هاجوس فكر _ الطرق الهلالي_

[حفيد المجد]

اخواني الشعار الاكبر سنا وقدرا مني خالد الشماسي _ ابويزيد والشعار الباقين

بعد التحيه والتقدير على جهودكم السابقه معي اتمنى استمرار نقدكم البناء ولاخلا ولاعدم انشالله

وانا غيرت الطرق هالمره من اجل معرفة مقدرتي الشعريه

يامل عين(ن)ماغفت طول ليلها=من القهر عيّا يوقّف هميلها
سبّت زمان مكدر(ن) دوم حالتي=حالة شقا ولاغير هذا حصيلها
ايام عمري وان حصل لو تجملت=يومين والا يوم يقضي جميلها
هد الزمن حيلي وانا عادني فتى=ياعنك هالدنيا بدالي ثقيلها
ياوقتنا وش فيك ماعاد تستحي=مانبتغي كثره يكفّي قليلها
رفعت من فوقي خسيس وفتحت له=باب السعاده لين حصّل سبيلها
وابعدت عني من عيوني تخايله=عزي لعين(ن)باعدت عن خليلها
ياوقت جاوبني علامك تهدني=كل المصايب دوم حظي عميلها
ياليت بايامك عداله تكفنا=ماهي لعينه للمساكين ميلها
ماكان شفت العين والقلب في قهر=ولاكان روحي منك يزداد ويلها
هاجوس فكر(ن)وا كتبه كود ينجلي=وقصر الرساله كافي(ن) عن طويلها
بابيات شعر(ن)بالهلالي نظمتها=ونقّيت من وسط القوافي جزيلها

وسلاامتكم

[فـــالح السبيعي]

والله ليس إطراءً ولكن أصفق لك على هالمشاركه ممتاز جداا جداا
أنت الآن تجاورت جميع مراحل البدايه وليس لديك أي خلل في الوزن أو في القافيه
وأكثر ما أعجبني أن مستواك الشعري متصاعد في كل مره تأتي
بمشاركه أفضل ووصلت الآن لمرحلة النقد الشعري وهي مرحله يمر بها أي شاعر متمكن
وبقي عليك إختيار الأفضل والأنسب من المفردات أتمنى لك التوفيق والسداد
نأتي الآن لنقد الألفاظ الشعريه

يامل عين(ن)ماغفت طول ليلها=من القهر عيّا يوقّف هميلها

أعرف أنها مبالغه شعريه ولكن عن نفسي لا أحب بكاء الرجل
بكاء الرجل صعب وحاول ألا تصور هذا البكاء إلا في صوره أصعب
مثل عزاء أو فراق والبيت جميل ووزنه رائع

سبّت زمان مكدر(ن) دوم حالتي=حالة شقا ولاغير هذا حصيلها

هنا مفردة ولاغير الأفضل تغييرها إلى مفرده أفضل مثل وهموم فيصبح البيت بصوره أفضل هكذا

سبّت زمان مكدر(ن) دوم حالتي=حالة شقا وهموم هذا حصيلها

وابعدت عني من عيوني تخايله=عزي لعين(ن)باعدت عن خليلها

وابعدت عني من عيوني الأفضل تغييرها للأفضل مع إضافة واو في بداية الشطر الثاني ليصبح البيت بصوره أفضل هكذا

وابعد ومن بعده عيوني تخايله=وعزي لعين(ن)باعدت عن خليلها

ياليت بايامك عداله تكفنا=ماهي لعينه للمساكين ميلها

كلمة لعينه الأفضل تغييرها للأفضل وأرى أفضلية البيت هكذا

ياليت بايامك عداله تكفنا=ماهي على روس المساكين ميلها

هاجوس فكر(ن)وا كتبه كود ينجلي=وقصر الرساله كافي(ن) عن طويلها

كلمة واكتبه الأفضل تغييرها للأفضل كلمة كاتبه ليصبح البيت هكذا

هاجوس فكر(ن) كاتبه كود ينجلي=وقصر الرساله كافي(ن) عن طويلها

[حفيد المجد]

ابو بندر

الاطراء ماني معلق عليه لانه والله ماهمني

اما بخصوص ملاحظاااتك الهادفه فاشكرك شكر جزيل ولاخلا ولاعدم منك وجعلك ذخر

ولاهنت ولاهان من يقرا

(((((بانتظار باقي الشعار))))))

[أبــو فـــراج]

صح لسانك من زين الى ازين بإذن الله

[{ السويدي }]

السلام عليكم ورحمة اللّــه تعالى وبركاته

شكراً اخوي : سبيعي

ومن مشا على الدرب وصل

وصح السانك

بس خذ ماجا بين قوسين

البارحه كني من الجن ممسوس ***مانيب انا طاير ولا قاضبً قاع

غديت مثل الي دخل حلقه الموس*** لا قادرً بلعه ورده تمزاع

امسا عليه الليل والحظ منحوس *** محرز يصيح وجملة الناس هجاع

ولا صويب بساق بالسيف محسوس *** عوا عوي ذيب ولبتله اسباع

خلوه ربعه بين فارس ومفروس *** كسير ساق ماتمشيه الأضلاع

ولا وجود الي بلا حق محبوس *** لاينفعه بكيه ولا الدمع نفاع

مشراف ربعه قطعة دونه نرموس *** بالهم يشدي سالفة ام سباع

هذا زمانً بدل نفوس بنفوس *** جتنا بلاويه مقاضيب وسراع

شين يخلي صافي الذهن محيوس *** عدله وميله باغينله تسناع

( وقتً كما ذيبً له أنياب وضروس *** واليا أبتسم اعرف ترا الذيب خداع

الي قرصه الداب والليل خرموس *** جر الحبل يجفله والصبح شعشاع

ومن لاتعلم من مقادير ودروس *** خله مع الخفرات يلبسله اقناع )

سويتلي من علم اليام ملبوس *** ستري ليا لمت خبيثين الطباع

ماني على تبع المقفين محروس *** يومً غوا الناس لناس تباع

( العين ورتنا صناديد ونجوس *** والقلب ميز في تواصيف الصباع

ذلك ترا في جنتك دايسك دوس *** وجهنم بعزك بساتين بنواع

الي زرع وردً تبسمله إيبوس *** والشوك يجرح كف من كان زراع

احد بسوق الطيب جلاب ناموس *** عند الرخا والطيب تلقاه ماضاع

وحدً صديع الراس وعروقه إيبوس *** ميت وهو حيً حياته بلا داع

ترا الرجل يصبر على برد وشموس *** والي طواه الجوع بالقل قناع

السيف لابده من الدم مغروس *** ولا تزينبه على رف راع)
.................................................. ...........................................

ودمتم سالمين

[حفيد المجد]

ابو فراج

الزين هو مرورك الكريم

لاهنت

[حفيد المجد]

المشاركة الأصلية كتبت بواسطة { السويدي }

( وقتً كما ذيبً له أنياب وضروس *** واليا أبتسم اعرف ترا الذيب خداع

الي قرصه الداب والليل خرموس *** جر الحبل يجفله والصبح شعشاع

ومن لاتعلم من مقادير ودروس *** خله مع الخفرات يلبسله اقناع )

سويتلي من علم اليام ملبوس *** ستري ليا لمت خبيثين الطباع

ماني على تبع المقفين محروس *** يومً غوا الناس لناس تباع

( العين ورتنا صناديد ونجوس *** والقلب ميز في تواصيف الصباع

ذلك ترا في جنتك دايسك دوس *** وجهنم بعزك بساتين بنواع

الي زرع وردً تبسمله إيبوس *** والشوك يجرح كف من كان زراع

احد بسوق الطيب جلاب ناموس *** عند الرخا والطيب تلقاه ماضاع

وحدً صديع الراس وعروقه إيبوس *** ميت وهو حيً حياته بلا داع

ترا الرجل يصبر على برد وشموس ***والي طواه الجوع بالقل قناع

السيف لابده من الدم مغروس *** ولا تزينبه على رف راع)
.................................................. ...........................................

ودمتم سالمين

السويدي

صح لسااانك ملايين جزله من شاعر جزل

درر درر درر درر

تحيااتي لك ولاهنت ع المرور

[{ السويدي }]

السلام عليكم ورحمة اللّــه تعالى وبركاته

صح بدنك سبيعي

والعذر كاني ماعلقت عليها

لان القصيده اذا مالها بيت قصيد ماتنعاد على أحد ولا تذكر

مثل قول: الشاعر : عبدالعزيز السنافي

لاتشتكي من جور اليام لناس *** وأدفن همومك في ذرا الصمت كله

مثل قول : الشاعر : الأمير : خالد الفيصل

صغيرنا يولد ومجده بيمناه *** اللّــه خلقنا لصعايب تذاليل

ومثل قول : الشاعر : ريكان بن حثلين : أمير العجمان

ياما حلا الفنجال مع سيحة البال *** في ملجسً مافيه نفسً ثقيله

وكل بيت له معنا وحكمه

هذي الأبيات الي تتداولها الناس ولا قصورً في الشعار الثانين بس واللّــه هذا الي تحضرني

وعساك تجيب من هل البيات


ودمتم سالمين