فقيد ربعه الغانميني

[راعي الجوفا]

في شهر ذو القعدة الماضي 11 /1426هـ توفي الشيخ غازي بن ماكن بن محسن السبيعي في مدينة عفيف لكبر سنه ومرضه وقد قال فيه أبن شقيقته بتال بن فلاح السبيعي قصيدة مرثية في خاله بعد وفاته أخترناها لكم وهي

البارحة ما ذاقت النوم عيني وأنا ومحسن ليلنا ما رقدناه

ومنصور بن غازي ومشرع حزيني على الذي مات بعفيف ودفناه

وفرج ولد مشرع صفق باليديني وأخوه ناصر حطم القلب ببكاه

وجاسر دموعه مثل وبل الغشيني وعبد الله الماطر وبتال ينعاه

وماكن ولد بتال والحاضريني محد بخل بدموع عينه وبدعاه

عزاي للحضار والغايبيني للي يعرفونه وداني دناياه

وللخال مزيد يالله إنك تعيني عزي لبو ناصر من الحزن عزاه

الموت حق وكلنا عارفيني ولا ذكر حي قالوا الموت خلاه

خالي فقيدة ربعة الغانميني كل الصفات الطيبة من مزاياه

خالي وأعده ثالث الوالديني بروح من دنياي ما والله أنساه

من زود وجدي باح خافي كنيني ولا لي جدا إلا أجاوب الذيب بعواه

لو البكا ينفع وكثر الونيني بكيت ثم ونيت من حر فرقاه

يا الله ياللي تبعث الميتيني أطلبك تغفر له وتدمح خطاياه

وأن ترحمه يا ارحم الراحميني عسى العوض له جنتك عقب دنياه

مرحوم أبو منصور هيف السميني لا عاد يوم فيه خالي فقدناه

وعلى محمد سيد المرسليني صلوا عدد من بأن بالأرض ماطاه

بتال بن فلاح السبيعي