العيد في جدة تغيره الأمطار=وصارت افراح أهل جدة تعازي
والحد في الخوبة على طلقة النار=والحرب غازي حد والسيل غازي
لكن راضين بمكتوب الأقدار=مادام حد الموت في العنق وازي
والله عليم ما تخفية الاسرار=في جوف من علمه على الحق لازي
يا من نشدني عن تفاصيل الأخبار=الوضع مزري والخلايق مرازي
إن كان تبغى الصدق لو شفت ماصار=ايشيب راسك من نحيب النحازي
والله ما ينقاس لك حجم الاضرار =حي القويزة صار حي القوازي
من عقب ماحدر معه سيل منهار=دل الطريق ابلا مهندس وقازي
اثبت علاماته من ايمين وايسار=يفهم مقاصدها الفطين المنازي
ما كان خافي بان والوقت دوار=اما البحر والا جبال الحجازي
ياللي تصرح بعد ما شفت بأعذار=ماعاد يبغى للحقيقة تهازي
الحق واضح وانت لابد تغتار=وتشغل التفكير ضمن الجهازي
لاتكون محتال ولا تكون غدار=خلك مع الدرب السميح الموازي
لن الترف يغزي مصادير الأفكار=وكثر الحلا لازاد عود شمازي
واللي حصل موجود في بث الأقمار=شي يجاز وشي عيب يجازي
السيل مايعرف هل البيت والدار=يعرف طريقة مير حط احترازي
ولا يفرق بيننا صغار وكبار=افخم طراز يحطه اردا طرازي
لكن نصيحة قبل قصاف الأعمار=امش الطريق الصح لو كنت حازي
والا اعتزل لو كنت خايف ومحتار=ونشوف من له خبرة في النشازي
لاتجمح بخيلك على غير مضمار=تموت ماقد قيل لك خيل فازي
وختامها نرضى بمكتوب الأقدار=مادام حد الموت في العنق وازي
يا من نشدني عن تفاصيل الأخبار=ناس نعايدهم وناس نعازي
الشاعر مبارك العمري الرادار
غير متصل
