قصيدة الشاعر / محسن بن علي القريشي السبيعي في الإبل

[خيَّال الغلباء]

المشاركة الأصلية كتبت بواسطة ابوعزوز

قالوا تغزل قلت في شمخ الذرا = اللي خلقها الله وزين تصويرها
ضرب بها الامثال بمحكم كتابه = قبل السماء والارض ماذكر غيرها
وقبل الجبال الراسيات الشوامخ = من بين لحم ودم أخرج دريرها
يازينها لا هجدت ليل ربعها =وسمعت فوق الحوض جضرة صغيرها
قامت تزاحم فوق حوضٍ موسر= مثل السباع إذا دغرها خشيرها
ورا وعود ثم لا الحوض ممتلي = و قامت تفاهق من روا جم بيرها
وتناطلت في معطانها لاكن وصفها=رحا تهامية في الارض تدفن بريرها
تناعست غفوة ودكت وعلت = وقامت تزاعج يم مفلا صديرها
وتقاطرت مع المصدار لاكن وصفها = طوابير جيش لا ومرها وزيرها
وصلت معشاها بليلٍ وعشت =وتخالطت خلفاتها مع عشيرها
أساطيل لا مشت قصور لا امرحت= يازين في المفلا طوارف نشيرها
تصبر علي الجوع وتصبر علي الظما =ومن عظم شأنها ما يجبر كسيرها
وإذا ظهر نجم السويبع وإرتفع = وجهالها قامت تغازل بعيرها
تقضقض فحلها بالهداد وشفتها = تديره وهو بالهدير يديرها
ثم إنحنى كالقوس لاكن حسه = طبلة هل العارض لادق زيرها
أو كالهلال اذا نظرة مثني =هذى ينوخها وذى يستثيرها
وقام يحداها عن هواها وتتبعه= مثل السرية والفحل هو أميرها
فيها قريع الذود ما حلب مثلها = ملحاً ظهيرة وإركبوها بضيرها
لادارها الحلاب حنت وأرزمت =ماهيب نحوسٍ طبعها نثر خيرها
وتشنحطت كن النعاس يغشاها= وخلافها الأربع تسابق ذريرها
أبيض من القطن وأحلى من العسل= وأخير من بيبسي البلاد وعصيرها
كن الدكاتر بالدواء بنجوها = ماتلتفت لو كان تقطع وخيرها
جسم جليل وعنقها من زرافة = وإذنين كالحربة بليا جفيرها
يالله لا تقطع عنها جمايلك = وبذنب غيرها لا تعطل مسيرها
وأنزل عليها الغيث من باب فضلك=أنبت فياض العشب وأرخص شعيرها
يالله بنوٍ مدلهمٍ خياله = في ليلةٍ غرا حقوقٍ مطيرها
يرعد ويبرق ماتفصل رعوده=يحي هشيم الارض وينبت بذيرها
نهار سابع تعرف العشب كله =تميز دقاق العشب وتعرف كبيرها
كن الخزاما في طوارف فياضه = لون الزوالي صوفها مع حريرها
وصفارها ومرارها مع عضيدها = قوارير طيبٍ فاح منها عبيرها
يازين ممشاً به علي كل حزة =شيء يشوق النفس ويعجب نظيرها
أخير من قصرٍ تسكر نوافذه = ومكيفات البيت تسمع صفيرها
أما لفحك الحر وإلا برادها = وإلا تلحف لا يضرك ضريرها
ياشين بردٍ مصدره من مكينة = لا شغلوها دوختك بصريرها
هذا كلام اللي تمثل وغنى = ينظم قوافيها ويأخذ عسيرها
وإختار من زين المعاني جلالها= يترك حواشيها ويأخذ غزيرها
تمت وصلي الله علي سيد الورا= محمد رسول العباد بشيرها

أبو عزوز شكرا لك ورحم الله الشاعر وأسكنه فسيح جناته

[خيَّال الغلباء]

قال الشاعر / محسن بن علي السبيعي رحمه الله وأسكنه فسيح جناته :

يا زين سوق الجديد وضربة الخوبه
= غب المطر لا سمر في الليل براقـه

سواقه اللي دليله يبخـص دروبـه
= الموتر اللي عليه النفـس مشتاقـه

يجيـك بالعلـم والأنـذال ماجوبـه
= جعله من الصادوف ما يرتاع سواقه

ليلة لفى جلعـوا بالبيـت وأوموا بـه
= واللي يثرّب يتلونه علـى الساقـه

عزي لمنهو وليفـه عنـه قفوا بـه
= قطعان بدوٍ تمارى في هوى الناقـه

قطعان بدوٍ على الصمان مجذوبـه
= عقب السويبع تبيّن وسـط معلاقـه

كم مرقبٍ زايـفٍ بالنبـت حلوا بـه
= أهل قطيعٍ شكى الرجليـن ملحاقـه

في شف ملحاً زهت بالطوق دبدوبه
= ملحـاً طويلـة عـدلـه ارقـاقـه

تقول دلةٍ من الرسـلان مصبوبـه
= مترين عظم رقبتها قـدم وادقاقـه

دايم لحس المـودّه تلتفـت صوبـه
= لا سمعته جـرت الحنّـه بونداقـه

يوم الضعيف جداه يحسـب ذنوبـه
= ينبت ويابس خضار العشب ما ذاقه

منقول بتصرف وأنتم سالمون وغانمون والسلام .

[ابـــن مهـــراس]

اخ ابو عزوز مشكور على النقل المميز
ونتمنى من كل عضو يعرف اي قصيده للسبيع
عن ابلها او فعولها ان يطرحها على المنتدى
ومشكور اخي ابو عزوز