منتدى الشعر الشعبي والنبطي ( شعراء الشبكة )قصائد نبطية شعراء قبيلة سبيع الغلباء و الخليج ، دواوين شعرية بالشعر الفصيح و العامي بأجمل الكلمات وأجزل الأبيات
أول كلامي ذكر وال الشان= اللي رفع سبع ٍ بلا عمدان
الواحد المعبود جلا شانه= منزل الإنجيل والقرآن
هو الإله ولا إله ٍ غيره= رب السماء والأرض والأوطان
سبحان من له يسجدون عباده= ما يسجدون لزمرة الأوثان
عساه يهدينا ويرضى عنا= في ساعة ٍ كل ٍ بها عريان
وعسى لساني ما يقول الزله= ولا يحاسبني بها الرحمن
شاعر ولي فالعلم رأي ونظره= وأحط قول الصدق في حسبان
وأرم الهدف وأحقق الأصابه= لا ضاع رمي مدحرج الأعيان
ولو هاضني بعض القصيد وغاضني= ما اضيع اسلومي مثل كوبان
بعض الجواب اللي يقوله عايض= ملزوم أرد ابداله ويندان
لو الحكى يا المسردي مع مثلك= يمل منه العاقل الطنيان
وقول الجواب اللي بليا فايده= ما هوب يقنع خاطر الفنان
مبداك مبدى شاعر ٍ له وقفه= وتنقض جوابك في عشر ثوان
قلت اللسان حصان لا عنيته= طاعك على دربك وهو مصان
وفي لحظة ٍ فكيت قيد لسانك= حبله على الغارب بدون عنان
وهاذي ترى تعناك ما تعناني= واراهنك واخذ عليك رهان
حنا سبيع الجود لطامة العداء= ما تعرف السبعان يا ظبيان
إن كان بن هادي نزل في صبحا= حنا من الوديان لا بن بان
ومن الحفر ورماح والرمحيه= ومن جو ساقان ٍ اليا الصمان
دار ٍ بني عامر تواسوا فيها= ما ساقوا الطبخه على راكان
سطر لنا التاريخ في نجد منزله= يا منك من جاش ٍ اليا سنحان
ولا قام كل ٍ يفتخر في ربعه= لي الفخر في سيرة السبعان
سبيع ٍ الغلبا سلايل عامر= وعين المعادي وسطها عيدان
افخر بطيبهم وأعد فعوله= يوم الفعول وحزة الأكوان
أبذكر الفارس وأبين فعله= ما أقول لي قول ٍ بلا ثبتان
أسخر بيوتي وأثبت قولي= ما ني بسويها مثل هذبان
جدي عسم في هية المسارده= افتكها من سربة اقحطان
افتك ذوده لين بين فعله= والفعل مثبوت ٍ على البرهان
افتكها بالرمح وام رقيبه= لين أصبحت وقف ٍ على الحيران
خيال واحد ينطح الملمومه= مسارده وقفوا كما الغزلان
أفخر بجداني واعد فعولهم= على ظهور الخيل في الميدان
امثال بن دليقم راع الخطه= يوم الدلي توخذ على الذرعان
قد خط له خطه ولا حد ٍ جاها= على ثلاثينً من الشجعان
خط بجفير السيف قدم وجيهم= بين الحقون وبين خشم اذقان
واللي تعدى خطتهه حول به= خلى علايق محزمه قطعان
ويوم العريف انشد وتلقى علمي= والصدق ما يغطه الجحدان
جايد قلع عشر ٍ بيوم ٍ واحد= وفي جنيح ٍ منكم قلع ريشان
وفي معركة بتران شالح حاضر= عينت ابن لغده وابن ريحان
ومحمد بن عمير وانشد عنا= ما فتكهم شالح وابن عروان
وثلاثة الفرسان لا ذكرتهم= ذولاك في وجهك يا بو وجهان
والمنع بين الناس سلم ٍ دارج= يومك على سلمك وسيع ابطان
وفيحان يا عايض اليا طريته= هاذي عوايد لقوت الصبيان
ما فيه نكره لا ذبحتوا فارس= يخوض فيكم كنه السكران
ناداه زيد ٍ بالعهد والذمه= والله يخون اللي بعهده خان
ظلمت نفسك يا ردي المنهج= في سالفة فيحان بن فيحان
فيحان يا منك تقوله يا الردي= فوجيهكم منيع يا كذبان
والله درى عن ذبحته من بينكم= يا شين والله ذبحة الامان
سلم العرب يا من اليا ومنته= حتى بعرف المذهب العلمان
وصارت عليكم ذبحته عقوبه= بعده وسمناكم على الحجان
ثاره يعومه مير منت بتدري= كافينك اللي دمهم هموان
وحنا خذينا في يعومه ثاره= على ظهور الخيل فرشيدان
يا من أخو ساره يفرق جموعكم= ورقابكم عوج ٍ على الامتان
ويرجع أولكم على تاليكم= والخيل في طرافكم شرعان
منكم خذينا فيه خمسين لحيه= بمجوف ٍ حده وريع اسنان
خذنا القضاء من روسكم من حينه= عينت بن مجدل وبن سفران
ما سلم منكم غير من خلاها= على قبلها مثل بن شلوان
وأبو عشق مروي شبات السله= يخط الدروب ويطمر الجرفان
انشد من الدواسر اللي معهم= ابن غرفان ٍ من الرجبان
وابن شعواء وش قال يوم يغني= عسى يعومه ما يجيها غشان
يوم ٍ على تالي عبيده كنه= يوم الحشر في روغة الأذهان
قحطان ساس العرٌب ما هيب هينه= ولا حد ٍ بهاينها ولا تنهان
قحطان ساس ٍ للعرب معروفه= ولا مثل عايض ينتمي قحطان
لو كان لو تسمع دواهي هروجها= ترد البحور وتاكل الحيتان
يا عايض بن مناحي أنت البومه= من دون لا مخلب ولا جنحان
تصف ريش ٍ ضايع ورهيف= وما غير تنغق في حجا الضلعان
بومه وبن بومه وجدك بومه= والبوم ما يغلط على الشيهان
تقول أنا في جاش وأقول ترتع= بالمنزل الكائن وبالوطان
من طق باب الناس طقوا بابه= ما يندخل بيت ٍ بلا بيبان
أقول لي كاف ٍ على واضح النقا= وأدهن سبايل لحيتك بدهان
اليا عوا ذيب ٍ كحلنا عينه= بالملح والبارود والخفان
يا ضايع المنهج تسمع قولي= جدك على عقيلان يا شريان
ابن شري جدك عش ٍ للغلبا= وبداح وعويد وبن حصوان
وحيبان ومحمد بن مليحه= وأنشد بن شفلوت والشيبان
يوم ٍ عجلات المحارف دارت= والملح والبارود له دخان
غاراتنا تروع قلب الغافل= طلوع شمس وحزت مسيان
ويا ما ويا ما يا عويض ذقتم= يوم ٍ يوم الموت طيره حان
ما صمخ قحطان مثل الغلبا= من حد سنحان ٍ لحد عنان
تظلم هل الغلبا كعام العايل= وتبين الذله من العتبان
حنا هل الردات في ساعة الوغاء= مركاضنا يشبع به الجيعان
وحنا رجال ٍ نفعل المثلوثة= وفعولنا تبقى مع الزمان
يا منك يا خبلان ما تفعلها= ما عندك الا الصمغ يا صمغان
وتولف علوم ٍ ورا حدانك= والميل ما يرضى به الانسان
تنقص حقوق القبايل كلها= وهذا دليل إنك قليل ايمان
ولا ينقص حقوق الرجال ويهينها= الا غليظ القلب والديان
ولا حد ٍ لابن هادي يسوق الجزيه= هاذي علوم ٍ كلها بهتان
عطني قبيله قد عطته اياها= حتى نحسب انك من الصدقان
في وقت بن هادي وبو ضيف الله= وفيحان بن باحص وبن جرشان
كل ٍ على رمحه يفلي ذوده= ورد البرى يبنى على التيجان
يمن ابن هادي على الجهامه= يسوق في طرافها طليان
في رقة الصاقب لعنا جده= وعلى الحويا جالهن عكلان
لين اصبحن أثقالهن اخفاف= واللي طرح في القاع بن شبعان
عينت بن شافي من الهواجر= خلي عشا ٍ للذيب ابو ذرعان
وراحت مقاديم قحطان اسحيله= وصلت اليا صبحا وهي ضيعان
اليا نشدنا عتيبه المعروفه= قالوا نحيناهم على الجبلان
حول على صبحا وفلا فيها= خلى الشفا والعبله وكبشان
حدوك عكفان الشوارب عنها= ذوي حميد مروعة الاذهان
عتيبه اللي علقوا في شالح= رمح المطني لين جاه اجنان
الذيب عند الذيب كانك تدري= عينت ذيب الذيب يا ريشان
عتيبه الهيلا متى صاحبتها=عقب الفديع وذيب طبعك زان
تمدح عتيبه لأنها مديحه=والا بلاك الذل يا ذلان
واللي تسلطن وسط نجد الأنجد= عبد العزيز مطوع العيان
ما ساد فيها الا طويل اليمنى= بسيف ٍ يوطي هامة الطمعان
ولا ركب فوق الخيل مثله فارس= من خلقت الدنيا لحد الآن
جمع شتات الناس لين التمت= جزاه ربي صادق الاحسان
زال الجهل عنها وزال الغمه= لين أصبحت خير ورخا وامان
واليوم في عهد الملك عبد الله= اللي على شعبه كما الهتان
ولي عهد المملكة قايدنا= سلطان أخو نايف واخو سلمان
حكامنا دستورها العدل والوفا= وإنا لهم شعب ٍ على ما كان
وختامها طيب ٍ من العود صابه= والمستكا والورد والريحان
ناصر بن منصور بن دليقم= سويد ٍ لي في سبيع مكان
وتمت وصلى الله على شفعينا= ما لاح براق ٍ بغر امزان
عليه الصلاة عداد ما ذعذع الهوى= وما غرد القمري على الاغصان
أخي الكريم / سبيعي من الهضوب السلام عليكم ورحمة الله وبركاته وبعد : صح لسان الشاعر / ناصر بن منصور بن ناصر بن دليقم السودة السبيعي وسلم نبضه وبنانه وإعتلا شانه وسبيع الغلباء وقحطان غلابة ما يلحقهم الشك من كلام الجهيل مثل المسردي الله يهديه ويرده إلى الحق ردا جميلا وقد أدخل بعض الرواة بيوت الجزية على قصيدة الغوج بين ابن هادي والشريف سلطان وأي راوية أو شاعر يعرف أنها منتحلة حديثا ولا تقوم بمثلها حجة وقد أنكرها رواة الأشراف ورواة سبيع الغلباء والكذب ما يهفي للأجواد ميزان والله يعافيك ويبارك فيك ويجزاك خيرا مع أطيب الأمنيات واسلم وسلم والسلام .
سبيعي من الهضوب بيض الله وجهك على نقل القصيدة الرائعة وصح لسان شاعرها ناصر بن منصور بن دليقم السودة السبيعي ومثل ماسبق وأن قلنا سبيع وقحطان مأحد يلحقه شك بطيبهم لكن عايض المسردي اخطا بحق جميع القبايل ويستاهل كل ماجاه
صح لسان الشـاعر / ناصر بن منصور بن دليقم السودة السبيعي
وبيض الله وجهه والحمية فيكم يالاد سواد معروفه من غير نقص
في باقي قبائل سبيع . وابن لشدق يستاهل ماجاه ولكن ماودي
أنك شملت قبيلته في القصيدة كان أختصيته حتى ولو أنه شمل
قبيلة سبيع في كلامه لكن كلامه مردود عليه. أخوك أبو سليمان
سبيعي من الهضوب بيض الله وجهك على نقل القصيدة الرائعة وصح لسان شاعرها ناصر بن منصور بن دليقم السودة السبيعي ونتظر منكم المزيد من الموضيع المميزه لطرحها في المنتداءلنرقاء به الى الافضل
تقبل تحياتي
ونا نعدل ارقابهم لا تعوج = غصب على نقالة المارتيني
الشاعر والفارس عفتان حسن السويدي=
غير متصل
