شغــل الـــVXR

[ابن بداح]

الاحبه هنا في منتديات ســبـيـع

من جديدي عساها تحضى بشرف رضاكم .

شغل الفكسار وامل التوانك يا شبيب =فلله بالنفط واحرص على ربط الحزام
وصلنا دعوة رفاقه وللدعوة نجيب=مانبي التأخير عـجّل علينا والهمام
ان بغيت الباب الايمن تفضل يالحبيب=وأن بغيت تسوق تله وعان الدرب شام
خله يعرض على رماح قدام المغيب=ويتعدا صوب ذيك . الصياهد والعدام
للفياض ومرتع الشول حلوات الحليب=والمزاين واجتماع العزيزين الكرام
تاجد أذوادً مقيمه وتاريخً عريب= تحمل اسم سبيع غلباء متية الجهام
واحتفال البل واهلها ماهو شئٍ غريب= من عوائدنا وحنا نقيمه كل عام
من قديم الوقت معنا لها حظ ونصيب=وان خذينا جائزتها ترى ماهي حرام
قد كسبناها من القوم في الوقت العصيب=وقد حميناها بوقت المعارك والزحام
كم مشينا في رضاها وضدينا الحريب=نسهج البيدا نوفرلها الماء والطعام
نقطع الفرجه ونرعى بها القـفر العشيب=ننزل الديره بدون اتفاقية سلام
خذ هل العشر المردف يابو قلبَ لبيب=كمثالً حي ما ينطلي تحت الظلام
قالوا الكثره تغلب الشجاعه ياعجيب=قلت لاوالله بعكس المثل واثبت كلام
وش ثلاث الاف في صف والموقف رهيب=هاجموا عشرين ممرور في نقرةّ سنام
طاح في ذيك المغاره عشاء حصني وذيب=يوم سيل الدم الاحمر وتكسير العظام
زاحـوالقوم اللظيه بعد ضربً عطيب=طوعوهم بالقنا والمخـّير والحسام
وانتهت نصراً مؤزر ونصر الله قريب=واعتلت رايات ربعي رفيعين المقام
هكذا كنا مع البل ولا زلنا نجيب=كل شئً فيه للبل علاقه وانسجام
انتهى وقت الشقاء والمطالـب والطليب=وابتدى وقت المحبه ونبذ الانقسام
وأصبحت سحج الخلايا تبيت في الشعيب=ماعليها خوف لوكان راعيها ينام
وامنه بامن الله اللي على خلقه رقيب=ثم بحكم اللي خذ الشرع دستور ونظام
جيت اباشر حفل ربعي على حشمه وطيب=زايد التشجيع والانتماء والاهتمام
أنت تامر يا سعد مابها نشدة خطيب= يالرفيق الوافي الصافي الشهم الولام
مثل هذي يابيض الوجه ماعنها نغيب=تعتبر عندي مهمه من كبار المهام
عاش من مثل بذوده وعن ربعه ينيب=له من الاعماق شكروتحيه واحترام
عاشوا اهل البل عسى الظن فيهم مايخيب=وختمها صلوا على المصطفى سيّد الانام

[خالد الشماسي]

انتهى وقت الشقاء والمطالـب والطليـب=وابتدى وقـت المحبـه ونبـذ الانقسـام
وأصبحت سحج الخلايا تبيت في الشعيب=ماعليها خـوف لوكـان راعيهـا ينـام

رائعة جدا يا ابو عبد الله

و مشاركة جميله تستحق الإشادة

لا تحرمنا من جديدك :)

[مشعاب]

القصيدة طيبه بالحيل



بس اللي مهوب طيب انك تغلى علينا بمشاركاتك


المفروض ان ابو عمر يدفع للمكتب لجل يشاركون معنا شعار المكاتب


بس بصراحة قصيدة طيبه بالحيل ومنتازه جدا

[ولد عزوان]

صح لسانك يا مفرح بن بداح

والله انها قصيدة جزله ...............

ولا تخلينا من القصايد الزينه انا افداك

ولد عزوان

[عيسى السبيعي]

صخ لسانك يابو عبدالله

على هذه الدره الجميله

الإبل المدح فيها مايوفيها حقها

مره ثانيه صح لسانك يالغالي

تحياتي واعجابي

[السيف]

صح الله السانك مليون والله يا بو عبدالله

وافي والله يا بو عبدالله وسعد وافي

جدا رائعة هذه القصيدة

سجل اعجابي بها

تحياتي

[ابن بداح]

ابو عمر



أررررررررحب


أرررررررررحب





أبشر بالجديد المفيد




نورت الصفحه




تحــــــــــــــــــــــــــــــــــــــياتي

[ابن بداح]

المشا كس دائماً


خفيف الضل \\\ مشعاب \\\




انا لست من هذا النوع الذي أشرت إليه ياخو عجراء


انا منكم وفيكم ومعكم قلباً وقالباً




شكراً لك على مرورك الكريم


اخوك

[سعود الصندلي]

ابو عبد الله
صح لسانك
وقصيده رائعه من رجل رائع في اسلوبه
وطرحه والى الامام مثل ماعوتنا دايم

اخوك/ســـــــــــــــــعود السبيعي

[عايش ابوليل]

هلا واللللللللللله يابن بداح

وابيض وجه قصيده رائعه وجزله


اسجل اعغجابي بها وبآكثر قصائدك


تحياتي