قصدت مقصود الحجيج الملبين
رب لزلات الأجاويد ستار
لولا الرجا باللي له الناس راجين
غرقت من الأوهام في غب الأبحار
من كثر ماواجهت من وقتي الشين
هم علي اثقل من جبال سنجار
منها زماني غاديله عواوين
ومباريٍ لاجيت باحتاجله بار
يالله ياقابل صلاة المصلين
سميت بسمك قبل لاقول واختار
قول ليا قلته تحكمه قوانين
ادري ان قافيني نواقيد شعار
واختار جزلات البيوت المثامين
يصغيلها العارف وتلفتلها انظار
فيهن عزى نفسن شطنها شواطين
وعينٍ نظرها بازرق الدمع مدرار
ياسين ياعينٍ من الوجد تبكين
لا تمحنين اللي خفوقه على نار
كنه يقده في الحشا مخلب البين
يغير غارات الدهر كل ماغار
والله مالومك عارفن ويش تبغين
لاكن يجبرني على إزعالك اصغار
اللي لهم قلبي ولو قاسي يلين
وردة ربيعٍ تو فتح بالأزهار
مرضيك حين ومزعلك لاجلهم حين
حتى يصفون الجناحين بطيار
تصبري ولك الرضى لين ترضين
ولا يويق بغرتك كل هذار
الهون قسمن للضعوف المساكين
ولا فنا ماني على الهون صبار
لاتفرحين اللي من الهم سالين
ماجرعتهم غبر الأيام الأمرار
طابت لهم سلمى وعاشو مريحين
وانا تقزيني هواجيس وافكار
طوارٍ منها اكثر الناس خالين
تبرى الحشى بري الخشب عند نجار
الأيام لو راحت مثل وجه سكين
صبرت لينٍ غبر الأيام تندار
يديرها الرحمن مخزي الشياطين
ويجعلنا من كرب الأيام مظهار
ياعيال اللي من الأمارات ماشين
قطاعة الفرجة دواليل الأقطار
تريضو باقي على القول بيتين
مثايلٍ منتوجها لول محار
اليا خذيتوها عليها العناوين
من دار زايد منتوين ٍ على دار
تالي نهار ليا مشيتو من العين
على جديد ٍ محتسينه للاسفار
يتعب عليه اللي يبي المركب الزين
قدام تمرينه وطبلونه اصفار
محطم الأسعار هدو السلاطين
لونه زبد موج على الشط هدار
يهد هدة صاملات الشيا هين
وان اعترضلك قلت ريم ليا ذار
وليا نطحته كل وصفٍ لك يبين
تقول مفرع من ثمر صدره صغار
اخر مديلٍ صنع بالفين واثنين
في مصنع اليابان والنوع فكس ار
مميزاته يوم صمم سبيرين
من صنع تايوته على خشمه شعار
حس المكينه ليا اشتغل عقب تمرين
حس القطى اللي واردٍ عقب مصدار
يبعد محبين ويدني محبين
ويقطع بكم لالٍ زمى دونه غبار
مغرب ليا خرج من الحد عجلين
خلوه يسري ياطويلين الأعمار
وليا مضى من مقدم الليل ثلثين
ماباقي الي ثلث والنور ينطار
النير خلفه والعلم جاكم يمين
وجتكم خطوطٍ كنها الميسم يسار
هذاك خطه عرف ماهوب تخمين
خفو هواه وحولوبه عن القار
اول طريقه مع حزوم وصعانين
وجهه جنوب ولا تنوى بمحدار
سارٍ مع مدهال قبس السراحين
قفرٍ تربع فيه حسكات الأوبار
ساعه وتز مي من يساره ضلاعين
تقول كن براسها راس سبار
كنه يغني في المراوح مغنين
وحول على ورشه مع وقت الأسحار
والفجر صليتو ورى العرق مرهين
وجيتو يعومه واول المال نشار
عقب الشروق وقبل فتح الدكاكين
صبح بكم وادي النخل حلو الأثمار
بديرة سبيع مرجحين الموازين
عيو عليها وارخم السيف جزار
دارٍ لنا يومن كلٍ له يدين
محدن نزلها غير جيران وانصار
عدوانها دايم عليها مغلين
دارٍ لوايلنا بها رسم وجدار
إن اختلط عج الرمك في الميادين
مروين دون حدودها كل بتار
وان ادهرت الأوطان فيها مريفين
لعل تسيها هماليل الأمطار
اعلوها حرة ومزبن مخيفين
ضلعيٍ يذري عن لهيب الهوى الحار
وعطوفها فيها غروس وبساتين
ومجالسٍ يكرم بها الضيف ليازار
واسفل مناديها عليها معيين
في العرق مشتاها وفي الهضب مصفار
عذرًا تكيد لابسات السباهين
مشروبها الدم الحمر كل مافار
عشاقها جوها وردو معيفين
عيو عليها اللي يزيدون الأسعار
هل ردة تخلي سروج المسمين
لباسة الدرع المجوخ هل الكار
اثقال في المجلس على الخيل صلفين
ليا طار ستر مزعلت كل حجار
يوم المرى تجرح كبود المارين
مصيونة ماعرضوها للأخطار
وهلها على كسب النواميس ضارين
هل مرحبى للضيف وافين الأشبار
وانتو عقب طول المسافات مشفين
على معاميلٍ بها بن وابهار
نصوه ريف اللي من البعد ملفين
مكرر الماجوب للضيف تكرار
اول قراكم عند مخلي المراحين
مفطحات الحيل ولا على حوار
في مجلسٍ رودٍ للقصى والأدنين
مجلس عديمٍ للمطاليق خسار
هذاك ابن ماجد عسى عمره سنين
مشرع البيبان للضيف والجار
وربعه هل الإبل ملحقين المخلين
جهران ليا ركبو على قب الأمهار
ليا رددة من الخوف بين الحفيفين
قطعانهم ترعى زماليق الأقفار
يوم الردي لون ماله ملايين
كفه بخيل وقلبه انجس من الفار
ميت لونه عايشٍ ضمن حيين
لاشٍ يضيق ليا خسر ربع دينار
ماهوب مثل عبيد شوق المزايين
يوم العضايم عند ابن ماجد صغار
المال كفوه من جمع طيب ودين
خطوى عديمٍ ينجبه موكر احرار
ان شانت الأيام يعطي المقلين
وان زانت الدنيا بختري ونوار
ليا خذيتو عندهم يامضانين
ثلاثة ايامٍ عقب طول مشوار
حمض الرجال علومكم ياميامين
وانتو حريصينٍ على حفظ الأسرار
قولو من اهل العين جينا معنين
واللي معنينا يبي رد الأخبار
لا يشتكي ضيم ولا يشتكي دين
قصده سلامٍ فيه تجديد الأثار
سلامٍ ازكى من عبير الرياحين
وألذ واحلى من لبن كل معطار
والختم ياللي للتماثيل مصغين
صلو على سيد الملا خير الأبرار
الشاعر /سعد عويد ثواب المجمعي
غير متصل
