بسم الله الرحمن الرحيم
يا سبيع ياهل الثـلاث اللـي بهـا تعرفـون=وأهـل البـخـوت الكـبـار اللــي تسمابـهـا
وأهل البشوت الوساع اللي لها تلبسون=الـلـي تجـمـل وتــذري مــن تــذرا بـهــا
يا سبيع ياللي على صم الرمـك تحتمـون=البـل بشلـف يـفـض الراس مضرابـهـا
يا سبيع يلي على وقت العسـر تكرمـون=ياللـي علـى المصراعيـن تفتـح أبوابهـا
يا سبيـع ياللـي بتاريـخ العـرب تـذكـرون=تحـكـي الـتـواريـخ عـنـكـم ونتحاكـابـهـا
يا سبـيـع لا كـثـرت الــردات ما تهـزمـون=لا صاحـت المحصـنـات وشـقـت أجيابـهـا
يا سبيع ياهل الرماح اللي تفض المتـون=أهــل عــزوة ما تخـجـل مــن تعزوابـهـا
يا سبيع ياللي على سلم شرف تصعدون=الـعــود يـرقــا بـهــا والـغـمـر يرقـابـهـا
يا سبيع ياهل الفخر من حقكم تفخـرون=ولـــولا صـــدوق الـعـبـارة ما نطقنـابـهـا
والله لـولا اكتسـاب الـمـدح ما تمـدحـون=الأقـول بـعـد الفـعـول أمــوت وأحيابـهـا
عليـكـم البـيـض ننشـرهـا وتستـاهـلـون=والبـيـض لسبـيـع حـاضـرهـا وغيـابـهـا
ياللـي بنيـتـوا خـيـام العـفـو تستقبـلـون=جتكـم قبـايـل بـنـو قحـطـان وأصحابـهـا
قـبـايــل يـطـلـبـون الله ثـــــم يـطـلـبــون=ذبيـحـة ربـطـت فــي حـــوش قصـابـهـا
بجـاه ربـي وبجـاه الرسـل والمسلمـون=نـطـلـب رجـــال تـقــدر جــــاه طـلابـهــا
عفـوا عساكـم نهـار البعـث تستبعـثـون=في زمـرة الأنبيـاء والرسـل وأصحابهـا
يا سبيع جينـا لكـم نمشـي علـى ما تبـون=بــعــد بـلـتـنــا الــبـــلاوي وابتلـيـنـابـهـا
حنا اللحم وأنتم السكيـن والكـون كـون=كــانــت وبــانــت وحــنـــا مـا دريـنـابـهـا
مـن غــدر الأيــام لا نسـلـم ولا تسلـمـون=بقـعـا تـلــف وتـــدور وتـفـتـل أشنـابـهـا
وحنـا عــن الغـيـب لا نعـلـم ولا تعلـمـون=والـدهـر فـســر أحـــلام ما حلـمـنـا بـهــا
واليـوم جينـا وبـكـرة جعلـكـم ما تـجـون=تشكون مـن نزعـة الشيطـان وأسبابهـا
والنفـس أحانـت وإدانتهـا كبـار الديـون=وإبـلـيــس للــشــر وداهــــا ولا جـابـهــا
تخضع تحـت سيـف الله حديـد السنـون=إمـا تـعـشـابـهـا وإلا تغدابـهـا
تسامـحـوا وأعتقـوهـا جعلـكـم تعتـقـون=فـي ساعـة كـل نفـس تعـرف إحسابـهـا
وصلوا على اللي بنور هدايته تهتـدون=نبيـنـا الـلـي فـتـح مـكــة وصـلــى بـهــا
اللـي رفــع رايــة الإســلام للمسلـمـون=وأهـدم وهـدم بيـوت الشـرك وأحزابهـا
أخي الكريم / الحميدي بن محمد الفراعنة السلام عليكم ورحمة الله وبركاته وبعد : شكر جزيلا لك على نقل هذه القصيدة المعبرة للشاعر / سيف بن كليفيخ الجروي القحطاني وإليك ما قاله الشاعر الكبير / مبارك القحطاني في رجال قبيلة سبيع بن عامر الغلباء :
رجال سبيع لا عرْض المجال ودارت الأخبار
= كرمهم ما تغيّره الليالي فـــــــي تقلبها
رجال سبيع معروفين لا جاح الزمان وجار
= مواقفها الحميده يعجزالشاعر يـــحسبها
صناديد الرجال أهل الشجاعه وافيةْ لشْبار
= صناديد الرجال اللي توقف دون واجبها
يعزون الخوي والعانيه والجار والخطار
= رجالٍ تكسب الطالات والعليا تفوز ابها
رجالٍ آصل من الواصلين وأقطع من النار
= مدلّهة الغريب اللي من الأقصين لاذ ابها
ديار من يمين أكلب ومن خط الحجاز يسار
= وحامـينٍ مهاملها وحامينٍ مشــاربها
زمان فات يوم ٍالفوارس تضرب الأخطـار
= حموها بالسيوف اللي جسيماتٍ قواضبها
ولو بعد فعل سبيع كله طوّل المشـــــــوار
= صناديدٍ خذت شبانها طاروق شايبــها
ومناسبة هذه القصيدة جاهية قبائل قحطان والقبائل الأخرى التي شاركتهم جاهيتهم وملفاهم على فخذ الصنادلة من سبيع الغلباء يطلبون العفو والصفح عن ابنهم القاتل وما قصرت قبيلة سبيع وبالأخص الصنادلة قدرت جاه قحطان والذين أتوا معها وتنازلت عن القاتل وهذا الفعل ليس غريبا على قبيلة سبيع الغلباء ويستاهلون هذه القصيده وأكثر جعلها الله في ميزان حسناتك يوم لا ينفع مال ولا بنون إلا من أتى الله بقلب سليم وسيعطينا الله على قدر نياتنا والله يعافيك ويبارك فيك ويجزاك خيرا ويبيض وجهك يوم تبيض وجوه وتسود وجوه هذا وتقبل فائق الشكر والإمتنان مقرونا بجزيل المحبة والإحترام مع خالص التحية وأطيب الأمنيات واسلم وسلم والسلام .
غير متصل
