تسجيل الدخول

مشاهدة النسخة كاملة : لو سمحتوا ياشباب ابي منكم هاذي الخدمه

ابو مزنه
11 - 10 - 2006, 06:32
السلام عليكم ورحمة الله وبركاته
كل عام وانتم بخير بعد الزحمه

ومن العايدين قبل الزحمه

انا بصراحه ياشباب ماادري وين احط الموضوع هذا لكن كتبته هنا واتمنى القى تجاوبكم

انا ياشباب مدرس في الرياض وسمعت كلام اني راح ينقلوني للخرمه


طلبي منكم ابغاكم توصفون لي مدينة الخرمة بالضبط من الرياض وعدد الكيلو مترات ابغى الله لايهينكم وصف دقيق يعني لما اطلع من الرياض باتجاه الطائف هل من الضروري ادخل الطائف او فيه مخرج خاص بها

انا بصراحه ماادري وين موقعها بالضبط لكن فيكم الخير والبركة ان شاء

الله انكم تلبون طلبي

واخر شي تقبلوا تحياتي وشكري مقدما

الله يعطيكم الف عافيه
ولد السبيعي
11 - 10 - 2006, 13:06
~*¤ô§ô¤*~*¤ô§ô¤*~الله يسهل لك وويوفقك بس علشان تلاقي اجوبة على جميع اسألتك ياريت تستخدم جوجل ارثwww.google.comوتكتب google earth وبعدين تسوي downloadوبعدها راح يتنزل لك البرنامج حاول انك اتطلع بيتكم منه وبعدين دور على الطائف ودور ودور الى ما تحصل اللي تبيه،ترى والله البرنامج يساعد كثير في ايجاد المناطق وعالعموم هذا كل ~*¤ô§ô¤*~*¤ô§ô¤*~اللي عندي ،والله ولي التوفيق.:akbar:
ابو مزنه
11 - 10 - 2006, 18:24
اخوي يعطيك العافيه ماقصرت

لكن للاسف جربت ولكن ماينفع ابغى وصف دقيق لاني يمكن اروح بعد كم يوم اشوف المدينه واتعرف عليها

ياليت احد يفيدني جزاكم الله خير
مشعاب
11 - 10 - 2006, 18:44
اول شيء تمسك طريق خريص لين تجيك السفارات حطها على يمناك واطلع يسار مع طريق مكة

تجيك نقطة التفتيش ( كان معك شيء خشه ) بيقولك العسكري دامك تبي الخرمة الله يسهل عليك

تنزل مع القدية دس الأبنص لين يدقر وخل الكربون يطير بعد 700 كيلو بيجيك مفرق مكتوب عليه الخرمة اطلع فوق الكبري ثم رح جنوب وابرك في صميمها لين تحضر على الدغمية يجيك لوحة مكتوب عليها الخرمة يمين كانك من الغانمين ادخل الخرمة وضف السبعان وابشر بعزك .


لا تجلس تنشد مرة ثانية امسح العداد لا نزلت من القدية واضبط الوصف

والخرمة كل يعرفها واللي ما يعرف علمناه

الظاهر انك اسعد حسن فلاته ظاهر لنا مرة ثانية
أبو يزيد
11 - 10 - 2006, 19:55
اقول اخوي

ماعليك من مشعاب يبي يضيعك ويوديك فى البر عند البعارين .
خلك على قوقل ايرث وشوف ترى الخرمه في اوروبا عانها بين اسبانيا وايطاليا وتطل على البحر الكاريبي ويحدها من الشمال القطب الجنوبي ومن الجنوب القطب الشمالي ومن الشرق شارع انكاس ومن الغرب شلالات نياجرا خذ العلم اللي ملحته فيه روح الله يرعاك.
مشعاب
12 - 10 - 2006, 04:36
هههههههههههههههههههههههههه انا اشهد انك علمته



اجل عليك بوصف ابو يزيد تراه دليله




استاذ الجغرافيا مشعاب
ابو مزنه
12 - 10 - 2006, 05:20
يعطيك العافيه على الوصف

ولكن اخوي بالنسبة للمخرج حق الخرمه لما ادخل معه كم يبي لي كيلو حتى اوصل لها

وهل الطريق خط واحد او خطين

اعذروني ياشباب على كثر الاسئله ولكن ان شاء الله ان فيكم الخير
الزناجه
12 - 10 - 2006, 05:54
يابو مزنه الله يهديك انت رح مع وصف اخونا مشعاب وانشالله مانغدي والطريق امسفلت او خط واحد او كله ابل يعني لاتدعس ترى مشعاب يبيك توهق او تصدم وحده من ابل سبيع والله ان يعلمونك اتدريس على الصوله
تركد او خلك عاقل احم احم
اسمع شوري اني لك من الناصحين
وافي السبـيعي
12 - 10 - 2006, 05:56
انت تعرف محازة الصيده اللي فيها فيييييييد بس هناك مربط الفرس
بلاش الدغميه او ابو جماده والا احسن خلك حول ام الرمث

اخي انت عارف واليوم مافيه احد ابد يضيع كود فلاته

انا متابع معك
ابو مزنه
12 - 10 - 2006, 05:58
يعطيكم العافيه جميعا وماقصرتو
محمد بن كسران
12 - 10 - 2006, 08:05
يابو مزنه لا خذت المفرق يبيلك 79 كم وتاصل والخط سيد واحد وتراه اقشر تركد و توقع من النامس اسف قصدي من البل ولامنك دخلت الخرمه عان بتجيك شقق الوسام على يسراك تراها شققنا المهم اخذ معك جواز السفر وفيز قبل ما ترووووح ولا اوصيك اي طالب يدرس عندك من الكسارين عطه ممتاز والي من بني ثور بس ما هوب من الكسارين عطه جيد جدا والسبعان الباقين عطهم جيد واسمعني زين اي طالب عندك من الأشراف لا ينجح رسبه مع مرتبت الشرف ..
هذا وصلى الله وسلم على نبيه محمد .
تقبل مروري وتحياتي ..
ودمت بكل ود واحترام .
اخوك/ محمد بن كسران
الزناجه
12 - 10 - 2006, 10:37
اما يصقطون الاشراف قويه ذي والله انهم اعبر من المصاريه في المدرسه
والحمد لله انا ضمنت الجيد او فيه بركه
هههههههههههه
محمد بن كسران
12 - 10 - 2006, 18:23
يارجال حد ابو مزنه عندهم عز الله ماهم ناجحين
مشعاب
12 - 10 - 2006, 18:31
يارجال حد ابو مزنه عندهم عز الله ماهم ناجحين



انت وش تدرس يا ابو مزنة؟
ابو مزنه
12 - 10 - 2006, 18:38
يارجال ابشروا بالنجاح ازهلوها اخاف اسقط احد وانطق هههههههه

يعطيك العافيه يامحمد بن كسران

مشعاب انا مدرس لغة عربية
محمد بن كسران
12 - 10 - 2006, 18:43
مشاء الله لغه عربيه يعني نحو وانشاء وادب وبلاغه واملاء خمس مواد يعني ابشرو بالنسب الزينه ياهل الخرمه
الله يعافيك
المفالحه
12 - 10 - 2006, 22:14
اخوي ابو مزنه والله من الكرم بتحصل عند بني ثور بدون قصور في الباقين

اتمنى لك ايام سعيده

تقبل تحياتي
ابو مزنه
13 - 10 - 2006, 03:43
الله يعطيكم الف عافيه وماتقصرون والله وهذا العشم فيكم


الله يوفقكم ويوفقنا اجمعين والله يتقبل مننا ومنكم صالح الاعمال