بسم الله الرحمن الرحيم
الشاعر المعروف / عبدالهادي بن راجس رحمه الله من كبار عجمان الرخم من بني عامر من سبيع الغلباء من أهل الضبيعة وهو صاحب شجاعة وكرم وصدق في الحديث وعرف عنه التواضع وأنه من أتقى الرجال وأشدهم تمسكاً بكتاب الله وسنة نبيه محمد صلى الله عليه وسلمة وهو البحر الذي لا ينضب من الإبداع ويعد من شعّار بني عامر ومن خيرتهم وكي لا أطيل عليكم فقد اخترت مقتطفاتةمن قصائده وأرجو أن تنال استحسانكم :-
يـا زيـن والله بالـخـلا شـبــت الـنــار
= والـضــو لا قـــزٍ ولا هـــي بـدافــور
إلا الحطب لاحط من فوقها أسطار
= وإلا جـروم الرمـث يابـس ومـجـرور
في ربعة (ن) تهيـا لمجلـس ومسيـار
= فيهـا السوالـف والفناجيـل بـالـدور
لا قمـت منهـا ناصيـن ربعـة الجـار
= ألقى ربوع (ن) ما تخالف على الشور
وإليا مشينا بأدهـم الـروض وأزهـار
= كنـك تقـول إنـه مـن الــزرع مـبـذور
فـي جانبـه دجـنـا وجيـنـا بالأخـبـار
= وقلنا لهـم عشـبٍ ولا هــوب مـاثـور
مـن عقـب وبلـه مـا بعـد جـاه ديــار
= إلا أم سالـم صوتهـا فـيـه مشـهـور
وشدًوا له اللي ما يهابـون الأخطـار
= وتـقـاطـروا ببيـوتـهـم كـنـهـا الـقــور
مـا أحـب أنـا دارٍ والأدنـيـن فــي دار
= أبغي الجماعـة كلهـم دايـم حظـور
إن التفـت إيميـن وإلا عـلـى يـسـار
= أشوفهـم والقلـب بالـربـع مـسـرور
عوامرٍ تسقـي العـداء كـدر الأمـرار
= يا شينهم فـي وقـت غـادر ومغـدور
وقال هذه القصيدة في القهوة :-
أوي فنجـال يصبـه مسـويـه
= وحنا سوالفنا على جـال ضـوه
في ربعة والبيت يرفـع بقاريـه
= بيت على ما قيـل يرفـع بقـوه
تالي نهاره وأولـه دايـج فيـه
= قم سو فنجال المطاليـق سـوه
احذف لها رمـث كبـار مثانيـه
= تـو الجماعـة نازليـن بجـوه
والماء تخيّر من زلاله وصافيـه
= من مزنة ماخاشر العـج جـوه
واحمس ولا تحرق وحاذر تنييـه
= ما بين فرغهـا وما بيـن تـوه
واجغف لها من طيب الهيل غاليه
= والزعفران بكثرة الهيـل شـوه
صبه على اللي طيبـات معانيـه
= واختص من هو بالمراجل تفـوه
اللي يعّنز لك إليا رحـت ناصيـه
= يسلـم ولا يسلـم ردي المـروه
وقال هذه الهجينية في الإبل :-
الصفر واجد ولكن ماش
= ما كل صفراً تجي ناقة
صفراً عليها القلوب اعطاش
= وصفراً يقولون نقناقة
لو إن بعضها يجي ببلاش
= ما هيب للعاشق اعشاقة
أحب صفراٍ ما هيب اللاش
= لا صمل الورد سباقة
لا قالوا الماء يبي مغباش
= ونبوا على المال باطلاقة
ساروحها من سطرها شاش
= خلا رحوله وملحاقة
بينه وبين الهراس افراش
= يبرا لها راكز (ن) ساقه
قدم الدبش كنه الطراش
= والماء ضحاضيح وشفاقة
وردت غدير مهوب امشاش
= من رايح (ن) شيف براقه
قد قلت واجد ولكن ماش
= ما كل صفراً تجي ناقة
وقال هذه القصيدة :-
عديت مرقاب طويل وعملاق
= رجم طويل يبرح الخد شاهوق
رجم يوسع خاطري كل ما ضاق
= من عقب مشرافي بسميه مرزوق
عساه نون يزعج السيل دفاق
= ما هوب من عجل المعاصير مرفوق
نوٍ ثقيل راسين له تفهاق
= سيله على روس الغراميل مدفوق
يسوقه الغربي ولا هوب ينساق
= ويرده الشرقي ولو كان مسيوق
ما فيه رعاد ولا فيه براق
= وبل (ن) يهل من الهماليل برفوق
عقبه تشوف النبت كله بالأوراق
= مدهم ويكسي عاري الخد من فوق
وإليا مضى عشرن وعشرن على ساق
= تشوف في بعض الدواوير زملوق
يفرح به اللي فيه يرعاه بنياق
= واللي يبيله سجة مع هل النوق
يا ما حلى والعشب غاد (ن) به أرناق
= صوت أم سالم بين عاشق ومعشوق
وشوف البيوت اللي بها قاطع ارواق
= في صيهد ماشيه ما هوب مرهوق
لا جاء الضحى من عقب حزات الإشراق
= تجمعوا والبن يحمس ومدقوق
في ربعة يوجد بها كل الأرزاق
= يجيبها اللي جاره الله من العوق
ويا ما حلى شوف الدبش عقب الإطلاق
= ما ردد الطياح والحشو مفهوق
تلد له صفراً تمايح بالأشناق
= صفراً كسوها بالمراير مع الطوق
صفراً خذت زين المغاتير وأعماق
= ما وقفوها عند أبو ذيب بالسوق
وصى عليها اللي كريم بالإنفاق
= بالبذل ما مثله مع الناس مخلوق
وعيا قليل الفود ما يصخي الناق
= ويقول لو حطوا لي الطاق مطبوق
أبغى إليا من حطوا العالم سباق
= أكون أنا السابق ولا ني بمسبوق
ذي منوة اللي للمظاهير يشتاق
= يتبع هواه وتالي العمر ملحوق
ومن أجمل قصائدهـ :-
سلامي على بدوٍ رعوا عشبة الضيرين
= على أول نبات الوسم يشبع به الحاشي
خذوا به ليال ودبرو كلهم مقفين
= مشوا في هوى اللي طيرت برق الأرواشي
لهم في شمال الصلب جرة وذكر وعين
= يجيب الخبر منهم مدور وطراشي
رعو عشبةٍ ما داج فيها مرب الضين
= عليها من الرواح ودان ورشاشي
رعو بالفتاة اللي بعيد عن الشارين
= خطو الصلوج اللي لها الرأس شواشي
يسوقونها تسعين ليل وهم مجزين
= خلا والجوازي رتًعٍ بين الأدباشي
وتهيا لهم هيفيةٍ وصبحوا مظمين
= وكلٍ يقول اليوم خلفاتي عطاشي
وتنشت مزون الصيف ويشاف برق زين
= يخيٍل على ساقان وبحار عماشٍ
وجاهم صدوق القول من يمة أم قرين
= يقول الغبايا كلها تنزف مشاشي
من المرح دكو وأطلقوا كلهم عجلين
= وتماروا بطيب قلوب ما فيهم غشاشي
ووردوا وشربوا وافهقوا دونهم عرقين
= وتثنوا بصيفٍ ما وطى فيه نطاشي
ثلاثين يومٍ وكنها عندهم يومين
= وهبة هبوب القيض ما هيب تنهاشي
تمالوا وخلوا وردهم بالدبش قسمين
= على شان طيبهم يخالف ظمى اللاشي
على العد وردوا واسهروا عالم ممسين
= كثير العرب ما غمض العين بفراشي
مضى قيضهم والبدو عن عدهم راضين
= على جال عدٍ بازرق الجم جواشي
وشافو نجوم السبع باقٍ بها ثنتين
= وتمالوا بمنداً والحطب فيه ببلاشي
يقولون منداهم من رويكبة ويمين
= شمالي زبارة كنهرا جعلها الناشي
سلامي على بدوٍ على سلمهم ما شين
= ولا خير باللي صد عن سلمه الماشي
وقال هذه القصيدة :-
خذيت من روحي لروحي فوائـد
= ثلاث جزلات (ن) شوي (ن) عددهـا
الأوله حبـي دخـول المساجـد
= والبعد عن من طاعة الله فقدهـا
والثانيه حبـي لحفـظ العوايـد
= والبعد عن ناس (ن) كثير (ن) حسدها
والثالثه حبي لنظـم القصايـد
= لا مرت الرجل الحميـد يحمدهـا
وزودتها من روح روحي زوايد
= ألـوذ فيهـا لا بليـت بنكدهـا
أحب رجل (ن) بالمهمـات كايـد
= لا قلت له ذيك المهمـه قصدهـا
لا جاء نهار (ن) فيه ناقص وزايـد
= يحلهـا لا كثـروا فـي عقدهـا
وأحب زينـات البكـار النوايـد
= علط الرقاب إليا توفـر سعدهـا
خطوا الفتاه اللي ظهرها متحايد
= لاحة ضباب الورد نارت وحدها
صفراً عليها من وبرها شرايـد
= مثل الطموح اللي تنقظ جعدهـا
تلعب نهار العيد والعيـد عايـد
= بين الصفوف بخيزران (ن) بيدهـا
وتنقض جتيل الراس فوق القلايد
= وتشوف من حبه بداخل جسدها
لا ضاق صدري والليالي شدايـد
= نصيت لي صفـراً تـدرج ولدهـا
صفراً لبنهـا للنشامـا برايـد
= في دكة _(ن) من جاء يبيهـا وجدهـا
فيها يقلط طلع هـدب الجريـد
= غيد (ن) ثمرها نادر (ن) فـي بلدهـا
وأحب ممشاً بالفياض الجدايـد
= بين البيوت اللي رفاع (ن) عمدهـا
وأحب أخيل مرزمـات الرعايـد
= دهم السحاب اللي ثقيلن رعدها
برفقة مشاكيل (ن) وساع البنايـد
= شقر الحرار اللي ينومس هددها
هذا هواي وتالي العمـر بايـد
= ولا دامت الدنيا لمن هـو رصدهـا
قال الشاعر / عبدالله بن راجس
خيالة الهدلا على كل جابــــــه
= تاريخ عجمان الرخــــــــم ليله بروق
ما فيهم اللي فالقسا صــك بابه
= متقاسمين العز عاشــــــق ومعشوق
قصيرهم ينسى ظروف القرابه
= نفحاتهم يمه كما المــــــسك مسيوق
يا طيبهم لا كشر الوقت نابـــــه
= ياما حموا برماحهم شمــــــــخ النوق
فيهم على شدات بقعا صــلابه
= تحمي الظعون وتاخذ الطاق مطبوق
وقال الشاعر / بادي بن دبيان رحمه الله
ربعي هل الهدات طوال اليماني
= في كل درب كايـــــــــــد ينطحونه
اللي يحطون الغنم بالصـــــياني
= والمال لا جاء موجبه يرخصونه
يفداهم اللي قاطع فـــالأداني
= اللي على ربعه تعــــــــقد جفونه
انتهى . منقول وتقبلوا تحياتي .
غير متصل
الشاعر الكبير / عبدالهادي بن راجس رحمه الله
