرتجي في المسرّة والمضرّة سواه
لله ما أعطى وله ما أخذ رضا وابتهال=الرزق بيديه واللي نمتلك من عطاه
ولا أقول غير الله يعوّض على أهل الحلال=اللي تسبب تسمم ضرمته في فناه
الله يحسن عزا أهل البل ضحايا النخال=والله يحسبي على الظالم ويلعن ثواه
اللي نكب معظم العالم جنوب وشمال=بعض العرب راح ذوده كلبوه بعصاه
في ظرف ساعة غدت كحل ٍ مع الدمع سال=ما باقي ٍ غير وايتها ملحف غطاه
تصرعت قدم عينه دقها والجلال=غبينةٍ تجرح المسلم وتبحث خفاه
كم واحدٍ حبّه إبله مثل حب العيال=خطر ٍ بعدها من الصدمة تجيه الوفاه
البدو ما عندهم غير إبلهم راس مال=من دونها يشترون الموت قبل الحياه
الدم الأحمر ثمنها قبل وقت الريال=والعمر يرخص لها يوم الملاقا غلاه
والوقت ذا سعر طيّبها يفوق الخيال=فيها الملايين تدفع مثل دفع الزكاه
ما يشتريها سوى راع الرصيد الجلال=والبعض منها يعوّد سايمه ما شراه
كم فاطر ٍ ما يجي للبيع فيها مجال=يروح من دونها وجه الحياوي صفاه
آية ورد ذكرها قدام نصب الجبال=في محكم القول قبل أرض العزيز وسماه
يا شعب الإسلام هذا ما يبيله سؤال=العلم مبني على كيدٍ بعيدٍ مداه
الكارثة من وراها فعل مقرود فال=لكن لو سلم في الدنيا ترى الله وراه
لازم تبين الحقيقة مثل نور الهلال=لو طوّلت خافيه من تحت كم العباه
قتل البهائم خبر ثابت ما هوب إحتمال=بأن الخطر واصل ٍ زاد المواطن وماه
لكن لحوّ على الله بالطلب والسؤال=وادعوا ترى المبلي المظلوم يقبل دعاه
إيبيّن الحق ويجيب النّصف والعدال=على يدين الحكومة حسب حكم القضاه
واخذوا حذركم ترى جاء في الزمان اختلال=ومن لدغ من جحر مره مات ما عاد جاه
استمسكوا في عرى الوالي متين الحبال=العز في طاعة اللي كلنا في رجاه
يا مستمع كل حي ٍ مقتفيه الزوال=ومن أتقى الله يفوز ومن نسا الله نساه
دوام حال الخلائق في البسيطة محال=العبد ماله عن المكتوب لو ما بغاه
لازم يمر أكثر العالم قبل الارتحال=أحزان وأفراح صحة سقم فقر وغناه
والمؤمن إن كان عمره قل وإن كان طال=يبلا وربك ليا من حب عبد ابتلاه
والصبر مفتاح بيبان الفرج للرجال=والكذب حبل الدرك والصدق حبل النجاه
ولا يشيل الحمول إلا ظهور الجمال=لا كشر الوقت بأنيابه ودارت رحاه
لا بان راع الخفاف وبان راع الثقال=وجت ساعةٍ تظهر الواحد على مستواه
أحدٍ سواة البليهي لازما الحمل شال=وأحدٍ سواة الرعاع اللي طنوبٍ رغاه
يا قائد الشعب خادم بيت رب الجلال=شعبك جراله من أنواع البلاء ما كفاه
العام من سوق الأسهم ذاق مر الوبال=وفي ذي السنة عاد دلو امقيط لحقت رشاه
يوم أنتها دور الأسهم جاك دور( الغلال )=قيمة سموم المواشي من جيوب الرعاه
بين الجرائم وبين النصب والاحتيال=حلالنا راح ما ندري من اللي خذاه
تسابقتنا المصائب ورد من كل جال=وتلعب بنا الريح ما ندري على أي اتجاه
والله يستر بعد من مقبلات الليال=لا نصبح إما غداً للذيب وألا عشاه
مير الرجاء في كرم منشي صدوق الخيال=ثم في ملكنا عسا ربي يطول بقاه
يا قف وقوفٍ يجي للناس مضرب مثال=تبث الإعلام في العالم مكارم نباه

الشاعر / فيصل بن فرج بن شعيفان السويدي السبيعي

[ابن عفتان]

	بيض الله وجهك يابو سعد علي الطرح الرائع بيض الله وجه الشاعر السويدي فيصل ال فرج والله يعوض اهل الاسهم واهل الابل مانقول الا حسبنا الله ونعم الوكيل والله يورينا فيهم عجايب قدرته في هذا الشهر الكريم

[جفين الطويرش]

دوام حال الخلائق فـي البسيطـة محـال=العبد ماله عن المكتـوب لـو مـا بغـاه
لازم يمـر أكثـر العالـم قبـل الارتحـال=أحزان وأفراح صحة سقـم فقـر وغنـاه

بيض الله وجهك يا الحميدي السبيعي على نقل القصيدة الجزله من الشاعر فيصل السويدي

ولاكن كيف يكون هناك نفوق والمده اكثر من 25 يوم على التوالي ولم يكون هناك لجنه او اخذ عينات وتحليلها او زرعها ليعرفو السبب او العلاج

ولاكن الحقيقه فيه مؤامره وحبوكه حيل ولا نفوق البل ميزانيه تعادل ميزانية دوله ولله المستعان



تقبلو تحياتي

[وافي السبـيعي]

بيض الله وجهك يا الحميدي السبيعي على نقل القصيدة الجزله من الشاعر فيصل السويدي

[جبار السبيعي2]

بيض الله وجهك يا الحميدي السبيعي على نقل
القصيدة الجزله من الشـــاعر فيصل السويدي

[ابو اصيل]

مير الرجاء في كرم منشي صدوق الخيال
ثم في ملكنـا عسـا ربـي يطـول بقـاه
يا قف وقوفٍ يجي للناس مضـرب مثـال
تبث الإعـلام فـي العالـم مكـارم نبـاه
،،،،،،،،،،،،،،،،،،،،،،،،،،،،،،،،ربك كريم ....................