قصة وقصيدة بين قبيلة سبيع الغلباء وقبيلة عتيبة الهيلا

[خالد الشماسي]

هذة الغزوة جرت بين الشيابين من عتيبة والصنادلة من سبيع , وحصلت هذة الغزوة عندما غزو الشيابين بقيادة جهز بن هذال ابن فهيد الصنادلة في المصِيدة بوادي رنية.

وقال في هذة الغزوة , مناحي الصندلي ابيات يصف فيها ماحصل:





جانا جهز مرذي طوال النسانيس=سبعاً على فرس اللحـم مستسنـي
جانا بربعـة كاسبيـن النواميـس=كم فاطـراً خلـو ولدهـا يحنـي
وركبو هل البل فوق مثل القرانيس=وكم ابلجاً قـرب جـوادة يعنـي
لحقو بصمعاً كنهـن المحاسيـس=صويبهن يبطـي بكونـة يونـي
ذيب المصِيدة ناد ذيب العلاقيـس=تلقى العشى ياذيب فـي وردهنـي
تلقى العشى عفراً سوات المقابيس=وصفر على حوض المنايا يحنـي



فرد علية جهز بن هذال ابن فهيد هذة الابيات:





سلام يامنهو هرج هرجة القيس=بافعالنا وفعالـة الـي مضنـي
ركبو وحدونا على الواد ابوخيس=العفو يـوم اقفـن ثـم اقبلنـي
نلوعهم بم الرصاص الدلابيـس=ويلوعنا مـن عندهـم مثلهنـي
والعلم عود لمهـات المشاقيـس=ياطيـب اهلهـن وياطيبهـنـي


المصدر: سوالف الطيبين , تأليف عبدالله الحضبي السبيعي , الجزاء الثاني , صفحة 141و142


وذكر الدلبحي بشبكة عتيبة تكلمة لقصيدة العتيبي هي ما يلي


بعض الليالي فيه هروج ومجاليس=على شحم حيلً ونجرً يدني
البارحة تسهجبنا الفطر العيس =والليلة الفطر يبا يسهرني
يوم أنكفينا فوق حمرً مكاويس=قد الهضاب الحمر من دونهني
ذيب المصيدة ناد ذيب القرانيس=تلقى العشاء ياذيب في دربهني
تلقى على دربك أمهارً مكاويس= دون الركيب ودون مطموعهن
يوم التجر يدورن المخاليس = حنا ندور رزقنا فوقهني
لحقو منى سبعان خيلً كراديس =ياطيب أهل هنا ويطيبهني
يوم ألحقونا كنها من سناعيس= متحضنين الصمع فسوقهني
لحقو وحدونا على الوادي أبوخيس=لين الركيب بدعث وقفني
يلوفهم بالى زهبها دلابيس =ويلوفنا من عندهم مثلهني

[سبيع بن عامر]

لاهنت ابو عمر

[أبو يزيد]

لاهنت يابوعمر

على ايراد القصه .........

وللتصحيح الموقعه المذكوره (وقعة المصيده) كانت بين الشيابين وآل عمير واشتركوا فيها عدد من فرسان آل عمير وليست حكرااا على الصنادله.
وهم والنعم بهم والسبعة انعام يوفوون حتى لوكانوا لوحدهم ولكن للتاريخ الوقعه المذكوره كانوا فيها المشاعبه والمفالحه والصنادله والمكاحله وهم قبائل آل عمير الاربع.

ولزيادة المعلومات عن مكان الموقعه: (المصيده) تقع شمال العفيريه بالقرب من هجرة ابومليح التابعه للعفيريه


ذيب المصِيدة ناد ذيب العلاقيـس=تلقى العشى ياذيب في وردهنـي

وللتصحيح هذا البيت يوجد به خطاء ففي شطر البيت الاول الصحيح هو:


ذيب (الحلا)غناء لذيب (الهلاديس)= وتلقى العشى ياذيب في دوجهني

(الحلا ..جبل من جبال الحره الجدر يقع شرق المصيده.)
(الهلاديس...ومفردها الهلدس وهي اوديه صغيره (شعبان) تنزل في وادي رنيه من الجهه الغربيه وهي غرب المصيده)

هذا مااحببت ان اضيفه شكرااا استاذي القدير ابوعمر
دمت بحب

[سالم السنافي]

ونعم بربعنا الصندله

[القريشي11]

تكفى ياابو عمر اسمعكم تقولون كتاب سبيع وكتاب سوالف ورحت ادورها في الرياض ولا لقيتها تكفى يولد عمي شفلي ذالكتب وانا من اهل رماح والمسافه بعيده

[الحميدي السويدي]

بيض الله وجهك يا ابو عمر على طرح هذه القصه
والقصايد والصنادلة يرفون الراس شرواك

[ابو بكر الرازي]

رائع يابو عمر
قصه تبين مجد القبائل
وقصه فيها من الوصف الجيد
الذي يدل على طيب الفرسان
يمدح كل منهم الاخر
نشكرك على ايراد مثل هذه القصص ونشكر المؤلف
عبدالله الحضبي على الجوده

[فتى العزه]

لاهنت على القصه يبوعمر

[الحرألأبيض]

بيض الله وجهك يا ابو عمر على طرح
هذه القصه والقصايد

[عواكيس]

مشكور وما قصرت والله لا يهينك

[خيَّال الغلباء]

الأستاذ / خالد الشماسي جزاك الله خيراً ولا هنت