ابن فطيس والمليون [الأرشيف] - منتديات سبيع الغلباء

فـــالح السبيعي

17 - 02 - 2007, 23:00

صراحه أتمناه يآخذ المليون لأنه يستاهل

الشاعر محمد بن فطيس المري

في شاعر المليـون للشعـر مضمـار=والسابقه في الشـوط تظهـر بيدهـا
ومضمريـن بكـار الأفكـار شـعـار=وكل ٍ يحضـر بكرتـه فـي وعدهـا
والـي تـردت لا يـدور لهـا أعـذار=معـذورة ٍ مـا دام قـد ذا جهـدهـا
والي تعوص وتضرب الحاجـز يسـار=تشـل فـي الدنـه وترجـع بلـدهـا
وأنا محضر بنـت صوغـان الأفكـار=مـن حبهـا عنـدي تفحـم وحدهـا
ان جارها الله من صواديـف الأقـدار=جاتك وجـاك الجيـش كلـه بعدهـا
الله عليهـا مـن مقـاريـد الأنـظـار=وصلت تحسـك مـا غشاهـا زبدهـا
وتلقفوهـا بالعلـم رمــز وشـعـار=وصفق لهـا منهـو بعينـه شهدهـا
ومرو بها تـو المنصـه كمـا الطـار=يالي تزعفرهـا مـن الطـاس زدهـا
شبهت بالهجـن الأصيـلات الأشعـار=وقصيدتـي تـراث أهلنـا مـددهـا
أعتز بـه وآقـف لـه إجـلال وإكبـار=واحة شرف يا سعـد منهـو وردهـا
أغلا أبلنا في ماجب الضيـف والجـار=يحلـب لبنهـا قبـل يذبـح ولـدهـا
وتراثنـا مـن دونـه نبيـع الأعمـار=وبفعالنـا روس المعالـي صعـدهـا
واليوم ضاق الجو مـن كثـر الأقمـار=تبـث حقـد الـي لحقـده رصدهـا
غزى الشعر قبل أمس غازين الأفكـار=قوم ٍ على الساحـة دفعهـا حسدهـا
تلقفوها ثم جـاوا مـن كـل الاقطـار=هـذا يصبحهـا والاخــر هجـدهـا
هـذا يحـرف بـالأدب سـر وجهـار=وهذاك يذبـح موهبـه فـي مهدهـا
واقفوا على أبل الشعر في وقت الاسحار=غاروا على الساحة وعـروا جسدهـا
وصاحت بعد ما شافت إن سترها طـار=و وقف ولـد زايـد محمـد سعدهـا
قال أبشـري بالستـر وبـردة الثـار=وأضفا عليهـا سترهـا مـا نشدهـا
وأستـل سيـف ٍ فالمواجيـب بـتـار=وأطلب ورد البل علـى مـن فقدهـا
على خطـى زايـد خطاويـه مـا بـار=والحاجه الـي فـي خيالـه وجدهـا
اغنى العرب من شوف أكاديمي ستـار=و من شوف أمر من السخافات وادها
شفت الشعر بستـان وأبوابـه أزهـار=وقطفت ما يسكـن مشاعـر شهدهـا
قطفتهـا مـن ديـرة ٍ تنبـت أحـرار=من دار أبـو مشعـل ذراي وسندهـا

الحرألأبيض

17 - 02 - 2007, 23:06

أبوبندر

لاهنت على نقل القصيده الجميله

ويا قرب ابن فطيس من المليون

تحياااااااااااااااااااااتي

أبو يزيد

17 - 02 - 2007, 23:12

فـــالح السبيعي

17 - 02 - 2007, 23:22

أبوبندر

لاهنت على نقل القصيده الجميله

ويا قرب ابن فطيس من المليون

تحياااااااااااااااااااااتي
ومن قال لاهان يالحر الأبيض

والمنافسه صعبه ولكن الرجل شاعر متمكن جداً

تقبل ودي

فـــالح السبيعي

17 - 02 - 2007, 23:37

لاهنت يامشرفنا الغالي
اختيار فاخر من الدرجه الاولى وذوق رفيع وراقي

وفعلاااا حقيقة لاارى احق من الشاعر محمد بن فطيس ان يلقب بشاعر المليون

بالمناسبه اهديلك هذا البيت من قصيده جميله للشاعر ابن فطيس فيها من الجمال والوصف والحضور الشعري والعاطفي والجزاله الكثير والكثير:

الله لايعطيه ناس ينظلون=ويستر عليه من النحل لاياكله

شكراً لك أستاذي القدير

والحقيقه أضفت لي معلومه جديده عن الشاعر

أنه صاحب هذا البيت الرائع عموماً مثل ماقال إبن فطيس

كلٍ يدسم شاربه مخلابه شكراً لحضورك ماي بوس:jill:

,,دمت بخير

ماضي المديري

17 - 02 - 2007, 23:40

الله يعطيك العافيه يابو بندر

بالفعل ابن فطيس يستاهل المليون بس المشكله تصويت

منصور الحري

17 - 02 - 2007, 23:53

ذوقك عالي يابو بندر
والشاعر من الطراز الأول

ودام انا في ذكره بنذكر قصيدته الأخرى

ماني بمن ياتـي و لا يـدرى بـه=شطرٍ حفظتـه مـا اعـرف كتابـه
شطـرٍ يناسبنـي لمثـل الليـلـه=و آشوفني في ذا المكان أولـى بـه
أبـاتـكـل بالله و نــعــمٍ بالله=اللي ما يوصـد دون خلقـه بابـه
باقـول و اللجنـة تقيـم قـولـي=و من كثـرة الشعـار مانـي آبـه
الحمـد لله واثـقٍ مـن روحــي=و إن كنت ذيـبٍ فالرجـال ذيابـة
ما أقول أنا أشعر واحدٍ فـي العالـم=لكن قصيدي كفو و أنـا ادرى بـه
الشعـر جمعـنـا لــو تفرقـنـا=حـدودنـا و ظروفـنـا الغـلابـة
الله يبيض وجـه راعـي الفكـرة=عـز الله انهـا تنحسـب لحسابـه
و الله يبيض وجـه مـن يرعاهـا=محـمـد الله يحفـظـه لأحبـابـه
محمد ولد زايـد عريـب المجنـى=-ولـي عهـد الـديـرة الخـلابـة
الشعـر تاريـخٍ لنـا مـن مبطـي=و إعلامنـا يـوم السنيـن نهابـة
الشعـر بيـتٍ و الـوزن عمدانـه=معنـاه طنـب و قافيتـه حجـابـه
الشعـر وادٍ فيـه صيـدٍ واجــد=و كلٍ على الـوادي يهـج ركابـه
و الأفكار صيد و كل شاعر قانـص=و كـلٍ يدسـم شاربـه مخـلابـه
أحدٍ خياله حـر .. و أحـدٍ وكـري=و أحـدٍ خيالـه كوبـجٍ بقطـابـه
و أنـا خيالـي كـل مـا هديـتـه=حول على الوادي و صـاد عقابـه
شاركت أمثـل ديرتـي و ربوعـي=و كـلٍ يمثـل ديرتـه و أقـرابـه
و الله إلـى الله راد و الله قـالـه=إنـي لاسلمهـا الفخـر و كتـابـه
داري قطـر و أنـا هنـا أمثلـهـا=المجـد مطلوبـي و أنـا طـلابـه
عهـدٍ علـي إنـي لاشـرف داري=تـرْك صبـيٍْ مـا يعـز تـرابـه
شوفوا دمـي مـن حبهـا عنابـي=و حماستـي مـن ضوهـا شبابـه
شاعر خليجـي و العروبـة بيتـي=و البيت ما ياقـف بـدون أطنابـه
و إن عودت بيـن القبايـل فزعـة=أنا أشهد أن لي في اللـوازم لابـة
لي في القبايل ربـع .. و أقدْرهـم=ماني بمن يجهـل مقـام أصحابـه
و إن عودت لأصلي فأنا أصلي مرْي=من صلب يام أهل القنا و خضابـه
قـومٍ لنـا فـوق المعالـي بيـرق=و السيـف قـوة سلْتـه بنصابـه
الشعـر طوْقنـي و أنـا طوْقـتـه=قمت آتمشـى بـه و أفـك أبوابـه
يا بنـت ياللـي تفرقيـن بعـودش=مـا ألومهـم لا كثـروا الخطابـة
لا مر بش دربش علـى خلـق الله=قالـوا كـذا .. بالإصبـع السبابـة
زينش يزينه فعل أبيـش و جـدش=و أنتـي بـدورش للنقـى كسابـه
قومي تباهي بـي و فلـي راسـش=عليش من ستـر الشـرف جلبابـه
و إن ما سترتش بالفعول و باسمي=فعقبنـي الفنجـال يــا صبـابـه

فـــالح السبيعي

26 - 02 - 2007, 17:29

الله يعطيك العافيه يابو بندر

بالفعل ابن فطيس يستاهل المليون بس المشكله تصويت

الشااعر تأهل والتصويت الآن خمسين بالمئه والباقي من حق اللجنه

أسعدني حضورك دام هذا الحضور

فـــالح السبيعي

26 - 02 - 2007, 17:35

الفتى المنصور

وذوقك عالي يالمنصور والقصيده التي أوردتها

من أجمل القصائد التي سمعتها للشاعر

قصيده مكتمله خيال ووصف وحكم

شكراا لحضورك

قليل المشاركة

26 - 02 - 2007, 17:59

أخي أبو بندر أشكرك على النقل الجميل
لكن وش قصتك مع أبن فطيس هذه ثاني مرة تنقل لنا قصيدة هذا المري أكيد العجمان مزوجينك؟؟؟؟؟؟؟؟؟؟؟

فـــالح السبيعي

26 - 02 - 2007, 18:36

أخي أبو بندر أشكرك على النقل الجميل
لكن وش قصتك مع أبن فطيس هذه ثاني مرة تنقل لنا قصيدة هذا المري أكيد العجمان مزوجينك؟؟؟؟؟؟؟؟؟؟؟
قليل المشاااركه

لاشكر على وااجب خيو

وياليت العجمان يسمعونك يمكن يهدوني فرس أصيله:biggrin:

وهذه أول قصيده أنقلها لإبن فطيس المري

وهو يستاهل ويشجع أي واحد يذكر قصايده أوينقلها

دمت بصحه وسلامه

أبوعبدالله

26 - 02 - 2007, 20:46

ابو بندر لاهنت على نقل هذه القصيده الاكثر من رائعه

وصراحه يستاهل المليون واتمنى له ذلك

عايض ابوشيبه

26 - 02 - 2007, 21:00

مشكور ابو بندر

نقل متميز بتميز حضورك

قصيده متميزه من ابن فطيس

وفاله المليووووووووووووون

قليل المشاركة

27 - 02 - 2007, 13:04

قليل المشاااركه

لاشكر على وااجب خيو

وياليت العجمان يسمعونك يمكن يهدوني فرس أصيله:biggrin:

وهذه أول قصيده أنقلها لإبن فطيس المري

وهو يستاهل ويشجع أي واحد يذكر قصايده أوينقلها

دمت بصحه وسلامه

أخي أبا بندر مجرد دعابة وأتمنى أن إن تتحقق هذه الدعابة حقيقة
بس بشرط ما تقرأ أم بندر هذا الرد

صهر المجمعي

27 - 02 - 2007, 14:00

أاحدن خياله حروحدن وكري =وحدن خياله كوبجن بقطابه

((والله حر يابن فطيس)

اضم صوتي مع الاخوه وفاله المليون

وسلمة انامل الناقل

تحياتي لك