ابن حثلان المداريه وبن جلوي

[ماضي المديري]

هذي القصيدة من احدى قصايد الشاعر / حثلان بن سمّير المدارية السبيعي رحمه الله في الامير /عبدالله بن جلوي ال سعود امير الاحساء ..وقبلها قصة ..وهي اول معرفه بينهم ...عندما نزل ابن جلوي على قبيله سبيع ....نزل على جار لحثلان كان رجل كثير المال ولكنه بخيل وقد استضاف ابن جلوي على (تيسين) ...فما كان من حثلان الا وان طلب من الامير ان يستضيفه في بيته واجابه ابن جلوي لذلك ...وقام حثلان وكعادته رحمة الله (يعد من اشهر سبيع في الكرم ...وله قصص مشهورة وقيلت فيه قصائد كثيرة) ..رغم قلة ماله بذبح (حائلين من الغنم) ..وكانت في ذلك الوقت قليل من يذبحها ..وبدأت المعرفة وبعد مرور عدة سنوات حيث استقرت الامور ..وتولى ابن جلوي على الاحساء كأمير ..ذهب حثلان الى الاحساء (مديد) والتقى صدفة بجاره ..وقال له جاره نريد الذهاب لأبن جلوي للسلام عليه ...قال حثلان (ماجيت فالحسا الا وبسلم عليه) ..بعد ماذهبوا لقصر الامير واحتفى بهم ..طلب الامير من (سبعان) وهو عبده ان يأتي (بحائلين) ويضعهم على صحن ..ويأتي (بتيسين) ويضعهم في صحن ...وفعل ماطلب الامير منه وبعد ماقاموا على العشاء ..كان حثلان يمشي وبجواره جاره فمنعه العبد من التقدم الى الصحن اللي فيه حايلين وجلسه على الصحن اللي فيه تيسين واخذ بيد حثلان وجلسه على الصحن اللي فيه حايلين وقال يقول عمي الامير عبدالله بن جلوي ...سموّا الله يحييكم على ماقدمت يمانيكم ...وامر لحثلان (صرف عوايدله والى ابنائه) ..ولم تنقطع الا بعد وفاة ابن حثلان الشاعر المعروف فالح بن حثلان سنه 1412 رحمهم الله جميعاً ...وهذه القصيده واحد من عدة قصايد له في الامير عبدالله بن جلوي ....يقول حثلان :

ياراكـب ٍ درعيـة ٍ تقطـع البـيـد=بنت الخطل سمـرٍ رثـوع ٍ معنـاه
تفـد فديـد الربـد زيـن التفـاديـد=تشدي ظليم ٍ صاعه الملـح واخطـاه
تلفي شجاع ٍ فالحسا مثـل ابوزيـد=عد الروى من جاه تشرب ضمايـاه
ابوفهـد نمـر الاسـود المحـاديـد=مودع ولد سرحان يرتع مـع الشـاه
خزمّ فحول الزمل راحـت معاويـد=مراجع ٍ تمشـي مـع كـل منحـاه
وهجر جميع الحصن زود ٍ على القيد=والكل دنـق مارفـع سيـر علبـاه
ابـوّه واجـداده شيـوخ ٍ بوالـيـد=حكام نجـد مطوعـة كـل منجـاه
منهم جموع دهـام ذهبـت تواكيـد=خلايق ٍ ذهبـت مـع كـل مضمـاه
ربيـع للخاطـر كمـا ليلـة العيـد=داف الشحم بصحون (سبعان) تلقـاه
ولامنّ ومر سبعـان بالعلـم لرشيـد=عطيّتـه مـاقـط فيـهـا مــراواه
تخص سمحيـن الوجيـه الاجاويـد=منافـعـه ف بيوتـنـا لاعدمـنـاه
لعل بطـن ٍ شايلـه وارضعـه ديـد=عساه فالجنـه علـى طيـب ملفـاه
هذا جواب ٍ فيه لااكـذب ولا ازيـد=من عند حثلان وعط الشيـخ يقـراه

---------
الخطل : بعير مشهور للامير بن جلوي

منقول من فالح بن راشد بن حثلان المداريه
" مشرف النداوي الأدبي

[خالد الشماسي]

شكرا لك أخي ماضي على هذا النقل الرائع



والله وألف نعم بحثلان بن سمير المديري




وتصرف الأمير كان لإكرام حثلان وتفضيله



لا هنت