وينكم ياشعار المنتدي

[ابوفارس السبيعي]

سلام الله على الي يعرفون الذوق والطاروق= سلاماً يشتعل بالنار ياوجه الله العالي
الا يامنتدى السبعان جعلك في الطليعه فوق= تجيب اخبار خذ اخبار ياوجه الله العالي

[ابوفارس السبيعي]

وين شعار المنتدي

تراني شايب والنوم جاني

[مخــاوي الليل]

هلا أبووو فااارس ..

ما تشوووف الزياااارات واجد ..

<<< ترى مغير أنا رايح جاي .. الشعار تعرف الليله خميس وإستراحات وسمرات ما يجونك ألا تال الليل ..

بس أصبر كود يجي واحد يونسنا معك ..

أنا عاني خفيررررر على الصفحه أتحراكم ..

وصح لسانك ..

[ابوفارس السبيعي]

ياهل المنتدي ياهل الكرم والكرامه= اطلعو لين نعرفكم ونبحث خفاكم
فوق راسي عقال وفوق راسي عمامه= جيت ادور وناستكم وادور رضاكم

[خالد الشماسي]

هلا بك يا المسلم والعلوم اللي تبي في السوق = تخير والعلوم اخيار يا وجه الله العالي
يدوم العز لأهل العز وأهل المعرفة والذوق = وخوتنا لها معيار يا وجه الله العالي

[ابوفارس السبيعي]

اتشرف باللعب معك يابو عمر

واشكرك على التجاوب وعلى الجهود المبذوله في هذا المنتدي


واستلم البيت

[أبوعبدالله]

ابو فارش / ابو عمر

طاروق طيب با الحيل

صحت السنتكم

[عبدالله الشماسي]

ابوفارس بيض الله وجهك على الجزالة
ابوعمر لاهنت على الرد الوافي والبداية القوية

[ابوفارس السبيعي]

توكلنا على الله جعل قلبك مايجي محروق= مادام انك زعيم الدار ياوجه الله العالي
تشوقني بيوتك يعلم الله تو زان الشوق= مادامك شاعر الشعار ياوجه الله العالي

[ابوفارس السبيعي]

ابو عبدالله
عبدالله الشماسي

بيض الله وجيهكم على التواجد وحظوركم تشجيع لنا

[خالد الشماسي]

مرحبا بك أخي ابو فارس وبكل من شارك معنا في هذا الطاروق






نرحبك بدارك والعلاقه حبلها ماثوق = على الله نبتدي المشوار يا وجه الله العالي
تفضل بد ما في خاطرك والزاد فوق النوق= ولا تمشي مع أهل القار يا وجه الله العالي

[ابو مساعد1]

هلا يامرحبا ترحيـــــــــبة يبدابها المنطوق اقدمها عن الاخـــيار ياوجه الله العالي
تركد يابو فارس لا تسوق سواقة المطفوق ترى غير الصغار كبار ياوجه الله العالي

[ابوفارس السبيعي]

لا يامنك بنيت البيت تكفى زين الطابوق= دخيلك لاتلف يسار ياوجه الله العالي
تفضل والبحر قدام وازرق كنك الزاروق= انا وانته طوال شبار ياوجه الله العالي

[ابوفارس السبيعي]

ابو مساعد

صح لسانك ولاهنت

وان شاء الله لي معك لقاء في المرات القادمة وبيض الله وجهك

[ابوفارس السبيعي]

الليل سرأ يابو عمر

[خالد الشماسي]

بنينا وأنت غايب يا أبو فارس والحقوق احقوق=نبي ان طالبك فيما صار يا وجه الله العالي
مع أهل ايمين دربي واتحاشا خوة المشفوق= ألا والنعم يا أهل الكار يا وجه الله العالي

[ابو مساعد1]

اشكرك يابو فارس بيض الله وجهك والله يحييك

[أبو يزيد]

ياوجه الله العالي صدق

العوده متجمعين هنيا.

صحنت السنتكم ياكبار متابع لهذا الابداع الغير مستغرب

[ابوفارس السبيعي]

عسى الله يرحم الي في مطيحه طايحاً مشنوق= غداء مع درب ابو عمار ياوجه الله العالي
انا وانته يابو زيد الهلالي سابق ومسبوق=يارب البيت ياستار ياوجه الله العالي

[ابوفارس السبيعي]

ابو يزيد

شكراً لحضورك

تواجدك يشجعنا

[خالد الشماسي]

ابو مساعد أبو يزيد هلا بكم





عسى الله يرحم اللي في الرمادي بطنها مشقوق = وباق الميتين اقمار يا وجه الله العالي
تحمد ربك وصل الفرايض والعشاء مرقوق= وخاو الناس في المحدار يا وجه الله العالي

[ابوفارس السبيعي]

تقوله يوم راسك سالم مايجيه أفلوق=تعدل وارفع الاسعار ياوجه الله العالي
انا وانته بخير وفي فياض العشب والرقروق=بلاش نولع الدافور ياوجه الله العالي

[خالد الشماسي]

ما دام الله منجينا من الغازي وراع البوق = بحمد الله وأعزم الجار يا وجه الله العالي
وكان انك تبي الفزعة فهذا دربهم مطروق = تحيزم والرفيق مجار يا وجه الله العالي

[ماجد المديري]

بيض الله وجيهكم ياشعاار المنتدى والله جمهووركم كثير ننتظر ردووودكم

والله يسعدكم مثل ماأسعتوووونا اليله واليل طويل وبكره خميس أسر ياساري

وتمنياااتي لكم بتوفق ,,,,,,,,

[ابوفارس السبيعي]

مدام الله منيجينا لاسارق ولا مسروق= انقدر صاحب المقدار ياوجه الله العالي
تربع واترك الفزعه لبو شارق وابو مشروق= يكفي دونها المعذار ياوجه الله العالي

[ابوفارس السبيعي]

سرى الليل يبو عمر .....

[خالد الشماسي]

يا زين ارض الشمال المربعه مع رعيها الزملوق = عساستها على الفكسار يا وجه الله العالي
وكانك هايب منها عسى الله لا يجيب العوق = فأنا مشرف على المسبار يا وجه الله العالي

[ابوفارس السبيعي]

يبو عاتق يبو معتق يبو معتوق= نبا القده على المسمار ياوجه الله العالي
انا ماني بهايب وان صفقت الطير جاه صفوق= علامك فالهدف تحتار ياوجه الله العالي

[خالد الشماسي]

يا ليت الفارس اليامن عطى وسط البحور يسوق = حموله في البحر قنطار يا وجه الله العالي
تمس بخير يا وجه السعد والمقبلات الحوق = وهذي حقت المسيار يا وجه الله العالي



كنك مستعجل ،، لذلك تصبح على خير

[ابوفارس السبيعي]

ياليت الفارس الفارس يسويها شعب وعروق= سمر ليله مع السمار ياوجه الله العالي
انا ماني بلابس مشلح فوق المتن مشقوق= وانا شاطر مع الشطار ياوجه العالي

[ابوفارس السبيعي]

الاخ العزيز ابو عمر شكرا لك وشكرا لجميع المتابعين
وشكرا لمنتدى سبيع والعاملين عليه

ولنا لقاء اخر

وتصبحون على خير

[ماضي المديري]

افا يوم جيت مشيتو الليله خميس

[ماجد المديري]

أشكر الشاعرين

1ـ أبو فارس

2ـأبو عمر

على ألابداع الجميل والله لا يحرمنا من أصواتكم العذبه وماقصرتوووو ,,,,,,,

[فـــالح السبيعي]

محاوره ممتازه جداً
أبوفارس السبيعي
و
أبوعمر
لاهنتوا أمتعتونا بالمحاوره الراائعه
كل الشكر لكم ولجميع من شجع وشارك بهذه المحاوره
بالتوفيق للجميع

[منصور الحري]

بيض الله وجيهكم وماقصرتو

[فهد المديري]

بيض الله وجيكم
يالقروم

والله شعار كبار مشاء الله

وان شاء الله مزيد من الابداع