قصة السبيعي و جاره الدوسري

[سلطان الروقي]

قصة قديمة حول المجاورة وطيب الجوار ، وجرت بين
عبيد بن حويل من الخيالات من قبيلة الدواسر ،
وجاره دحيم بن برمان من آل عزه من قبيلة سبيع ،
وكان الاثنان جيران ، وقدر الله ان ولد الدوسري قتل ولد السبيعي ، فجاء الولد
الى ابوه الدوسري ، وقال : انا قتلت ولد جارنا دحيم بن برمان ،
وكان السبيعي لايعلم عن ماحصل حيث كان مسير على عرب بعيدين
عن بيته وبيت جاره الدوسري ، فلما رجع السبيعي واقبل ناحية البيوت
فاذا جاره عبيد بن حويل الدوسري واقف وهو ممسك بولده وفي رقبته
حبل ويشد الحبل بيده ، فقال له دحيم السبيعي : علامك يا عبيد وش سوى
ولدك عسى ما شر ، قال عبيد : فالح ذبح ولدك صالح وهذا ولدي اذبحه
بدلا من صالح ، قال دحيم السبيعي : الذي مات ولدي والحي ولدي يا عبيد
قال : ابشر بابنك وانحنى على الولد وقبله وقال : ابشر بأمك ، واستمرت جيرتهم
وتبادلهم الجميل والمعروف وصلة الصداقة ، وبهذه المناسبة قال عبيد بن حويل
الدوسري ابيات ثناء على جاره دحيم بن برمان السبيعي الذي تنازل عن دية ابنه
وقال :

ياراكب هجن مراديم وسمان=عيرات الانضا مايرقع حفاها
ياراكبين الهجن نصوهن اعمان=ومروا على رفحا وروحوا وراها
في كل ديره جددوا لابن برمان=قصر من البيضا رفيعن ابناها
ثم اجنبوا من عندكم يم نجران=دار المذاكر دوجوا في اقراها
حطوا له البيضا على راس مابان=راع الفعول اللي طرى نباها
ومروا على الخرمه وحطوا به اعلان=اعلان بيضا كل من جا قراها
ونصوهن الحاير عسى دربكم زان=ديرة سبيع امتيهين اقصراها
وابنوا بدار سبيع بيضا لها شان=من مر ديرتهم يشوقه ابناها
يالله عسى ديرة دحيم بن برمان=لاجا سحاب الوسم يسقي جباها
اللي عطا جاره عطا ما بعد كان=يبغي الجزاء من عند رافع سماها
ماهيب لا غرس ولا ابل ولا ضان=ولا عطا دنيا ايدور جزاها
يبغي العلوم الطيبه مثل ما كان=قصيرته عطيت ولدها وجاها
يافاعل الحسنا جزاك الله احسان=فعلت لك حسنا على الله جزاها

بيض الله وجه السبيعي .. و جاره الدوسري
و رحمة الله عليهم جميعا

[ابو انتصار]

هذا هو الجوار رحمهم الله جميعا

[سلطان الروقي]

الله يعافيك

مرورك مميز

[توتي رماح]

والله والف نعم في العزه ربعناء اهل طيب وشهامه ابن برمان فك قصيره ويجب علينا
نحن شباب سبيع ان نذكرهم في المنتديات والاعلام وجميع الاوسئال وكذالك فعل ابن دهيم في القحطاني
يوم اعتق والد جاره بيض الله وجيهم والله يلي فيه خير وشهامه انه يفخر امام القبائل في فعول العزه قديم
وحديث عهدنا وكما ترون الشمري ابن طوعان يوم اعتق جاره صارت المنتديات وعملو تكريم له ربعه
وانا للاسف لاسوينا تكريم ولا شي وهاذا ليس من باب عدم المقدره انما من باب عدم المهايط في القنوات الفضايه اقول رحم الله ابن برمان واطال الله عمر ابن دهيم شكرا جزيلا اخي الكريم

[الـلامع]

الله يجزى ابن برمان خير ورحم الله ابنه و اسكنه فسيح جناته

ليس غريب عليه فهو من ال عزه سبيع معرووفين بطيبهم يشهد لهم الاجناب قبل الاقراب يستاهلون المدح فقد سطر أروع القصص في الجيره


يالله عسى ديرة دحيم بـن برمـان
لاجا سحاب الوسم يسقـي جباهـا

اللي عطا جاره عطا ما بعـد كـان
يبغي الجزاء من عند رافع سماهـا

ماهيب لا غرس ولا ابل ولا ضـان
ولا عطـا دنيـا ايـدور جـزاهـا



الله يجزاه خير

[صندلي الشرقيه]

الله يجزي ابن برمان خير والعفو ليس غريب على سبيع

[فاكس الغلبا]

مشكوووووور والله يعطيك الف عافيه
ولاهنت على الموضوع الي يرفع الراس