Untitled 1
 
  تريد فيو (اخر مشاركة : ارينسن - عددالردود : 0 - عددالزوار : 350 )           »          كيفية شراء الاسهم الامريكية الحلال (اخر مشاركة : ارينسن - عددالردود : 0 - عددالزوار : 453 )           »          افضل شركة توزع أرباح في السوق السعودي (اخر مشاركة : ارينسن - عددالردود : 0 - عددالزوار : 588 )           »          حساب سعر الصرف (اخر مشاركة : ارينسن - عددالردود : 0 - عددالزوار : 797 )           »          قصيدة رثاء في حمد الحضبي السبيعي (اخر مشاركة : عبدالله الحضبي - عددالردود : 0 - عددالزوار : 683 )           »          قمصان نوم تركي (اخر مشاركة : ارينسن - عددالردود : 0 - عددالزوار : 599 )           »          فستان مناسبات (اخر مشاركة : ارينسن - عددالردود : 0 - عددالزوار : 612 )           »          جلابيات مغربية (اخر مشاركة : ارينسن - عددالردود : 0 - عددالزوار : 629 )           »          ايشارب حرير (اخر مشاركة : ارينسن - عددالردود : 0 - عددالزوار : 543 )           »          رسوم الحساب الاستثماري في تداول الراجحي (اخر مشاركة : ارينسن - عددالردود : 0 - عددالزوار : 956 )           »         
 

 
العودة   منتديات سبيع الغلباء > منتدى تاريخ الجزيرة العربية > تاريخ الجزيرة العربية
 

تاريخ الجزيرة العربية كل ما يتعلق بتاريخ الجزيرة العربية منذ القدم وسكانها والوثائق التي تخص الحكومات المتتالية عليها


شايع بن مرداس-الراوي طلال العروج

كل ما يتعلق بتاريخ الجزيرة العربية منذ القدم وسكانها والوثائق التي تخص الحكومات المتتالية عليها


إضافة رد
 
أدوات الموضوع
 
غير متصل
 رقم المشاركة : ( 1 )
الراشد2010
عضو
رقم العضوية : 43535
تاريخ التسجيل : 23 - 07 - 2010
الدولة : ذكر
العمر :
الجنس :
مكان الإقامة :
عدد المشاركات : 8 [+]
آخر تواجد : [+]
عدد النقاط : 10
قوة الترشيح : الراشد2010 is on a distinguished road
الأوسمـة
بيانات الإتصال
آخر المواضيع

التوقيت
شايع بن مرداس-الراوي طلال العروج

كُتب : [ 06 - 12 - 2010 ]

بسم الله الرحمن الرحيم

السلام عليكم ورحمة الله وبركاته ،،،

مجالس الرمال الرسمية كان من اهم خططنا وتركيزنا على مافعلوه الأبطال في الماضي عن تاريخهم المشرف تاريخ رجالات الرمال الذي دائماً مانفخر بهم ونعتز بهم ولو لم يكونو من الرمال لا تمنينا انهم رمالات 0
وكان من ضمن الخطط هي الرواة على مستوى الرمال وشمر عامه وسوف يكون لهم حضور جميعهم بسوالفهم الطيبه والمشرفه وسوف نثري هذا المنتدى بكل السوالف الحلوه وانتظرونا فقط ومالكم الا الي يرضيكم

واليوم اولى زياراتنا وهي للراوي / طلال بن رميح العروج الرمالي
وهي الجزء الأول من الحلقة الأولى للراوي

ومن زود محبتنا للعيون الي بتابع وضعناها مقاطع فديو بالصوت والصوره والكتابه يعني كل شي مهيئا لكم :


تفضلو يالغالين

هنا المقطع بالصوت والصوره اضغط على الرابط ويفتح لك صفحه وحمل المقطع منها والقصه كتبت ايظاً على نفس ماقيل بالمقطع الفديو من الراوي 0
http://www.gulfup.com/do.php?id=3606795 اضغط هنا


قصه شايع الامسح مع ابن عريعر
كان عنده قصيرا له عنده فرس اصيل وجا مندوب ابن عرير يشري خيل
وقال مابيعه الا بمثنوي ووافقك مندوب ابن عريعر على المثنوي
وكفل شايع على المثنوي ويوم ولدت الفرس جاء راعيه يبي المثنوي
وعيا عليه حماد ابن عريعر ورجع لشايع حاول به شايع ماقدر
ماتجاوب معه ابن عريعر وقام يلوم عليه راعي الفرس قال ان الله اشا واراد
الا اجيب فرسه الحذره واسقه لين يجي مثنويه سمعه واحد يتملح عند ابن عريعر وعلمه
وعلمه وقا ل صحيح اذا قال يفلعه بس حطو عنده حرس وحطو عنده حرس وشايع مادري
انه معلم ابن عريعر جا يبيه على ماقعد عند الفرس يحل رباطه الا الحرس له وهم يمسكونه
وجابوه لأبن عريعر وهو يسجنه
وشايع من وين جاه
من هالديار
وبعارين ابن عرعير وين مكانه
يم الحسا لاكن حاطم الجزيره كله ابن عريعر
وسجنه سبع سنين ويانامو الناس قعد يغني وخذا له فتره وهو هدا عن الغنا
قال اظنك ايست يا ابن رمال وقفت عن الغنا قال لا والله عشان وليدن لي اول عوجاً سوالفه
وهالحين صبيا زلت عجايفه كان فيه خير هو من الربع وكان مافيه خير مايسوى توجدي عليه
قال ابن عريعر افد حالك
قال شايع بهالكثر من البل
قال ابن عريعر لا ابي اباعرك كلك وخيرك كله
قال ياعطيتك وخيري كله وش اقعد عليه لا ما اعطيك ياهن
قال ابن عريعر زاد اجلس بهالسجن قال شايع هذا انا جالس

يوم كمل سبع سنين وجت الثامنه يمار هذا ولده الي يتوجد عليه على شبته وبالليل دخل عليه
وهو يحب ابوه وهن يكبن دموع الولد على وجه ابوه قال ياوليدي مالك بي حيله
قال لا ان شاء الله لي حيله قال ماابي حيلتك قال وش تبي
قال ابيك تلقعه مثل مالقعن عليك عنده اربع حريم ومارزقه الله الا بولد واحد وككل ضناه بنات
والليله من حسن الحض ماهو عند ام الوليد هذاك بيت ام اوليد خذه وتقاض لي
قال ابشر بس انت ايمر وانا انفذ وهو ينسل على المره يما غرقانه بالنوم وهو يسل الوليد
ماحست به وهو يمر ابوه قال ولدي ترهم يجونك يطلبون لكن استعسرهم قل بنياق المغاتير
ميه وضحا والخيل الفلانه والفلانه يعدد اساميهن له والفرس الي عليه المثنوي والحذره فرس ابن عريعر
يمشن على زل من الحسا يما يجن النفود شمالاً من حايل ترا كل ماطلبت يعطونك ..تراه مايستانس بالمجلس
الا عنده هالليد ياولدي بس استعسرهم وهو يروح
اصبحت المره يمار مهو عنده الولد تحسبنه على العاده يم ابوه ابوه مايستانس بالمجلس الا هو عنده
جا الضحى ماسمعت له حس ولاشافته طلع وهي تسعلهم عنه قالو ماجانا قالت وهو ما اصبح عندي
وهي تقوم قيامتهم ركضو نشدو يما عزلو من الدوره لاعلم ولاخبر
يوم جا اخر النهار يما ابن عريعر يتذارفن دموعه وهو يضحك شايع قال وش يضحكك قال اضحك على دموعك
تضحك علي يوم انا اغني واتوجد على ولدي وانا هالحين اضحك على دموعك قال جت لك يا ابن رمال
قال ايه جت لي جا ولدي الي اتوجد عليه وشلعه العشا البارح وهالحين يقرصون اذانه عيال سنجاره بالنفود شمال حايل
(مثل الخرنق الي يقرصون اذانه وتقامز)
وشلون قال هالون
سمعت الخبر ام الوليد وهي تفوع وتفك الحديد عنه وتجيب له كسوه ياخي ياشايع رجع لي وليدي قال انا ماخذيت وليد انا سجين عندكم
شوفو الي خذا الوليد واطلبوه منه ارسلو مناديب بأثره يوم جو يمار حاشم الليد ومكرمه عنده قال مانعطيه الا بميه وضحا من نياق ابن عريعر
والفلانه والفلانه والفلانه من نياق ابن عريعر والفرس الي عليه المثنوي وابوي على الحذره فرس ابن عريعر ويمشن على زل الخيل من الحسا
يما يجن بالنفود شما ل حايل وعلمو ابن عريعر ان نقص من هالشروط شي والله اني لا اقص راسه بهالسيف والله انه مايناديه بسمه غير ماناداه
رجعو يم ابن عريعر وقالو مكرمن الولد وعنده مابه خلاف لاكن هذي طلباته قال منين زل يكسي هالصحرى من الحسا يما نجي حايل مابهالدنيا زل يكسي هالصحرى
اما المال قد مايطلب نعطيه قالو والله حلف يمين ان نقص من شروطه شرط الا يقص راسه قال كلش ولا قصه راسه بس وش نسوي وش الحيله
قالو مامن الا ابوه نتوجه عليه يتوجه على ولده يحل مشكلتنا مع ولده وهو يجون توجهون قالو ياشايع حنا بوجاهتك عند ولدك يطلب قد مايبي من المال
اما الزل مافيه زل يبي يكسي هالصحرى من الحسا ليا حايل قال تهون ان شاء الله انتم طلبتو وجهاتي احذو الخيل على زل واحذفوه وانه ماوطت الا على زل من الحسا
يما جتك حطو قطعه زليه مابين الحذوه والحافر وهو يتم يمينه وانتم تحلفون على صدق قالو بيض الله وجهك هذا الحل
وهم يقطعون اكا الزليه ويحذون الخيل وهو يركب على فرس ابن عريعرشايع وام الوليد شدو له الذلول وتركب معهم يما جت وخذت وليده وتروح
يقول شايع





انا ابن مـرداس فتـى الجـود شايـع
اسقيـت عدوانـي بكـاس الـغـلال
الخفت الضواري ليا ادلجت نازح الخلا
دشـاش غـواص البحـور الهوايـل
السيف يشهد لـي ويشهـد لـي القنـا
ان جاء عـدو الـدار للـدار صايـل
وليـا حكـو بخيارهـم عقـب فعلنـا
قالو ابـن مـرداس راعـي الفعايـل
انـا عزيـز الجـار ماادسـت زلـه
ولامـره دسـت الخـنـا والفشـايـل
انـا عرضـي نقـي مــن الخـنـا
انـا صفـي الكـف راعـي الجمايـل
انا من تالـي جيـل بذالـت الصخـا
واهـل الصخـا ماباقـي الا قـلايـل
خذيت سبع سنيـن فـي سجـن خيـر
والثامنـه جانـي صـدوق الفعـايـل
جانـي غـلام مابعـد خـط شاربـه
ولاصار في قلبه من الخـوف جايـل
ودنق علي مضنـون عينـي واحبنـي
ودموع عينـه فـوق وجهـي شلايـل
وانـا الحديـد بسـاق رجلـي مغلـق
ربيـط كمـا حـر شبـك بالحبـايـل
تعيش ياشبل سطـى بـليلـه الدجـى
علـى ولـد شيخـاٌ فعولـه هـوايـل
سطى وشال الورع مـن ربعـه امـه
من حضن زين الوصف شقرا جدايـل
حديتـه علـى درب صعيـب ولاهبـا
جاب الـذي ضجـت عليـه القبايـل
شاله وجا مضنـون عينـي وادعنـي
وجلا عني مـر علـى التسبـد جايـل
شالـه علـى قطاعـة الـدو وجـنـا
مايلحقـنـه نـــدلات الـسـلايـل
واقفى على الوضحى كما الهيق وصفه
تشبه لهيق مـع شفـى الريـع زايـل
ربطني كبير الجـاه يطلـب فطايـري
وضـح ربـوب ديـار غلبـا جلايـل
ويطلب جوادين مـن الخيـل غيرهـن
يعرفنهـن مـن مكرمـات الاصايـل
وعيو بهن زوبع على اويضـح النقـى
وفكـو رباطـي مقحميـن الدبـايـل
من عقب ماني حاصر الرجل عندهـم
جونـي سريـع يطلبـون الجمـايـل
وجتني حليلـه ليـث هجـر وشيخهـا
تشـق هـدوم الغـي والقلـب جايـل
وقلت ابشري بأبنك مع ابنـي وديعـه
يغنيـه عـن لفـح الشتـا والقـوايـل
وفكت ربـاط سـاج ساقـي بحجلـه
تحملـت شيـلـه سينـيـن طـوايـل
ودنو لها حمـرا مـن الهجـن عيـره
وشالت وركبت فـوق زيـن الظلايـل
وانا على اللي يـوم احلـي وصوفهـا
ريمـيـه ومنقـيـه مــن خمـايـل
فرس لمن حما بيض الحباري عن الما
شيخـا تخاضـع لـه شيـوخ القبايـل
تاطـا علـى الديبـاج بأربـع زيونهـا
من خيل قحف ومـن كبـار الشمايـل
خـذا بثـار ابـوه وعمـه وعزوتـه
ناهض وطمل راس مـن كـان عايـل
عسـى غـلام مافعـل فعـل والــده
تسفـى عليـه مسهسـلات الرمـايـل
يعيش ابن مرداس مع وسط كاز العـلا
فعـل مبانـي مـن كبـار الحمـايـل
قرم نفل بالفـوز مـن جـاي غصـه
من سـاس قـوم يدرسـون الفضايـل
وبالمصطفـى لنـا عـروق وعـزوه
والافعـال مـنـا ثابـتـه بالـدلايـل
وهـذا صلـى الله علـى سيـد المـلا
اعـداد مـا ناطـت بـروق المخايـل






سوالف شايع منا حلوه وحوادثه كله حلوه




وهنا قصة شايع الأمسح مع ابو ثنين

هنا المقطع اضغط لاهنت
http://www.gulfup.com/do.php?id=3609411

طيب يابو بندر
نبي سالفته مع ابو ثنين
سالفته مع ابو ثنين صار قصير لأبو ثنين يمار معروف الله ما خلق له عين ولا حجاب
ويوم جاء ما يبيهم يعرفونه نزع له وبرتن من البعير وحطه على عينه وحزمه
قالو وش علم عينك قال ضربته له هدبة شجره
قالو وش اسمك قال اسمي لباد
ويوم خذاله فتره تنبه وزى بن عريعر وقال يالامير
هو صار فداوي يشتغل عندهم يروي ويحط على النار حطب
ويوم نبه بالمغزى قال يالامير ابيك تسمح لي اغزي معكم ماني جالس عند الحريم
قال ان الله رزقنا بفود اديك حقك وانت عند اهلك يا لباد
قال شايع ماني جالس عند الحريم ابيك تسمح لي اخاويك
ويوم جو المغدى وغدو
قال ابيك تسمح لي اشارك احد الربع وضيفته قال من تبي
قال يبي .... وان اله عطاه شوف ما احد يشوف مثله
اركبه وشاف له ذودين يمار هذنكم رعيانهن واحد على له بكره شعلا ويمار
يوم جاء خوي يمشي وهو يلوح على كتوف البكره يما يشوف النعول ...
هذاك ما يشوف الارض اللي هي به بله منطقه يقولون له الخرمه بجنوب الرياض
ما علم الصبيح ويوم خلص غداهم ويوم جاء وهو ينشد السبيعي ابا ثنين
شفتو شين يا فلان قال لاو الله ماشفنا شين
وقال شايع




ثلاث عيانـن مـن عيـان توايقـن
وشافن على روس الحـزوم انـواه
ياقالـن العينيـن مـا زال زايــل
كـن قالـت العيـن الوحيـده داه
قال والله لو هي خايفه تشمت الملا ْْ
لاقـول فريـق لـرديـف نـعـاه
منـا لأمـام سهيـل عالـي النبـأ
ادنـاه بـايـن والبعـيـد خــلاه



قال انت شايف شين يا لباد قال ايه نعم شفت لي ذودين بالخرما
يمار هم ما يشوفون الخرما كذبوه بعض الناس قال ناصر ابوثنين
هذا اجنبي ما ندري هو صادز يقول انه يشوف النعول هذا شي بعيد عن حدود العقل
وهم ييمشون المغدى يمار مدمس الليل قال نوخو بهذا يمار صار هو
اللي يشكلهم الحين هو اللي يشكل ناس يمشون من هنا وناس من هنا
ولقو البل يمار هن بس ا الذودين مسك الرعيان انت يابو ثنين ونشدهم
قال انتم مترادفين بعير الضحا قالو اي والله ترادفناه
قال وشلونه قالو شعلا قال الرديف به نعول ؟ قالو ايه
يمار هذا كلام اللي يقوله صحيح ما فيه شي زل به
جاء يبي على جال العاده يبي يحط الحطب على النار
قال




لـبــاد مـــا هـــذا مـحـلـك
علمن منين خلك كل حي له مع البيدا سنام
انت من نجد النجود ولا من اهل النفـود
ولا مــن اهــل دومــة بالشـمـال




قال




منسبي معروف من صلب العرب
من بني هاشـم حفيـد المطلـب
يا تنازا الزول مع ريد السهـال
من على بيت الغفل نـد الطفـل
واطلبك حسن الجوارليا حصـل
وبالوغا نعرف بصولات النـزال



قال ونعم يا صرت ابن رمال ليه كاهمن حالك علينا قال ضروف الزمان
قال الله عطاك سبيع اظرب به الشرق والغرب وقام يغزي بسبيع يما جمع له حلال ورجع لأهله
فيه ناصر ابن جمل قحطاني مع سبيع تزوج على مرته الاوله خذاله بنت عليه عق ما كبر والله يوم قامت تدادي مرته
يامنه وخذ عليه
قالت وش انت آخذ جليك آخذ بنت شايع الأمسح قال ان الله اشا واراد الا اجيبه
وكان عنده جمل نصيح ما بالجزيره مثله وهو يركب جمله وو يجي يم النفود بهذا
وهو يتعزب قالوش اسمك قال اسمي علي ولا هم يا جاهم الغريب ما يسألون الا عقب
ولكن ابطأمعهم من الشتاء ليا ياوالله جمله ما ينزل شداده منه
ويسوون له قدين بطانه قد وعقبه قد ورجلينه قد ما تحكمه الحبال
ومع بنت شايع وبنت شايع هي راعية الزرف ويوم خذت ياوالله يوم جته البل ليا والله ذلول
ابوه الوضحا فاطر ويوم جته قالت ابيه تعشر من الجمل الحر
ويوم جت وهي تعلم ابوه وقال يا يبه انا ظربت جمل ضيفنا الوضحا قال عوذا كيف سويتي
هذي خيانه والله من تطلعين محنته كيف تظربين جمل ضيفنا وحنا ما استسمحناه
قالت والله يا يبه اسمه اللي صارت ظربته الحين وهم حول خب السطيحه
ويوم جاء تالي النهار ويو يتبعه هو والجمل معه وعليه الشداد ما ينزلهن
وهو ينوخه وهم بالمغيرة اللي بشرقي خب السطيحه
وهو ينوخه وهو لك يكرب عليه وهو يثنيه قال تعالي اطيلي على الجمل قوي هاتس
ويمار هي آمنتن به من الشتاء وهو عنده
وهي تجي ويوم جت وهو يكمشه وهو يربطه عليه ويحزم قرونه بالمصاليب ورجليه بالقطاب
وهو لك يطلق عقله ويخطو مار ثلاثة ابواع بطنه يمار متقبل الليل تالي هانهار ويروح
ويوم جاء اليل يتحرون البنت ما جت دوروه بهالليل ما لقوه يوم جاء الصبح وهم يفزعزعون مع اثره يمار مهم حوله
قال ما حنا لاحقينه لكن ابي اعرف العرب اللي هو يلفي عليهم وراح وهو يقضب اثره ياما جاء سبيع لياوالله هذا راعي البل
قال ما مرك رجال معه انثى قال الا والله مرن قال منهو قال ناصر ابن جمل لياوالله يخبره قال انا هالحين قومان وهو يرجع
عشرت الوضحا جابت بكره ويخلي امه هجلن عليه والسنه الثانيه يحيل عليه ناقتين والسنه الثالثه يخلي عليه ناقه يحيله عليه
يمار طيب اصل وطيب غذاء يوم غدت مهي شكلا الحلال يوم شافه ثنيه وهو يعسفه وهو يجيبه عند ركاب ابوه وهو ينوخه
وهو يخبطه يمار بحد الرجم وهو يحط عليه رجوم ياولله قاصرتن عن مقماز ابوه قال بنيته يا يبه صارت رباع يوم صارت رباع
ونوخه عنده يمار متعديه بوعين وهو لك يركب وهو يجيك ويوم جاء يما ما يعرف اللي به بنت بهالليل وهو يقوم يعوي وعرفت صوته
وتقوم تغني
قالت




ياذيب وش عواك جوف الذيابـه
صيدك طمع وانت جيعان ياذيـب
عندي طبيب عواك مابـه غرابـه
فاتن ثلاث سنين فوق المراقيـب
والرابعه ياتي قضـى ماقضابـه
والخامسه والسادسه لي غواليـب
كان انت جيعـان تبيلـك ذوابـه
خذ العشاء من بير مد المعازيـب
ترا العشاء يا ذذيب وسط الهيابـه
حدر الكواسر والرفاف المهاديب
وكان تبـي مـن دبشنـا جلابـه
تراه من خشـم العليـب تغريـب
معه الجمل في ما حمل واعتنابـه
واهل الرماح مجدعين المضاريب
وكـان تبـي بالمدينـه نهـابـه
عندي دوا عينك عريض الشباشيب


عرف البيت اللي به بنته
سمعته العجوز ام ناصر
قالت




يابنت صوت الذيب عندي تشابـه
واخاف من وجهك يصيبه لواهيب
الذيب حذرى لا يعضـك بنابـه
ويعيبك جوف البنات الرعابيـب
لا يجعلك مثل خطـات الجلابـه
يحافها الشاري لقابهـا عذاريـب



قالت البنت




يا عجوز الخيـر بهرجـك مثابـه
انا عفيفه ما بعـد عضنـي ذيـب
اعف مـن مـي عـذذي شرابـه
ما وردته بالقيض هرش العراقيب
ابـوي جيـاب الكسايـب نهابـه
يا جاء توالي الليل حذف المشاهيب



هجعن يوم انهن هجعن ونامن لياوالله هذهو يوم جاء ويهمز راس بنته
قالت يبه وشي جابت الوضحا قالت جابتله بكره وشي من ابوه قال زادت عليه
بوعين قالت يبه انا ما اقاضيك بطني مليان والفراش به ولدين
لكن هذي بنته كل شيوخ سبيع جو يخطبونه كل شيوخ سبيع وعيابه عليهم مثل عنود الصيد
قال ايه بس وش يطلعه لي قالت انا اطلعه بس وين ذلولك قالت رح انا اجيبه لك
وهي تجيه وهي تقعده فلانه فلانه ابوك صاد له ضبيين يقول ما يشبعن العرب
ويقول هاتنهن بالليل لا يشوفهن احد حيلت به
يياما جابته له وهي تربطه معه قال صيحي لهم الوضحا ما يلحقه لا خيل ولا جيش
وهي تصيح البنت خذاه شايع الامسح وهي تفزع القومان بأثره يشعلونه بالليل
يوم اصبحو ياهي هذيك هي قدامهم على قفا الذلول وهو يمزعه من قدامهم
ليا والله يوم نهجت وخلت الخيل ويوم ابعدت عنهم وهو يهديه يما يقربون يوم لحقو
وهو يمزعه قدامهم ويوم جاء الضحى لياهذا ابوه جاي على الجمل يوم اقبل عليه
ويمزعه قدامه والله يوم رااحت ثلاث مرات على هلون قال ياشايع تقاضيت
عليك الله وامانه تعال املك لك عليه ومرتك اندحت به وهو يرجع يتسالم هو وياه
وهو يملك له عليه ويدخل عليه وتخذ عنده له ايام ويخليه وهي تجيب ناصر جد القرنه
سمته أمه بأسم ابوه




قال الغفيلـي واللـذي مـس حبلـه
على قفور قود مـن خيـار الزمايـل
رجيت انا وضحا رجاء راجي الرجا
والحمـد للبـاري كريـم الفضايـل
خليتـه عـام وهـي ترضـع امـه
وعـام مغيريـن وعــام بحـايـل
وعـام ترجيتـه وعــام عسفـتـه
وعام تسـودي فـي الرديـف حايـل
يمار غدا مـا يلحـق العـوص بـده
ولا يلحق المشعـاب ملـو الشمايـل
تر كن يـد الوضحـا وليـا نزرتهـا
يد صانع يرجـي العشـاء بالعمايـل
ولا يــد الـبـذار يشـلـع حـبـه
بالقيـض حاديهـا سمـوم القـوايـل
تسمـح صريـر الكورحـدر فوقـه
صرخه تدشان فوق هـدف المحايـل
تر كن بنـات البـدو يمشطـن ذيلـه
حـدر مـن العرقـوب غـاد فلايـل
وش عاد لو لحقة المطلب بشبة الضوا
وخيـل تعاقـب حاميـات الشعايـل
تـر كنهـا بالحيـد الادنـى نعامـه
وبالحيد الااقصـى زايـلات زوايـل
عليك ورا خذيت من البيـض عنـدل
بنـت الشيـوخ موشريتـن الفتايـل
من من اعتدى نجزاه بالعد والاعتـدى
ومن يطلب الحسنى جـزاه الجمايـل
ثار بحقـي مـا علـي فيـه لايمـه
وبالمثـل نجـزى بالبديـل البـدايـل
بنـت الجمـل ثـار لبنـت الغفيلـي
ولنـا فـي ردات الصمايـل جمايـل




وسلامتكم


اضغط هنا ياتاج الراس على الرابط للتحميل


http://www.gulfup.com/do.php?id=3607754
سوالف شايع منا حلوه وحوادثه كله حلوه عندي قصيده بس ما اعرف حادثته
اللي يقول ::




احب الوفا واتعب على الطيب والوفا
وعرضي من الدرب المعيب نظيـف
اعشي الجيـران واكـرم ضيوفـي
بوقت المجاعـه والزمـان كسيـف
ياما غزيت وجيت بعيرات النضـو
يا ما غـد(ن) قفـوي لهـن زفيـف
انا سبره من القـوم وانـا عقيدهـم
وانـا الدليـل وباللقـاء ضرفيـف
ادل الوعد واضوي على عزبةالعـدا
واسطي علـى قـوم لقـاه يخيـف
وكم شيخ قـوم بالملاقـى جدعتـه
بيـوم صعيـب والقتـال عنـيـف
وانا من اهل الضلع الكبيـر البيـن
اللـي علـى كـل الجبـال منيـف
اللي سكن به قبلنـا حاتـم الصخـا
وبيتـه قبـل للغانميـن مضـيـف
ومشتلـه بـرا مـن الدقـاق الليـن
ليامـن نصـر الشـمـال يشـيـف
سقـاه مـن نـو الثريـا مخخايلـه
سيـل علـى كـل الديـار مطيـف
تكافل بدونه ليـن تسخـف جوانبـه
تلقـى سماليـل السلـيـح تقـيـف
دار بهـا ربعـي ينابيـع الصـخـا
حمـد موربهـا بـكـل رهـيـف
وعن طرد الاجناب مـا ياصلونهـا
وعيينا بها علـى محمـد الشريـف
بايماننا الزرق العتل عدلـة الجنـب
واطرافهـن ريـش النعـام يغيـف
وان بن مرداس من فتى الجود شايع
مـا صـارت يـوم للهزال وليـف



تابعونا بالجزء الثاني من الحلقة الأولى

المعدين لهذا العمل
مؤسس مجالس الرمال جميل بن مطير ابن فاران
والجندي المجهول علي بن عوده العلي الرمالي
والأستاذ/ رمضان فاروق احد اعضاء مجالس الرمال من جمهورية مصر العربيه
والمشرف / مفضي بن حمود المفضي الرمالي



منقول من جالس الرمال


رد مع اقتباس
 
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
طلال العروج-شايع ابن مرداس الراشد2010 تاريخ القبائل العربية 0 06 - 12 - 2010 20:12
طلال العروج-شايع بن مرداس الراشد2010 تاريخ الجزيرة العربية 0 06 - 12 - 2010 20:10
سالفة ضيعة ذلول شايع ابن مرداس الراشد2010 تاريخ الجزيرة العربية 0 06 - 12 - 2010 20:03
شايع بن مرداس الرمالي الراشد2010 تاريخ الجزيرة العربية 0 06 - 12 - 2010 20:00
من هو العرني ? arnisaleh منتدى التاريخ والأنساب 7 13 - 12 - 2005 14:38


الساعة الآن 23:03.


Powered by vBulletin® Version 3.8.11, Copyright ©2000 - 2024, Jelsoft Enterprises Ltd. www.sobe3.com
جميع المشاركات تعبر عن وجهة كاتبها ،، ولا تتحمل ادارة شبكة سبيع الغلباء أدنى مسئولية تجاهها