بسم الله الرحمن الرحيم
قبل كل شيء والله اني بعيد كل البعد عن العنصريه المقيته والفخر الزائد بالقبيله الذي أعده نقص داخلي في الشخص لأنه يحاول بفخره الزائد أن يعوض النقص الموجود فيه فمن يريد أن يرفع اسم قبيلته ويرفع ذكرها يستطيع رفعها بفعله هو وليس بفعل غيره ويعلم الله أنه اذا أتاني أي شخص يطبلني في فزعه أو أي شيء من أمور الدنيا أن اول مايطري علي بعد الله وطمعي في أجره ومثوبته هو اسم قبيلتي التي أنتمي إليها فمن يطلب مني الفزعه أو التوسط له في امور خاصه فيه لن يذكرني بالاسم بل سيقول جيت لي سبيعي فإن كاني سنعت موضوعه قال بيض الله وجه السبيعي وان كاني تخاذلت بيقو ل العكس لأن الرجال تاخذ مواقفها من الرجال على اللي تواجهه وتلقاه ,, هذا الاجنبي اللي مايعرفنا ونفزع له باللي ورانا واللي قدامنا أجل ولد القبيله وش نسوي فيه أكيد بنحطه فوق روسنا وهو بمثابة الأخ في العسر واللين والحمد لله هذا ماتميزت به قبيلة سبيع
وهذه مقدمة الموضوع التي ترتبط بشكل اساسي بعنوان الموضوع
تفاجأت وأنا اقرا المنتدى ( قسم مزاين إبل قبيلة سبيع ) ماوجدته من اعتذارات من شعراء لهم باع وشهره في الشعر على مستوى المملكه وخارجها وحز في نفسي وأنا أرى هذه الإعتذارات اللي جايه بالكوم
وما زاد من استغرابي ان بعض الذين اعتذروا يتهافتون ويتسابقون على الظهور الإعلامي في كل فرصه تسنح لهم ويشدون الرحال للإمارات والكويت وقطر وبقية الدول ومدن بعض المملكه ولو أنها على الحدود اليمنيه او العراقيه كله من اجل البروز الإعلامي والحين يوم جا وقتهم وحزتهم في مهرجان يخص قبيلتهم صاروا يتعذرون؟
سلامات؟
وأكاد أجزم ان بعضهم عنده استعداد يظهر في حفل نادي رياضي ويطلع فيه أو يسوي مقابله في قناة فضائيه مع بنت مزيونه ويتغزل فيها وفي ثوبها وفي الميك اب حقها ولايهون عليه يطلع مع ربعه وعيال عمه
سلطان الهاجري شاعر وله مكانه المتميز في ساحة الشعراء وش ضره يوم أحيا مهرجان قحطان وحضره؟
هل نقص من مقامه شي والا خلانا ناخذ منه موقف سلبي لأنه جا في مهرجان ربعه؟
بالعكس بالنسبه لي استمتعت بحضوره وسماع قصائده الرائعه وفخره بقبيلته
استغرب هذه التصرفات من بعض شعراءنا ومن تصرفاتهم يعني الواحد عنده استعداد ياخذ له شهر عشان يسوي له قصيدة غزليه في بنت ولاعنده استعداد يحضر مهرجان قبيلته ويقول فيها قصيده؟
بالنسبه لي اللي ماهو بحاضر المهرجان قررت مقاطعته وتوكلت على الله واللي مافيه خير لربعه اعرف انه مافيه خير ولاينشد به الظهر ويجب أن يعرف ان عدم حضوره سيجعله يفقد حب ابناء القبيله وتأييدها له فيما بعد
والله شي يرفع الضغط مذابح وطق مشاعيب عشان توافق لهم لجنه في مسابقه شعريه وبالنسبه للقبيله آخر من يفكرون فيها!!!
التساؤل الثاني
من هم الشعراء المشاركين في المهرجان حالياً؟؟
يجب ان نعرفهم وبالاسم ونعرف في اي يوم بيجون على افتراض ان المهرجان بياخذ له اسبوع وسيقام في وقته
غير كذا فيه شعراء كبار سن وقدر ومن كل قبايل سبيع لماذا لايتم مخاطبتهم والتنسيق معهم
خصوصاً شعراء الخرمه ورنيه بحكم قرب هاتين المدينتين من موقع المزاين !!
وش يمنع ان نحط موضوع مثبت في المنتدى عن شعراء معروفين في القبيله ونتأكد بأنه تم التنسيق معهم لحضور المهرجان؟
بعد هذا الموضوع الطويل والذي قد يكون أصاب القاريء بالملل
حبيت اهنيكم بالشهر الفضيل والله يقبل منا صيامه وقيامه وأهنيكم بقرب قدوم عيد الفطر المبارك وكل عام والجميع بألف خير
أسأل الله أن يوفق الجميع لمايحبه ويرضاه وهذا الموضوع والله ماكتبته الا من المواضيع المحزنه اللي قريتها في المنتدى
وكلنا عارفين ان المنتدى يمثل القبيله كامله وراعي رسمي للمهرجان لذلك طرحت الموضوع فيه
والخير والبركه في إداريي المنتدى وأعضاءه جميعاً ولا أخص أحد بالإسم دون غيره
أخوكم
غير متصل
سلامات ياشعراء سبيع
