ياسبيع يالابتي حماية التالي.: فزعتكم لاعدمتكم

[هاجد صنيدح]

السلام عليكم ورحمة الله وبركاته

وكل عام وانتم بالف خير



احبائي إعضاء وزوار شبكةو منتديات قبيلة سبيع

بدت التصفيات الأولى للبرنامج قصيدة التحدي والذي عرضت على قناة فواصل
وقد اجتزتها بحمد الله تعالى
والمرحله الثانيه تحتاج دعمكم ياسبيع تحتاج تصويتكم حتى ننتقل الى المرحله الثالثه

والفايز في التصويت يذهب الى دبي ويظهر البرنامج على الهواء مباشره ،،،

أحتاج لدعمكم لي انا ومن معي من بني عمي في مسابقة قصيدة التحدي واننتظر تصويتكم و مؤازرتكم والباقي على الله ثم علينا

رقم التصويت ف662 اكتب هذا الرقم في رساله وارسله على أحد الارقام التاليه: الجوال 82829 موبايلي:6646و الخط الساخن70007751

التصويت من الكويت
الوطنيه ( 1663 )
شركة الاتصالات المتنقله ( 92212 ) MTC




ياسبيع يالابتي حماية التالي= ياعزوتي محزمي لاكبرت الهمه
الى تعزوا بربعه كل رجالي= ياسعد منهو هل الغلباء بني عمه
ربعي سبيع الفخر في كل الاحوالي= مكانهم دايمِ بالطيب فالقمه
اللي لهم في علو المجد منزالي=منزالهم غيرهم محدِ وصل يمه
أفخر بربعي ولي الحق مابالي= واللي سواتي بربعه ينجلي همه



http://www.sobe3.com/temp/tv/hajed.wmv

وهذي القصيدة السابقه من اخراج ماضي المديري و أنتاج شبكة سبيع

وهذا رابط التحميل

http://www.sobe3.com/temp/tv/hajed.wmv

تكفون لا تنسون التصويت لا عدمتكم

هاجد صنيدح السبيعي

[فـــالح السبيعي]

أبشر ياهاجد بالتصويت

لاعدمناك يالغالي بسيطه هذي

راس مالها بطاقة شحن ما طلبت شي ياولد العم

ونتمنى الفوز لأبناء سبيع الشجعان في جميع الميادين

وصح لساااانك دائماا ياهاجد شاعر مبدع وبإذن واحد أحد الفوز لك

تمنياتي لك بالتوفيق,,

[وافي السبـيعي]

الامر سهل يابن صنيدح ادرك السبب

وحنا معك بعد الله سبحانه


وبالتوفيق

[خالد الشماسي]

أبشر اخي هاجد


لكن هل هناك طريقة ايسر في ارسال رسائل التصويت


يعني ارسال رسائل متتابعة اتوماتيكيا



وهل هناك مواقع تقدم خدمة ارسال رسائل التصويت

[أبن الجبور]

ابشر بعزك ياهاجد غالى وابشر بسعدك


ابوعمر هل تقصد برنامج مثل

http://www.hatfy.com/downloads.php?p=1&page=0

[هاجد صنيدح]

فالح
وافي
ابو عمر
ابن الجبور
لاهنتو وكلي ثقه في سبيع الغلباء

ابو عمر والله مادري بس اللي يعرف شي لايبخل على الجميع
وترانا في حاجة دعايه يابو عمر لاهنت
تحياتي للجميع

[منصور الحري]

تم التصويت

[الحر النداوي]

ابشر بسعدك يابن صنيدح


وان شاء الله ان نصوت لك وبابلغ عيال عمي كلهم وربعي



لكن يا هاجد وش طريقة هالمسابقة وفي اي القنوات تعرض ؟؟

يعني يا ليت لو تتحدث لنا عن المسابقة لو تكرمت,,



ما ينحني راسي وأنا سبيعي *** وليا انحنى راسي برجلي وطيته

[هاجد صنيدح]

للتوضيح

اسم المسابقه( قصيدة التحدي )على قناة فواصل وهذه المرحله الاولى وسوف يتاهل الى المرحله الثانيه 24 من مجموع المشاركين وسوف يطلعون عل الهوى مباشره بعد العيد من دبي على مسرح جبل علي وبعدها يكون فيه تناقص للعدد حتى يصل الى فائز واحد والجائزه مليون ريال :
وهي طبعا تعتمد على التصويت.

وتحياتي للجميع

[ماضي المديري]

ابشر بالفزعه وانا ولد مدغم
اذا ماوقفنا معك في هذا اليوم متى ناقف
تكفون يالغلبا نبي فزعتكم لاتخلون ولدكم

[جفين الطويرش]

اللي لهم في علو المجد منزالي=منزالهم غيرهم محدِ وصل يمه
أفخر بربعي ولي الحق مابالي= واللي سواتي بربعه ينجلي همه


ابشر بعزك وبشر بسعد ان راده الله بتاخذ الاول

والله يوفقك وانا معك قلبٍ وقالبا

[ابن جراح الثاني]

اللي تبغانا فيه حنا فيه ياهاجد

اخوك

الثوري

[هاجد صنيدح]

ذيب الجبور
بيض الله وجهك ولاهي غريبه منكم الوقفات انتم وسبيع الغلباء كافه

بس ارجو لو سمحت ان تبلغ الناس الذين لايعلمون ولا يتابعون النت

تكفون لايغلبونا الرياجيل
وكلي ثقه بربعي
وتحياتي للجميع

[حفيد المجد]

ابشر بسعدك ياهاجد وابشرك بلغت من اعرف من سبعان قطر

تم التصويت

[فتى رمـاح]

أرق سنود ياهاجد
وتم التصويت
...

[ماضي المديري]

بدت التصفيات الأولى لبرنامج قصيدة تحدي والذي يعرض على قناة فواصل قريباً وشارك الشاعر
هاجدبن صنيدح السبيعي في البرنامج وألقى قصيدته أمام لجنة البرنامج وأجازوه للمرحله الثانيه

والمرحله الثانيه تحتاج دعمكم ياسبيع تحتاج تصويتكم حتى ينتقل الى المرحله الثالثه

وبعد التصويت يذهب الى دبي ويظهر البرنامج على الهواء مباشره ،،،

لا تخلون ولد عمكم

[خالد الشماسي]

أبشر بعزك في كل مره نقولها ونعيد ونكررها





تم تأجيل شروط الشبكة لدعم شعراء القبيلة

تم انتاج قصيدتك التي بهذا الموضوع

تم وضع بنر خاص بالدعم

سيتم مراسلة جميع المشتركين بالشبكة لطلب التصويت .



نسأل الله ان يوفقك أخي هاجد دنيا وآخره


وفالك المليون

[ماضي المديري]

اخي هاجد لقد تم تعديل وتنسيق الموضوع والقصيد

تحياتي

[المـبـهـم]

عيبٍ علي ألتفت والدرب قدامي

تم التصويت

[المـبـهـم]

بيض الله وجيهكم

أداء وإخراج متعوب عليه


بيض الله وجيهكم جميعاً

[هاجد صنيدح]

ابو عمر
ماضي المديري
مثل ماقال الشيخ والشاعر عجران بن شرقي
ظنيت في ربعي ولاخاب ظني= وانا احمد اللي مودع الظن ماخاب

بيض الله وجيهكم جميعا انتم وكل بني عمي سبيع الغلباء
وكل من وقف ونتمنى نشوف الارقام تتصاعد باذن الله تعالى

وتقبلو تحياتي

[أخو نوره]

بكون معك صادق لك مني كل الاحترام والتقدير ثم الدعاء لك بتوفيق ثم بطاقة سوا 250 والمعذره على التقصير

في ذمتي انه لك

[أبو يزيد]

أبشر بعزك ياهاجد

راسً مافيه حمياء جعله يدفن وماطلبت غالي



ومن هنا اناشد ابناء قبيلة سبيع الغلباء بالدعم والمسانده للشاعر هاجد بن صنيدح

وايضاً الاستعداد لدعم ابناء القبيله المشاركين في جميع المسابقات القادمه

[هاجد صنيدح]

الاخ الغالي
ماضي المديري
الرابط ماهو راضي يفتح ارجو النظر في وضعه
وتقبل تحياتي

[ماضي المديري]

اخي العزيز هاجد
الرابط يعمل اعد المحاوله مره أخرى
تحياتي والله يوفقك في المسابقه

[ابن شري]

ابشر بسعدك يابن العم

واتمنى لك التوفيق ان شاء الله



اخوك بن شري

[د.فهد]

كفو كفو ياسبيع هذا العشم ياهل الغلبا

وابشر بالتصويت الين تتأهل وتأخذ المليووون

الله يوفقك ويوفق شعرائنا الباقين

[هاجد صنيدح]

ابو عمر
ماضي
ابو فيصل
الف الف شكر لكم لاهنتم على هذا العمل الرائع أداء واخراج
انا توني اسمعها لان جهازي كان فيه مشكله
وجميع قصائدي حصريا لمنتدانا الرائع وماعجبكم من قصائدي خذوه وسجلوه وسوقوه لصالح هذا الموقع
وهذا تنازل مني عن جميع الحقوق الماديه
والله يوفقكم الى مافيه الصالح لخدمة القبيله .



وعهدا علي ان كتب الله لنا الفوز بهذه الجائزه أشهد الله وأشهدكم
اني لاوزعها على الجمعيات الخيريه في جميع مدن ومحافظات سبيع الغلباءلاعطاها فقراء ومحتاجين القبيله
فوالله ثم والله انني لم أدخل هذه المسابقه طمعا في هذه الجائزه بل للفوز باسمها والذي سوف يجير لاسم القبيله العزيزه علينا جميعا.

وتقبلو تحياتي


هاجد بن صنيدح السبيعي

[أبو يزيد]

وعهدا علي ان كتب الله لنا الفوز بهذه الجائزه أشهد الله وأشهدكم
اني لاوزعها على الجمعيات الخيريه في جميع مدن ومحافظات سبيع الغلباءلاعطاها فقراء ومحتاجين القبيله
فوالله ثم والله انني لم أدخل هذه المسابقه طمعا في هذه الجائزه بل للفوز باسمها والذي سوف يجير لاسم القبيله العزيزه علينا جميعا.


ونعم الرأي ونعم الشاعر انت ياهاجد

اسال الله ان يوفقك ويعطيك على نيتك الطيبه التي تنم عن جمال روحك وطيبة قلبك وحبك للخير

[admin]

للعلم فواصل قريبا ستتيح التصويت دفعة واحدة

وهذا سيتيح للجميع تقديم دعم بسهوله



تم التصويت


آدمن

[جفين الطويرش]

يتنبيه يا جماعة

اللي في دوله الكويت عليهم بلارقام هذه


الوطنيه ( 1663 )


شركة الاتصالات المتنقله ( 92212 ) MTC

ونسئل الله لبو صنيدح التوفيق


ياسبيع يالابتـي حمايـة التالـي=ياعزوتي محزمي لاكبرت الهمـه
الى تعزوا بربعـه كـل رجالـي=ياسعد منهو هل الغلباء بني عمـه
ربعي سبيع الفخر في كل الاحوالي=مكانهـم دايـمِ بالطيـب فالقمـه
اللي لهم في علو المجـد منزالـي=منزالهم غيرهم محدِ وصـل يمـه
أفخر بربعي ولي الحـق مابالـي=واللي سواتي بربعه ينجلـي همـه

[ابومحمد القباني]

ابيت رائعة جدا يالطويرش صح لسانك

[القريشي1000]

أبشر بعزك ياهاجد

[مشعاب]

تستاهل الفزعة انت حصري لنا وانا حصري لك

والخير قادم
تم التصويت وبدور واحد من الربع فاضي وبخليه يستلم الجوال

شكل المسافة طويله

[فتى العزه]

تم التصويت


ابشر بعزك ياهاجد

[ابو شنب]

ابشر بسعدك يابن صنيدح


وان شاء الله ان نصوت لك وبابلغ عيال عمي كلهم وربعي

ولكن عندي سوال من اي السبعان انت يابن صنيدح ؟

[هاجد صنيدح]

ابو شنب لاهنت وبيض الله وجهك
اما السئوال فانا طال عمرك من بني عمك الصمله

ويشرفني ان احمل أسم سبيع الغلباء كافه وأتمنى أن أشرفه بوقفتكم أنشالله
وتقبل تحياتي

[هاجد صنيدح]

القصيده كامله



ياسبيـــــع يالابـــــتي حمــاية التــــــــــالي = ياعزوتي محزمي لاكبرت الهمــــــــــــه

الى تعـــزوا بربـــعه كـــل رجــــــــــــالي = ياسعد منهو هل الغلباء بني عمـــــــــــــه

ربعي سبــيع الفخر في كــــل الاحــــوالي = مكانهم دايــــــمٍ بالطيب فالقــمــــــــــــــه

أللــي لــهم في علو المــجد مـــــــنــــزالي = منزالهم غيرهم ماحدٍ وصل يمـــــــــــــه

أفخـــر بربعــي ولي الــحق مــابـــــــــالي = واللي سواتي بربعه ينجلي همــــــــــــــه

وسبيع عبر العصور وعبر الاجيــــــالي = رجالهم كن حب الطيب في دمـــــــــــــه

للطيـــــب ربي خلقـــهم اول وتـــــــــــالي = ارداهم اللي يحط الطيب في كمـــــــــــه

خيالهـــــم مايفـــــكر بالــــف خـــــــــيالي = وعقيدهم لو يجيه الفين ماهـــــــمـــــــــه

يقدم على الموت الاحمر واشهـــــب الالي= لاثار دخانها واســودت الغـــــمــــــــــــه

يومنــها باليمـــين وطــيب الافــــــعــــالي = كم شيخ قومٍ تواردنا على جــمــــــــــــه

مانشرب الــى قـــراحٍ بــــــارد زلالــــــي = وحثالها نتـــــــركه لســــاير الامـــــــــه

صلنا وجلنا بوقتٍ كـــــلـــه أبــــطــــالـــي = يوم القبا يل بـــــذاك الـــــوقت ملـــــــتمه

واليوم من فضل ربي في وضـــــــلالــــي = في ضل دولة هل العوجا هل الـــــــذ مه

وفي ذمتي مارتكـــــيت الى على جـــالــــي = مدام راســــي هل الـــغلبــاء بني عمــــه

[العويد]

كيف يتم التصويت من خارج الدول العربيه؟؟؟؟

نبي الفزعه يارياجيل

كل اصواتنا معك اخي هاجد مالك اللي يوصي كل من اعرفه

موفق يالقرم

[عبيد ابو شيبه]

ابشر بالفزعه ياهاجد صنيدح سبيع تفزع للغريب وكيف ماتفزع للقريب
تم التصويت وفالك المليون وتقبل تحياتي

[بوسعود السبيعي]

كيف يتم التصويت من خارج الدول العربيه؟؟؟؟

نبي الفزعه يارياجيل

كل اصواتنا معك اخي هاجد مالك اللي يوصي كل من اعرفه

موفق يالقرم


نفس السؤال لأني من قطر وحاب اني اصوت لابن عمي

[مشعاب]

يا هاجد انت ترشحت ولا وش صار ؟


ترى امرك يهم الجميع و ترى كثير من ربعك مخلي تصويته لليوم الكبير


علمنا عن النتائج والترشيحات

[هاجد صنيدح]

شكرا أخواني ابناء قبيلتي ماقصرتو وخيرها في غيرها الموضوع أنتهى ولاقسم الله لنا التاهل بسبب قلة الاصوات

أخوي مشعاب بيض الله وجهك وماقصرت وللاسف أن اليوم الكبير أنتهى قبل يصوتون الجماعه المنتظرين له

وتقبلو تحياتي

[فـــالح السبيعي]

شكرا أخواني ابناء قبيلتي ماقصرتو وخيرها في غيرها الموضوع أنتهى ولاقسم الله لنا التاهل بسبب قلة الاصوات

أخوي مشعاب بيض الله وجهك وماقصرت وللاسف أن اليوم الكبير أنتهى قبل يصوتون الجماعه المنتظرين له

وتقبلو تحياتي

خيرهااا بغيرهااا ياهاجد

وتبقى محاوله شجاعه منك تبين ثقتك في نفسك وأنت شاعر كبير ومتميز

وكم أخرجت الأصوات من شاعر مميز

لك خالص التمنياااات,,,

[راعي مرات]

هاجد


أبشر بسعدك


بمشيئة الله


والجميع فيهم بركة وماهم مقصرين