قم يا نديبي هاتلي ما يوني = عشر هافات من الوكاله اخذوهن

[مسلط 22]

بسم الله الرحمن الرحيم

إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : لمعرفتي التامه بإهتمامكم بالإبل والهجن ( الجيش ) والتي تعتبر جزء مجيد من تاريخنا وموروثنا الشعبي المشرق المشرف أردت أن أنقل لكم هذه القصيدة والرجاء ممن يعرف عن شاعر هذة القصيدة شيئا المشاركة وإكمال الأبيات إن وجدت وقد قيل أن القصيدة للشاعر / رغيان الشراري رحمه الله والله أعلم :-

زادن همومي والدموع أغرنني = ودموع عيني لون مزن يهطلن
يومن بربعي ناظروني أوني = قالوا صوابه في ضميره تمكن
قلت اصبروا والله ما يوجعني = إلا ضعونه يومهن فيه قفن
قمت اصطبر وأقول الله يعني = على ليال (ن) للمصايب يجيبن
ثمن أصيح ثمن أبكي وأوني = ونت صويب اللي عظامه تشظن
يا راكب اللي هن مناة التمني = حيل من اللي كل دل زهاهن
من زينهن عند القبايل زهني = مع كل أمير وشيخ يعرف طلبهن
وسم الشراري وسمهن لا اعرضني = شقح يقال إن الشراري غذاهن
إن صفن امع الجيش ما يلحقني = وإن سابقن تقطع الخيل عنهن
يشدن جراده في وقوت مضني = بأرض القميز وفي زمنهن يعدن
قم يا نديبي هاتلي ما يوني = عشر هافات من الوكاله اخذوهن
إليا نعشته بالثلاثه يحني = حس التواير يكشطن في حصاهن
اثنين منهن للحويه مشني = لأهل الركايب والدوّر يكملن
وهافين للنفود ووادعني = وأقصى القعوره بالنفود ادخلوهن
وهافين لحدود الكويت أقفني = دارن وحامن لا لقنه ولا جن
وهافين لحدود العراق اعمدني = ومسلحات عن الخطر وين ما هن
وأجي على هافين بحسن يحني = كل إلينه شيف بالقلب يشطن
جنك العشره كلهن ينشدني = على حبيبي في ديار أعرفهن

والقصيدة طويلة أرجو الإفادة عن القصيدة أو قائلها أو بقية أبياتها كما أردت أن أنقل لكم بعض هذه الرائعة الشعرية التي يرددها الكثير من الرواة لما فيها من إبداع وقد ذكرها بعض الرواة بأحد إصداراته وقال : عنها ( من أروع القصائد ) وهي لابن الشاعر المتقدم والله أعلم فاليكموها :-

قلبي يزوم وزود طيشه بلاني = وطير النيا يمكن رجع عقب ما غاب
توه قضيب وزاد بالأكفخاني = سبقه قصير وماقعه دون مقضاب
قلت الفرج بالقافيه وإكتباني= دام القلم مطواع والحبر سكاب
يا راكب (ن) من فوق بنت العماني = حول الرباع وتو ما شقّت الناب
فيها من العيرات وقم الثماني= محفوظة التاريخ ميلاد وإضراب
بنت القعود اللي يفك القراني= مرباه شط النيل مرتع ومشراب
ضريبته بالعيش صعب المجاني= تدفع لنا غصب (ن) على قوم غصاب
يشهد لنا راعي نفي بالأغاني= وحمود ناصر وابن ملحم وحطاب
عيونها جمر الغضا الشلهباني= في جورة (ن) ما بين كيراً وشباب
فقس العلابي ثم عكف الأذاني= راس الخبير إذا وقف وأصلح الكاب
مبرومة الفخذين والزور باني = بينه وبين أكواعها قفلة الباب
شيب الشواغر مع مميل الثفاني= عراض (ن) مرادفها كما قار ديراب
الصيعريه للعصا ما تداني= ولا هي من اللي يشعبونه بمشعاب
تلمح مذانب عينها الخيزراني= هاجت وماجت ثم ساجت بضبضاب
عقب الربخ ساج الحقب للبطاني= شابت مرافغ بطنها والحقب شاب
إن درهمت بك مع سماح المتاني= وحان المسا والدرب عثعث ودبداب
يزيدها شوف الظلام إجفلاني= كن السعارة ينهشنه بالأنياب
تزلف على اللي سيرها بروجاني= فريد من سرب القطا شافها عقاب
وكل ما قربها زادها بالجناني= تزيد مع لفح الهواء والهواء هاب
حدا نظر خشم (ن) عفر مشفقاني= حصا وبر كن النحر باب خشاب
تقدم على السرحان بالهوذلاني= ينزّى الحصا من خفها تقل مشهاب
صفق الهواء بجنوبها بصفحاني= صفقات معصير (ن) على صوب مزراب
دقات قلبه بالضلوع الحواني = ضرب الدفوف بعرس تلعات الأرقاب
مزبان إدمي (ن) بعيد الطناني = لحم ودم وروح وتثير الأعجاب
بالشد لا ترغي ولا مضبحاني = مثل الهنوف إذا إستحت عند خطّاب
وإن مس حبل شدادها بالمثاني = تبدي الرضى بسكات بعيون عتّاب
ترطن رطين مترجم (ن) طرطمانمي = شاف المحرك عاطل (ن) فيه لولاب
تشدى لشاحوف (ن) بعيد المواني = حس الخطر من زورق (ن) جاه قراب
شاف الخطر بالعين والموت داني = وتو البحر ما هاج والجزر كباب
الجم راكد والمسير إركزاني = صفق المراوح بالبحر صفق مغراب
ما رافقت قفل (ن) ولا هي بواني = ولا شدها راع الزماميل حطاب
ولا دربوها ملاعبين الغواني = عفر النظر ما يركبة كل ركاب
مرباعها بين العلم والجراني = ومقيضها بالهوج والبرق معزاب
في ضف نجعا يكسبون الرهاني = إن صار يوم (ن) بين مروي ونداب
ركض النعامه بالحفا واللياني = وحبل الرسن ما يقضبة كل قضاب
ما يشتريه التاجر المربحاني = أيضا ولا تهدى على كل طلاب
تشبه عوارض ساقها الشيشخاني = وسم السليم بنصفها كنه الداب
يوم الحرايب والعدا من زماني = مدربينه بين غزوة ومطلاب
نلحق عليها راكبين الحصاني = وصفر (ن) يكضمن الأعنه بالأجناب
ما قلت فيها عيب للمودماني = الجيش هن والخيل من ضمن الأسلاب
ومن قال عيب قلت فيها مثاني = على الخبير المبتدي ذكر الأسباب
دليلها واحد من الكوكباني = الجدي وإلا سهيل كان القمر غاب
حطت نحرها في سهيل اليماني = ولو شفت أثرها قلت مضراب نشاب

هذا وللقصيده بقيه ولكن هذا ما إقتصر حول وصف الذلول للشاعر/ عايد بن رغيان الشراري رحمه الله . منقول وأنتم سالمون وغانمون والسلام .

[مسلط 22]

بسم الله الرحمن الرحيم
كذلك اشتهرت قصيدة الهاف فارجوممن يعرف القائل يبلغني به وله الشكر ومنها
لانخيت الهاف جاك الهاف كله كنه يشرب من غراش المسكراتي
ومن يعذل الهاف جعله فدوة له جعل يفدنه غنادير البناتي
وانتم سالمين والسلام

[ابومحمد القباني]

القصيدة الثانية هي الله واعلم لبندر بن سرور وقيل انها لسعيد بن ودمان ولهيب له لسبب ابذكره واكد لي احد الاخوة انها لمحمد بن مثعي العتيبي نقلا عن ابنه وهو الاقرب للصواب لان بن دومان كان يشتغل في الحد في نفس النقطة ابرق
الكبريت وقف في حلوقهم وردهم وهو شاعر مهوب سهل وهو عبد وكلنا عبيد لله واتعب المهربين وكانو يهربون التتن بين السعودية والكويت مع مركز ابرق الكبريت

ومنها مح التحفظ على ترتيب الابيات

من يسب الهاف جعلة فدوتلة=جعل يفدنة غنادير البناتي
لازهمت الهاف جاك الهاف كلة=تقل يشرب من غراش المسكراتي
كم شراع للسواحل قطعنة=قطعنة والتواير مسرعاتي
أبرق الكبريت لازم يسهجنة=يسهجنةمقبلات اومقفياتي
ياهل الهافات زيدوا سعرهنة=لاتغالون الثمن بالطيباتي

ولسعيد بن دومان مجموعة من القصايد يتراد فيها مع المهربين وكان يقول عنهم ونعم الله ربي وربهم

[مسلط 22]

بسم الله الرحمن الرحيم
الاخ العزيز ابو محمد القباني السلام عليكم ورحمة الله وبركاته وبعد الشعراء الكبار مثل بندر بن سرور شديدي المحاقظه على الروي والردف والقافيه في الصدر والعجز اما البيت كم شراع للسواحل قطعنه وما بعد فمن قصيدة اخرى مشابهه مع اختلاف الثلاث الاحرف الاخيره من الصدر واليك قصيدة اخرى لسيارة رجل من رجالات سبيع اذ اشتهر بالقرامه والدلولا وحسن الخلق فكل من سافر معه مدحه الا وهو مبارك بن بطاح راع القصر المشهور بالرس من ارض القصيم قال الشاعر
ياراكب زينة المرواح مكينته وارد العامي
سواقها مبارك البطاح ومعاونه صالح النامي
الى مشوا خاطري مرتاح لاشالوا الفن ما انامي
العصر من قصر ابن بطاح والصبح من بين الاعلامي
والمقصود اعلام الحرم المكي الشريف وانت سالم والسلام

[ابومحمد القباني]

الخ الفاضل مسلط صدقت والله الاختلاف واضح في البيتين الاوله (له ) وباقي الابيات (نه )

[مسلط 22]

بسم الله الرحمن الرحيم
الاخ الفاضل العزيز ابومحمد القباني سلمك الله احيي فيك حسن ذائقتك الشعريه للتقارب بالوزن العام البحر بين القصيدتين والاختلاف في الصدر وانت سالم والسلام

[ابومحمد القباني]

اخي الكريم والفاضل مسلط جزاك الله خيرا على اطرائك ومنكم نستفيد طال عمرك

ويبدو لي ان الابيات الثانيه هي للمهربين لانه لهم مساجلات مع حرس الحدود وقصيد وخاصة مع سعيد بن دومان ومن قصيدهم ان بن دومان اول ماتعين كتب هالقصيدة للمهربين يقول فيها

ياهل الهافات عنتـر نـاش جاكـم=وا عنا من صادفه بأرضـن خليّـه
لعنبوكـم هونـوا جاكـم عناكـم=جاكم الموت الحمر ماهـي زريّـه

وهي اطول من ذلك وموجوده



وردو عليه المهربين واحد يقال له الكحيلي يقول فيها

ياهل الأبرق تبّين لـي خطاكـم=والخطا راعيه يقنـع بالخطيّـه
يا عوينـك وارد الستّـه لفاكـم=وعنترك خربان والخمسه رديّـه
كم ونيت ٍ لا كمل حمله وطاكـم=وقاعد ٍ بأرقابهن تثنـي الهديّـه

وهي اطول من ذلك وموجوده

واراد الله وطرح بن دومان وخوياه العسكر موتر الكحيلي يوم زانت لبن دومان ويرد عليهم يوم يقول

يا سلاح الحـد يـوم الله عطاكـم=لا تهابـون الخطـر والمخطريّـه
خلوا الرشـاش مركـوز ٍ حداكـم=والمخازن وسطها النـار الصليّـه
يالكحيلي وارد الخمسـه خذاكـم=وستّتك مع حملته مـا راح نيّـه
ربعنا صادوه عانـه مـن وراكـم=ما مشى ياكود ألـف وخمسميّـه

وهي اطول من ذلك وموجوده المقصود ان قصيدهم واجد لكن بيوته زينه وهم اكثر من قصد في الفروت في ذلك الوقت
وتقبل تحياتي اخوي مسلط ولايهون زوار الموضوع

[مسلط 22]

بسم الله الرحمن الرحيم
الاخ ابومحمد القباني حفظه الله لاهل الفروت ادب خاص بهم كما كان الهجيني لاهل الهجن وهوادب يستحق الاهتمام وسابحث لك عن مقتطفات منه ان شاء الله وانت زدنا مما اعطاك الله وانت سالم والسلام

[مسلط 22]

بسم الله الرحمن الرحيم
من مشاهير السواقين فهيد ابو صدام
يااحول افهيد ابو صدام جن الحنا تر وخلنه
الناس ناموا وهو مانام يلعي كما تلعي الشنه
وانتم سالمين والسلام

[ابومحمد القباني]

اخي الفاضل مسلط السلام عليكم ورحمة الله وبركاته
جزاك الله خير على ماتفضلت به وذكرتني الحناتر والمقصود بها للمايعرفها من الزوار المواتر السيارات
ذكرتني بقصيدة اخبرني بها شايب الله يرحمه عن واحد من خوياهم وهم في مغزى بن رفاد قال قصيده فيها طاري الحناتر

واركبونا حناتير مجده = صبح ثالث وحنا برض حايل
وشرهونا الفشك ماحصو بعده= والماني عطونها بدايل

وفيه قصيده قالها سهل العتيبي عن الربيع

أنا هواي شف بالي ياخو نوف = سودٍ وبرها زايدٍ بالسوادي
لاجيتها صدري من الهم مكتوف = كني بليلٍ من ليال العيادي
خصً ليا جا للهافاهيف هفهوف =وقام السويبع للمنادي ينادي

الى ان قال

زهابهم فوق الحناتير ملفوف= وقامو يبارون الدبش يوم قادي
أناستن ماينتوصف لها أوصوف= يطرب لها شرس الرجال الحيادي