الشعر مجموعة احاسيس وشعور=والشاعر يترجم شعوره لسانه
ما الله قبل يافهيــــد شهـادة الـزور=والشاعر الصادق يصون الأمانه
كم شاعرٍ وسط اللحايد و مقبور=عاش بزمانه وانتهى في زمانه
وكم شاعرٍ ذكره مخلّد ومعمور=كن بينه وبين التناسي حصانه
ماني على قلب الحقايق بمجبور=قد قالوا ابن ادم لسانه حصانه
عذب القصيد يمرّ فالبال طابور=واختار من جزله وانقـّي سمانه
فرايدٍ يطرب لها كــل منعــور=ويشـّر عليها المتلقي بنانه
ما للفخر داعي ولا للثناء دور=لا صار ماله مع هل الطيب خانه
واليا ذكرت الطيب حثلان مذكور=اللي على الطالات يكرب بطانه
حثلان ابن ناصر ليا تيـّه الشور=يملى مكانه لاوقف في مكانه
راسه يفوح من الصعاطير ويفور=واسم القبيله مثله يعزّ شانه
لاصار فالامداح منهي ومامور=مدحك يا ابو ناصر على اسمك ضمانه
من روس قومٍ تتعب الهجن والكور=قريحتي في مدح شخصك مدانه
لو للكرم دوله وأماره ودستور=صدر قراره من جهة برلمانه :
انْك الزعيم ولا على الطيّب اقصور=متزعّمٍ بالطيب قدر ومكانه
ولولا القمر والشمس ما شعشع النور=لو كثــّر التهريج عنتر زمانه
عبّرت مايملي ضميري على الفور=ومدحٍ بليا فعل واضح خيانه
مجمّل يا ابو ناصر ووافي ومشكور=الشعر ماله دون شرواك خانه
والعذر منك كان جاء مني قصور=مثلك علي واجب زيارة مكانه
غير متصل
