بسم الله الرحمن الرحيم
انقل لكم قصيدة الشاعر شبيب بن عرار النعيمي كما قدمها
أحييكم واطرح لكم هذه القصيده وكما قال المثل (كلن يغني على ليلاه) وبلا شك ان ليلى قصيدتي هي ليلى اغلب الاعضاء خصوصا بعد هبوب البراد وشوف القنوف , ومعبار الصيد
ياهل الطيـور مبعديـن المراويـح=ياللـي لكـم فالبـر والصيـد راده
سهيـل بيّـن وأرزمـن المراويـح=والنود عقب القيض ذعـذع بـراده
والجو زان وزان وقـت المساريـح=وكل(ن)يجهـز يانشـامـا عـتـاده
من فوق مايدنـي بعيـد المشاويـح=طرزه جديد ومركب أهـل السيـاده
من مصنعه صمم لبوج الصحاصيـح=ومن مصدره صدر ومعـه اعتمـاده
شفي اليا انحـن النجـوم المدابيـح=اليـا اهتنـى للنـوم راس الربـاده
تله على خط(ن) تعاوى بـه الريـح=مسراه طـول اللـي مامـن هـواده
ينصى الفياض اللي بها زايف الشيح=قفر(ن) عليها الوسـم هـل القـلاده
فيها الزهر يلعب معا الريح ويريـح=والورق تسجع فوق غصـن الكـداده
والربد فيهـا ممسيـات ومصابيـح=تـدارجـن بشعابـهـا والحـمـاده
ومعنا الحرار الصارمات المشافيـح=اللي لهن صيـد المخاريـش عـاده
كل اشقر(ن) بالفعـل كنـه شلويـح=عوق العنيـد اللـي تزايـد عنـاده
أشقر نحر ماخذ مـن الثلـج تلميـح=كن البياض بقحف راسـه ضمـاده
صافي ضهر وموضح الريش توضيح=لون البـرد لونـه ويكشـف زيـاده
طوله بعرضـه والمناكـب مشابيـح=متقلـط الثنـداه كنـهـا الـوسـاده
ومنسر جليل(ن) والمناسم مطافيـح=وعين(ن) بها جمر(ن) تزايد وقـاده
كنه الى اطلع وانتهض عقب تمريـح=عنق الحنيش اللـي يهـاوز جـراده
كن وفقته رجلن على الجمـه يميـح=ضافي شليـل وجـل ساقـه سنـاده
هو السنـد يـوم الهـدد والتماديـح=طير السعد يـوم اللـزز والجـلاده
لاجا نهار(ن) فيـه للفعـل ترجيـح=ياهل الطيور القـول يبغـي وكـاده
الخرب قـدم عيونكـم يالزحازيـح=روح يضف الريش جـل اجتهـاده
تسعة طيور(ن) عندكم روّحت ميـح=مافيهـن اللـي يستحـق الاشــاده
من عقبها قالـو معـاك التصاريـح=قلت ألزمو والخرب جالـه صمـاده
ضهر ومتنه يلفـح الريـش تلفيـح=يرمـع بمتـن(ن) ماتجيـه البـراده
اللي يشوف الخرب قـال التفاريـح=واللي يشوف الطيـر هـل الشهـاده
الطير وصل الخرب مافيـه تبريـح=شكـه براسـه وابشـرو بالسعـاده
من فوق متن الغيم جابه على الضيح=(كنه المضلي في حـروب الابـاده)
انا أشهد انه يشـرح البـال ويريـح=يوم الهـدد والقـول يبغـى وكـاده