بسم الله الرحمن الرحيم
هذه قصيدة الشاعر دسم بن مناحي بن هايف المحمدي السبيعي موجهه للشاعر الاخ سعود بن جبران بن قالط الناهسي الشهراني0يرحمه الله.
(ياسعود ما يحصل تراهو مقادير)
يا الله اللي بالسماء ترفع الطير = يا رافع سبعِ بليا عمودي
يا اللي تنشي بالسحاب المزابير = اللي يصب الماء بهز الرعودي
تفرج هموم اللي حدنه مقادير = وأهل الحسد صارو بدربه قعودي
دايم هواجيسه ورود و مصادير = على ضميره مثل ورد العدودي
تارد مثل ورد الظمايا على البئر = بدوًا من الكنه عليها ورودي
يا مرحبا بالخط مخلص و تقدير = و الله على قولي و خلقه شهودي
يا سعود خطك غير القلب تغيير = و زود هواجيسي و شب الوقودي
عرفت مضمونه على كل تفسير = فهمت ما تخفي غميق السدودي
مثايلاً فيها الدرر صوغ تعبير = من هاجسٍ يقدح بخشم الزنودي
جلست اميزها على كل تفكير = معانياً مثل الذهب و النقودي
يا سعود ما يحصل تراهو مقادير = و الاْجل عند الله تراه معدودي
يا سعود ما يحصل من الشر و الخير = مكتوب وسط اللوح ما فيه زودي
و الرجل بالماجوب ما له معاذير = له منهجًا ما عوده بالصدودي
ما يقبل الغلطة براسه سعاطير = و الهون ما يرضاه كود الهنودي
هذا زماناً فيه عوج المناقير = شجعان لكن بالملاقا شرودي
باب الفرج عند الذي باْمره ادير = اللي يدير الكون هو معبودي
عند الله اللي كون العبد و يسير = اللي له عباده ركوعٍ سجودي
مهوب عند مشردقين الحناجير = للي عن الواجب يصد ورقودي
اْصبر ولو فكرك كثير المشاوير = و الصبر بالشدة تراه محمودي
اْصبر و لو وقت تغير بتعكير = اْصبر مثل صبر الجمل للهودي
الله يفرج عنك جور المعاسير = و تصفي بعد ما كدرتها القيودي
تقبل لك الاْيام بعد المدابير = عسى السعادة يا بن قالط تعودي
وتنور الاْيام بيضاً مسافير = و تسج رجلك مع ليالي السعودي
يا سعود خطك صور الوضع تصوير = و اْثر علي مخلفين الوعودي
يا الله بالبشرى مع اللي مداوير = اْهل الجمايل باذلين الجهودي
اْهل الركاب اللي تدرهم على السير = شيوخ الرجال مكملين العهودي
اللي لهم قيمة و شيمة و تاْثير = سلم العرب من وقت عاد و ثمودي
يا سعود في قلبي مثل دقت الزير = وهيضت قلبي يا عريب الجدودي
و ربعي سبيع و لا نهاب المخاسير = للي من صدوف الزمان محدودي
اهل الفعول الماضية و الطوابير = العزوه الغلبا تراهم عضودي
و ناهس هل النخوة سيوفٍ بواتير = و شهران قيفٍ يحتمون الحدودي
الى جال ميدان المعارك معاصير = تبين عزوتهم بفعلٍ يزودي
تكفون يا شهران يا اْهل المحاضير = انخا الشيوخ اللي سوات اليسودي
تكفون يا شهران ما به معاذير = يا فزعة اللي ناشبٍ و محدودي
و الطيب له في كل ديره مذاكير = عند القبايل من جميع البدودي
يا الله يا والي عليك التدابير = اْفرج عن اللي حارسينه جنودي
يا غافلٍ ميز ترى النصح تذكير = قدم لنفسك خير قبل اللحودي
صلاة ربي عد وابل شخاتير = على رسول خصه الله و نودي
قصيدة الشاعر
دسم بن مناحي بن هايف المحمدي السبيعي
غير متصل
