مايشيل لك الحراب الا الحريب

[جزل العطايا]

مل قلبٍ من عطب وقته عطيب=والمصايب مكّنت فيه الصواب
من تَعاقَبه العقايب مايطيب=ولايذوق الرجل عذبٍ من عذاب
لي ثمان سنين ماجالي نصيب=يانصيبٍ مابعد كمل نصاب
ماحدٍ يشره على الوقت الغريب=يوم شيب من غرايبه الغراب
انلجم من فجعة الخطب الخطيب=ومن عذاب الهم قلب الذيب ذاب
كيف اباصبر والحشا حشوه لهيب=مايطيب من اللهيب الالتهاب
انتقلت من الطفولةللمشيب=ماتمتعت بطرابات الشباب
آه لو ان الندم يمكن يثيب=كان اشق من الندم بيض الثياب
مير ياقلب العنا ضاع الذهيب=اعجزك بابٍ وراه الفين باب
المقفّي راح والمقبل بغيب=خلك لصكات وقتك ليث غاب
اقنع بما كتب والحق المصيب=قافيٍ وقتك وقافيك الذهاب
ولاتبرق في الزمن حصني وذيب=ولاتلحق وقتك التالي عتاب
ليتني عاصرت جساس وكليب=ولالفيت بوقت يعز الكلاب
عالم تضحك معك من غير طيب=كنها قصور خوى فيها الخراب
مايشيل لك الحراب الا الحريب=انتبه تخدعك غدران السراب
مايفكر في اللباب الا اللبيب=والغرير يغره غلاف الكتاب
والعرب متفاخته سرح وعزيب=آحدٍ يُسحب واحد فوق السحاب
وكان ماجا الفرق في اليوم الصعيب=كلنا صلب وترايب من تراب


الشاعر / خالد بن عيد السهلي

[خالد ال شيخ]

سلمت يمينك اخي جزل العطايا وشكرا لك على هذا النقل الرائع وصح لسان الشاعر السهلي وننتظر منك المزيد

[ماضي المديري]

اخي جزل العطايا وشكرا لك على هذا النقل الرائع
وصح لسان الشاعر السهلي
تقبل تحياتي

[مصلح ربح]

اخي جزل العطايا وشكرا لك على هذا النقل الرائع
وصح لسان الشاعر السهلي
تقبل تحياتي

بيض الله وجهك

[سلطان البرازي]

صح لسان الشاعر ولاهنت ياجزل العطايا على النقل

[جزل العطايا]

يا هلا والله ومرحب بكم ياخواني والله لا يهينكم على المرور الطيب ولا حطين القصيد الا لكم وارجو ان اكون قد وفقت في نقلها دمتم على خير ومحبه