سمعت الحمام الي سجع فوق غصن الدوح

[فتى العزه]

سمعت الحمام اللي سجع فوق غصن الدوح
جذبني بنغماتن هل الحب تفهمها
تغنا بشعرن من شذاه العطور تفوح
يعطّر مسامع من سمع في ترنّمها
من الشاعر اللي قبل انا لاامدحه ممدوح
وكد قالوا الاجواد ماتهفي ذممها
غنيّن عن التعريف ازيد الوضوح وضوح
تباها به اشعاره يصخّر ملاحمها
عميد القصيد وفي عيون العدا ذرنوح
وهو الاديب ونفسه الرب ملهمها
شعاني وانا قلبي مع اهل الغرام ايتوح
هضمني وروحي قبله الحب هاضمها
جبرني ابوح وعادتي للخفا مااابوح
اداري عن السمعه ونفسي مشيّمها
اجامل وانا قلبي بسيف الغلا مصطوح
اكن العباير في ضميري وكاظمها
هليك ودريك ادوّر من البلال انشوح
وكبدي تفوح وبارد الشرب يلطمها
غديت الغليث اللي يخاف البروق تلوح
يسوج ويلوج ونفسه الغلث مسقمها
سبايب عنودن صار في حبلها ساموح
حرمني محجّرها وهي مثلي احرمها
علامه يفرّقنا لعله ماهو مبيوح
بنينا الامال وحاقد القلب هدّمها
ولاله مصالح بس غاد الجدا مشفوح
مسممّ ونفسه زايد الغيض سممّها
حقود وحسود ومسردن كنه النابوح
وذلوله على كل المغازي يدرهمها
عسى الله يلم الشمل بالصاحب النصوح
وتطيب النفوس اللي محيمه حوايمها
وتليم شفوف اهل الهوى والعدو مكبوح
وتلحق هواها المغرمه لجل مغرمها
تهيّا على وضح النقا دربها مبروح
انال الهنوف اللي ولامي موالمها
ويبرا فوادن من غرام الهوى ملحوح
لحاه الهوى وارثع بروحي وحطّمها
وتخايط جروح بداخل الضامر المشلوح
من الجادل اللي حاكمتني وحاكمها
هنوفن عيوفن من تولّع بها مسموح
كساها الحلا من الراس لاحد مقدمها
غنوجن عنوجن بهرجها للعرب سحوح
فتونن يضيّع كلمته من يكلّمها
بها من مهاة الريم غره وفيها لموح
تذوب القلوب بنارها ماتقاومها
عليها الله اكبر كيف جاحت فوادي جوح
بها النفس مرهونه ولاني بلايمها
تمركز غلاها غصب ماعاد هو ممسوح
ولاعاد لي سلطه على النفس ايممها
انا صاربي ماصار للخس ياملّوح
طواني هوا خلن طوى الحال واعدمها
خليلن تخلخل خل عقلي وشاحه شوح
عزلني عن العالم دها النفس واوهمها
خطاها كبر سنجار مير الخطا مدموح
لعل وعسا ترحم وذا من مكارمها

الشاعر محمد الخس

وسلامتكم

[مخايل الغربي]

بسم الله الرحمن الرحيم
المكرم الاخ العزيزفتى العزه السلام عليكم ورحمة الله وبركاته وبعد صح لسان الشاعرمحمد الخس المطيري قصيدة اكثر من رائعه سلمت اناملك على النقل الرائع والذائقة الاروع واسلم وسلم والسلام

[أبو يزيد]

سلمت يمينك

يافتى العزه

على هذا النقل لقصيدة الشاعر الخس

صح لسانه ولاهنت,,,,

[فـــالح السبيعي]

سلمت يمينك

يافتى العزه

على هذا النقل لقصيدة الشاعر الخس

صح لسانه ولاهنت,,,,

[خالد الشماسي]

صح لسان الشاعر محمد الخس


على هذه الرائعة



ولا هنت يا فتى العزة

[فتى العزه]

مخايل الغربي

ابويزيد

ابوبندر

ابوعمر


لاهنتم على المرور

[ماضي المديري]

سلمت يمينك

يافتى العزه

على هذا النقل لقصيدة الشاعر الخس

صح لسانه ولاهنت,,,,

[منصور الحري]

يعطيك العافية يا فتى العزة على النقل الرائع
وصح لسان شاعر مطير محمد الخس

[فتى العزه]

عقيد القوم

الفتى منصور

لاهنتم على المرور